Fota Depositphotos.com
Efiektyŭnaść — heta vymiareńnie taho, nakolki vakcyna źnižaje ryzyku zaražeńnia. Naprykład, stvaralniki vakcyny Johnson & Johnson, jakuju zarehistravali na minułym tydni, nazirali, kolki vakcynavanych ludziej zarazilisia karanavirusam. Zatym jany paraŭnali hetyja źviestki z kolkaściu infikavanych, jakija atrymali płaceba.
Hetu roźnicu ličać u adsotkach. Kali adsotak roŭny nulu, to heta značyć, što vakcynavanyja ludzi padviarhajucca takoj ža ryzycy jak i tyja, chto atrymaŭ płaceba. Sto adsotkaŭ značyć, što vakcyna całkam źniščaje ryzyku zachvorvańnia.
Takim čynam amierykanskaja kampanija Johnson & Johnson vyjaviła, što efiektyŭnaść ich vakcyny składaje 72%.
Viadoma, što vyniki efiektyŭnaści zaležać ad miesca daśledavańnia. Johnson & Johnson pravodziła vyprabavańni ŭ ZŠA, Łacinskaj Amierycy i Paŭdniovaj Afrycy. Efiektyŭnaść u ZŠA była najvyšejšaj.
U Paŭdniovaj Afrycy novy štam karanavirusa źnižaje efiektyŭnaść vakcyny, bo hety varyjant moža ŭchilacca ad niekatorych antycieł, što vypracoŭvaje vakcyna Johnson & Johnson. Adnak paŭdniovaafrykanski štam nie robić vakcynu bieskarysnaj: efiektyŭnaść Johnson & Johnson u Paŭdniovaj Afrycy skłała 64%, piša The New York Times.
Efiektyŭnaść taksama moža źmianiacca ŭ zaležnaści ad ciažkaści infiekcyi. Naprykład, Johnson & Johnson pakazała, što maje 85-adsotkavuju efiektyŭnaść suprać ciažkich vypadkaŭ kavidu. Heta značyć, što vakcyna źmienšyć kolkaść špitalizacyj i śmierciaŭ.
Tamu kali navukoŭcy nazyvajuć efiektyŭnaść vakcyny, varta mieć na ŭvazie, što heta nie moža być dakładnaj acenkaj, bo vyprabavańni ažyćciaŭlajucca na abmiežavanaj kolkaści ludziej.
