Alaksandr Łukašenka pryznačyŭ Kiryła Kazakova hienieralnym dyrektaram kanała STB. Jašče niadaŭna takoje kadravaje rašeńnie nie vyklikała b nijakaha intaresu ŭ naziralnikaŭ, ale ciapier usio nie tak — pa ŭzroŭni trešu ŭ teleefiry STB pa-za kankurencyjaj.
Dyk chto taki Kirył Kazakoŭ?
Jamu 41 hod, u stalicu Kazakoŭ pryjechaŭ užo paśla vučoby na mahiloŭskim histfaku: tam byŭ fakultet dadatkovych prafiesij, dzie Kazakovu pa sumiaščalnictvie vykładali jašče i žurnalistyku.
Jaho dobra pamiatajuć hledačy BT pačatku dvuchtysiačnych — małady Kazakoŭ vioŭ samuju papularnuju prahramu biełaruskaj vytvorčaści: «Zona Ch». Dyktar začytvaŭ kryminalnuju chroniku z apieratyŭnych zvodak pad adpaviedny videašerah.
Tady ž Kazakoŭ vielmi zbliziŭsia z rabotnikami siłavych orhanaŭ, pačaŭ zachaplacca ich asabistymi jakaściami.
«Ja vielmi pavažaju našaha ministra ŭnutranych spraŭ Uładzimira Navumava — u žyćci heta vielmi dobry i adkryty čałaviek. A viedajecie, što ministr nadzvyčajnych spraŭ Valeryj Astapaŭ piša vieršy? Ciapier ja ščylna pracuju z KDB i pra hetych ludziej mahu skazać, u pryncypie, toje ž samaje», — kazaŭ Kazakoŭ «SB» u 2003-m.
Paśla zornaha času ŭ «Zonie Ch» Kazakoŭ na hod uznačaliŭ kanał «Biełaruś-24», jaki nibyta mieŭ pracavać na mižnarodnuju aŭdytoryju, ale nikoli tak i nie streliŭ.
Zatym viarnuŭsia ŭ Ahienctva telenavin (ATN) i kiravaŭ im. Z hledzišča biełaruskaj televizijnaj ijerarchii načalnik ATN — heta topavaja pazicyja. Ź jaje traplajuć u kresły staršyniaŭ praŭleńnia BT, jak, naprykład, Ivan Ejsmant.
Ale ŭ Kazakova paśla pryznačeńnia Natalli Ejsmant pres-sakratarom Łukašenki niešta pajšło nie tak.
«U ATN jon pracavaŭ davoli praduktyŭna, byŭ adnym z samych tałkovych top-mieniedžaraŭ BT, ale čamuści jaho adtul adsunuli i adpravili faktyčna u vysyłku na STB, chacia jon pačynaŭ karjeru na BT i byŭ sucelna ichnim kadram. U płanie ijerarchii i i kolkaści ludziej u padparadkavańni heta było panižeńnie», — kažuć znajomyja z prafiesijnym šlacham Kazakova.
Byłyja i ciapierašnija rabotniki STB aceńvajuć fihuru Kazakova z dvuch palarnych bakoŭ. Maŭlaŭ, da jaho niama pytańniaŭ jak da mieniedžara.
«Jon umieje pracavać z kalektyvam, padparadkavaŭ sabie biestałkovych mieniedžaraŭ niekatorych słužbaŭ, jakija i radyja za kožnaj drabiazoj zvanić Kazakovu i raicca. U płanie dyscypliny i miechaniki pracesaŭ rabota na STB ź jaho prychodam palepšała», — kaža rabotnik STB.
«Kazakoŭ admianiŭ panyłyja biessensoŭnyja płaniorki, pavodzić siabie adnolkava roŭna i z redaktaram adździeła, i z kiroŭcam słužbovaj mašyny, niejkaj zvyšsubardynacyi i klenčańnia pierad im niama, jon takoha nie dapuskaje, moładź pra jaho adhukajecca taksama dobra», — dadaje inšy žurnalist.
I partret Kazakova byŭ by ledź nie sucelna biełym, kali b nie padziei 2020-ha, kali kanał staŭ avanhardam brudu i paklopaŭ.
«STB nie hrebuje ničym, vydaje ŭ efir samy brud, samuju čarnuchu, samyja ahidnyja teksty. Pry Kazakovie STB staŭ №1 pa paklopie, majo pierakanańnie — hety pieryjad u dziejnaści kanała ŭ budučyni budzie acenieny z pazicyj kryminalnaha kodeksa», — kaža «Našaj Nivie» adzin sa zvolnienych supracoŭnikaŭ.
Sapraŭdy: Azaronak, Arciuch, Pustavy, Mukavozčyk — usie hetyja ludzi sa svaimi dzikimi tekstami źjavilisia ŭ efiry pry Kazakovie.
«Jon ličyć heta «aŭtarskaj žurnalistykaj» i ŭ niejkaj stupieni hanarycca, što daŭ darohu takim kadram, maŭlaŭ, tak kanał stanovicca paznavalnym pa asobach», — kaža ciapierašni supracoŭnik STB.
Maŭlaŭ, teksty azaronkaŭ Kazakoŭ čytaje sam, ale nie pravić: bo tam abo pierapisvać uščent, abo pakidać jak jość.
U žniŭni Kazakoŭ vyhladaŭ razhublenym.
«17 žniŭnia, kali ludzi pryjšli pad ścieny STB, a kalektyŭ vybuchnuŭ, Kazakoŭ staŭ havaryć ź ludźmi. Maŭlaŭ, jon hałasavaŭ za Łukašenku, ale zhodny, što treba niejkija pieramieny rabić, praŭda, pastupovyja. Pierakonvaŭ, što treba zastavacca pracavać, što ŭsio źmienicca, što jamu ŭ Administracyi paabiacali štodzionnyja bryfinhi ŭ milicyi, dzie buduć raskazvać, jak rasśledujucca spravy ab katavańniach. Skardziŭsia, što navat jaho adnahrupniki pišuć jamu brydkaści ŭ sacsietkach, ale, maŭlaŭ: «Nu ja ž nie taki, ja tut, z vami», — dadaje byłaja rabotnica STB, jakaja nie pavieryła ŭ hetyja raskazy i syšła.
Admietna, što Kazakoŭ prabiŭsia na kirujučuju pasadu, nie majučy ciopłych adnosin z Natallaj Ejsmant.
Pryznačajučy jaho na pasadu, Łukašenka skazaŭ: «Tak vyjšła, što ja asabista ŭbačyŭ vas u spravie. Kanał vielmi padciahnuŭsia. Ja, naprykład, užo amal nie baču roźnicy miž STB i, jak u nas pryniata kazać, viadučymi kanałami».
