Viedańnie kolkaści virusu ŭ arhaniźmie pacyjenta moža dapamahčy lekaram pradkazać chod chvaroby. Pra heta piša «Radyjo Svaboda» sa spasyłkaj na The New York Times.

U toj čas jak pacyjenty z COVID-19 zapoŭnili špitali pa ŭsim śviecie, lekary sutyknulisia sa składanym pytańniem: u jakich pacyjentaŭ bolš vysokaja vierahodnaść chutkaha paharšeńnia stanu? I ŭ kaho ź ich bolš šancaŭ pieramahčy virus i ačuniać?

Akazvajecca, jość sposab dapamahčy adroźnić hetyja dźvie hrupy, choć jon jašče nie atrymaŭ šyrokaha raspaŭsiudu. Dziesiatki daśledčych prac, apublikavanych za apošnija niekalki miesiacaŭ, pakazali, što ludzi, čyje cieły kišać karanavirusam, čaściej chvarejuć i z bolšaj vierahodnaściu pamirajuć, u paraŭnańni z tymi, chto niasie ŭ sabie značna mienš virusu.

Virusnaja nahruzka

Vyniki pakazvajuć, što viedańnie tak zvanaj virusnaj nahruzki — kolkaści virusu ŭ arhaniźmie — moža dapamahčy lekaram sprahnazavać chod chvaroby pacyjenta. Heta dapamahaje im vyłučać tych, kamu kisłarodnaja dapamoha moža spatrebicca, naprykład, tolki raz na dzień, i tych, kamu jana budzie patrebnaja pastajanna. Pacyjentaŭ z bolšaj virusnaj nahruzkaj treba dahladać bolš pilna, — kaža doktar Denieł Hryfin, lekar-infekcyjanist z Kalumbijskaha ŭniversytetu ŭ Ńju-Jorku.

Pavodle doktara Hryfina, adsočvańnie virusnaj nahruzki «sapraŭdy moža dapamahčy nam padzialić ryzyki». Ideja nia novaja: kiravańnie virusnaj nahruzkaj doŭhi čas składała asnovu lačeńnia ludziej ź VIČ i strymlivańnia pieradačy hetaha virusu.

Da hetaha času dla adsočvańnia virusnaj nahruzki ŭ pacyjentaŭ z COVID-19 było prykładziena adnosna mała namahańniaŭ. Adnak u hetym miesiacy amerykanskaje Ŭpraŭleńnie sanitarnaha nahladu za jakaściu charčovych praduktaŭ i medykamentaŭ (FDA) zajaviła, što kliničnyja labaratoryi mohuć paviedamlać nia tolki pra toje, ci byŭ čałaviek infikavany karanavirusam, ale i pra toje, kolki virusu trapiła ŭ jahony arhanizm.

Test PCR daje bolš infarmacyi

Na ščaście, źviestki ab virusnaj nahruzcy — ci, prynamsi, jaje prybliznaja acenka — lohka dastupnyja, jany ŭbudavanyja ŭ vyniki PCR testu, jaki bolšaść labaratoryj vykarystoŭvaje dla dyjahnostyki karanavirusnaj infekcyi.

PCR test pravodzicca «cyklami», kožny ź jakich padvojvaje kolkaść virusnaha hienetyčnaha materyjału, pieršapačatkova ŭziataha z uzoru pacyjenta. Čym vyšejšaja zychodnaja virusnaja nahruzka, tym mienš cyklaŭ patrabujecca testu dla vyjaŭleńnia hienetyčnaha materyjału i atrymańnia syhnału.

Stanoŭčy vynik pry nizkim parozie cyklu, abo Ct, aznačaje vysokuju virusnuju nahruzku ŭ pacyjenta. Kali test nia budzie stanoŭčy da zaviaršeńnia mnohich cyklaŭ, u pacyjenta, vierahodna, bolš nizkaja virusnaja nahruzka.

Paćvierdžańnie na praktycy

Daśledniki z Weill Cornell Medicine ŭ Ńju-Jorku zafiksavali virusnuju nahruzku ŭ bolš čym 3000 špitalizavanych pacyjentaŭ z COVID-19 u dzień ich špitalizacyi. Lekary vyjavili, što 40% pacyjentaŭ z vysokaj virusnaj nahruzkaj — čyje testy byli stanoŭčymi pry Ct 25 abo nižej — pamierli padčas znachodžańnia ŭ špitali, u paraŭnańni z 15% pacyjentaŭ sa stanoŭčymi testami pry bolš vysokim Ct i, jak miarkujecca, bolš nizkaj virusnaj nahruzcy.

U inšym daśledavańni Departament hramadzkaha zdaroŭja Nevady vyjaviŭ, što siaredniaje značeńnie Ct składaje 23,4 u ludziej, jakija pamierli ad COVID-19, u paraŭnańni z 27,5 u tych, chto pieražyŭ chvarobu. U biessymptomnych ludziej siaredni pakaźnik skłaŭ 29,6, što śviedčyć ab tym, što jany nieśli značna mienš virusu, čym dźvie inšyja hrupy.

Moža zdacca, što hetyja ličby adroźnivajucca vielmi niaznačna, ale jany adpaviadajuć miljonam virusnych čaścinak.

«Heta nia tonkija adroźnieńni, — kaža doktar Hreninhier. Daśledavańnie, praviedzienaje ŭ jaho labaratoryi, pakazała, što ŭ pacyjentaŭ z Ct mienš za 22 šancy pamierci na praciahu 30 dzion bolš čym u čatyry razy vyšejšyja, čym u pacyjentaŭ ź mienšaj virusnaj nahruzkaj.

Sumnieńni skieptykaŭ

Krytyki hetych vysnovaŭ kažuć, što dakładnaść tekstaŭ PCR nie vielmi vysokaja, bo jany hruntujucca na mazkach z nosa i horła pacyjentaŭ.

Taksama kažuć, što kolkaść karanavirusu ŭ arhaniźmie rezka źmianiajecca ŭ chodzie infekcyi. Uzroŭni pavyšajucca ad niavyznačanaha da stanoŭčaha ŭsiaho za niekalki hadzin, a virusnaja nahruzka praciahvaje raści, pakul nie spracuje imunny adkaz. Zatym virusnyja nahruzki chutka źnižajucca.

Ale virusnyja frahmenty mohuć zatrymlivacca ŭ arhaniźmie, vyklikajučy stanoŭčyja vyniki testaŭ jašče doŭha paśla taho, jak pacyjent pierastaŭ być zaraznym i chvaroba syšła.

Клас
Панылы сорам
Ха-ха
Ого
Сумна
Абуральна