Fota bsu.by

Fota bsu.by

«Da mianie padyšli pierad zaniatkam i prynieśli paviedamleńnie. Jano było biez daty, tamu ja padpisać admoviŭsia, zrabiŭ zaŭvahu, što nie aformlena naležnym čynam. Vyrašyŭ supraciŭlacca. U mianie staŭka z čverciu, nichto jaje ŭ siaredzinie siemiestra nie zakryje. Na mnie visiać zavočniki, čatyry hrupy biełaruskich studentaŭ, turkmieny, kitajcy», — kaža vykładčyk.

Pryčynu jamu nie tłumačyli. Zakančvajecca kantrakt — i ŭsio tut. Alaksandr Radyna miarkuje, što zvalniajuć praz palityku.

«Pakolki ja nie chavaŭ svajoj pazicyi ŭ dačynieńni da vybaraŭ, hvałtu. Na mianie stali klapać vymovu adnu za adnoj — što ja pieraškadžaŭ vieści zaniatki, spračaŭsia z achoŭnikami, nieprafiesijna siabie pavodziŭ. U lutym napisali klaŭzu, što ŭ aŭdytoryi, dzie ŭ mianie prachodzili zaniatki, čuli łozunhi «palityčnaj afarboŭki» — vitańni «Žyvie Biełaruś!»

Vykładčyk, kandydat fizika-matematyčnych navuk, nie chavaje: kryŭdna sychodzić paśla stolkich hod na fakultecie.

«U mianie tut baćka pracavaŭ doŭhi čas, byŭ zahadčykam kafiedry, mnohaje zrabiŭ dla ŭniviersiteta. Ale ja byŭ maralna hatovy da takoj raźviazki, bo pavodziny načalstva mnie viadomyja. Dla ich ludzi — heta raschodny materyjał. U mianie takoje ŭražańnie, što ich nie cikavić, što razvalicca fakultet, bo nie adnaho ž mianie zvalniajuć».

Pary Alaksandr Radyna viadzie pa-biełarusku. Kaža, rodnuju movu vyvučyŭ u baćkavaj vioscy, kudy dziciem pryjazdžaŭ kožnyja kanikuły.

«U 1993 hodzie baćka byŭ adnym z układalnikaŭ i redaktaram ruska-biełaruskaha matematyčnaha słoŭnika. I my ź im praciahvali hetu spravu — u 2010-m padrychtavali polska-biełaruski słoŭnik matematyčnych terminaŭ. Baćka vykładaŭ hod pa-biełarusku, paśla ŭžo nie, bo ŭ krainie adbyŭsia adkat ad biełarusizacyi, zaćvierdzili aficyjna dźviuchmoŭje. Ale radaj fakulteta tady było pryniata rašeńnie na piedahahičnym adździaleńni vykładać pa-biełarusku, i ja pajšoŭ tudy pracavać. Spačatku było troški niazručna, pakul matematyčnyja kliše pavyvučvaŭ. A paśla nijakich ciažkaściaŭ». 

Vykładčyk kaža, što ŭžo dumaŭ, kudy možna było b uładkavacca. Adzin z varyjantaŭ — padvučycca pa kirunku Data Science i pajści ŭ IT.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?