6 studzienia ŭ sudzie Pieršamajskaha rajona razhladali spravy zatrymanych učora pozna viečaram minčukoŭ. Milicejskija abłavy zafiksavanyja va Uruččy, Novaj Baravoj i na vulicy Prytyckaha. U vyniku bolš za 10 čałaviek praviali noč na Akreścina, siarod ich — dva ajcišniki: adzin znachodzicca na balničnym z karanavirusam i zapaleńniem lohkich, u druhoha, kali jamu daduć aryšt, moža sarvacca kantrakt na miljon jeŭra.
Abodva pratakoły składzienyja jak pad kapirku: kala 22 hadzin Arciom Martynaŭ i Arciom Šukanaŭ uziali ŭdzieł u pikiecie, jaki nie byŭ uzhodnieny ź Minharvykankamam. Jany nibyta trymali ściahi i kryčali «Žyvie Biełaruś» razam ź jašče 20 žycharami, adbyvałasia heta na vulicy Łožynskaj, što va Uruččy.
Martynaŭ zajaviŭ, što jon sustreŭsia sa starym znajomym, trochi pierahavaryli i ŭžo razychodzilisia, jak raptoŭna ŭ dvor zalacieli nieviadomyja ŭ maskach. Nichto nie pradstaŭlaŭsia, nie prapanoŭvaŭ razyścisia, nie papiaredžvaŭ pra zatrymańnie, jak heta pavinna być pa zakonie. U vyniku na chłopca skłali pratakoł i za ŭdzieł u niesankcyjanavanym pikiecie (paŭtorna na praciahu hoda), i za admovu vykanać patrabavańni milicyi (nibyta ŭciakaŭ i ŭpiraŭsia pry zatrymańni). Pry hetym u sudzie prahledzieli videa z kamier nazirańnie, dzie bačna, jak žycharoŭ zatrymlivać, załamvajučy im ruki — ni ściahoŭ, ni supracivu milicyi na videa niama.
Arciom Martynaŭ, pavodle vypiski ź miedycynskaj kartki, znachodzicca na balničnym — u jaho dyjahnastavany karanavirus i pnieŭmanija, na 6 studzienia byŭ zapłanavany jahony vizit da doktara, kab vyznačyć, ci treba praciahvać balničny. U vyniku sudździa Anastasija Laŭkoŭskaja pryznačyła ajcišniku štraf 50 bazavych vieličyniaŭ za pikiet, pratakoł ab niepadparadkavańni supracoŭnikam RAUS viarnuli ŭ milicyju na dapracoŭku.
Arciom Šukanaŭ byŭ zatrymany tam ža, na Łožynskaj. Advakat Taćciana Karadoviec začytała ŭ sudzie list z pracy, u jakim adznačajecca, što Šukanaŭ — rabotnik, jakoha niama kim zamianić, adkazvaje za klučavy prajekt, na nastupnym tydni musić jechać u kamandziroŭku, ad jakoj zaležyć kantrakt z vyručkaj na sumu miljon jeŭra. U vypadku, kali jamu daduć aryšt, kantrakt moža być sarvany, dziesiać supracoŭnikaŭ firmy zastanucca biez pracy.
Šukanaŭ zajaviŭ, što viečaram 5 studzienia piŭ harbatu z susiedziami ŭ dvary, nichto nie vykrykvaŭ nijakich łozunhaŭ i nie trymaŭ ściahoŭ. Supracoŭniki milicyi byli ŭ cyvilnym, nie pradstaŭlalisia, nie papiaredžvali pra zatrymańnie i ŭžyvańnie fizičnaj siły, jak taho patrabuje zakon «Ab orhanach unutranych spraŭ».
U vyniku spravu Šukanava sudździa Maksim Trusievič adpraviŭ na dapracoŭku ŭ Pieršamajski RAUS — u materyjałach ukazana niapravilnaje miesca naradžeńnia zatrymanaha, taksama ŭ pratakole ŭkazvajecca, što Šukanaŭ uziaŭ udzieł u mitynhu, a paśla śćviardžajecca, što heta byŭ pikiet, a heta roznyja paniaćci, pavodle zakona «Ab masavych mierapryjemstvach».
Martynaŭ budzie vyzvaleny adrazu paśla sudovaha pracesu, prahučała ŭ sudzie. Što datyčycca Šukanava, to, pa słovach sudździ Trusieviča, rašeńnie budzie prymać milicyja. Pa zakonie, da suda zatrymanych mohuć utrymlivać nie bolej za 72 hadziny. U vypadku z zatrymanymi va Uruččy hety čas zakančvajecca ŭ 22 hadziny 8 studzienia, heta vychadny dzień u sudzie.
