Fota Depositphotos.com
Skieptycyzm rasijan datyčna vakcyny Sputnik V pierš za ŭsio abumoŭleny ahulnym niedavieram da ŭłady i zachutkaj raspracoŭkaj pryščepki, piša The Wall Street Journal.
Choć vakcyna biaspłatnaja ŭ Rasii, tolki 3,5% rasijan pryščapilisia. Dla paraŭnańnia: u ZŠA vakcynavali ŭžo 17,1% nasielnictva, a ŭ Vialikabrytanii — 32,1%, zhodna sa źviestkami Our World in Data, prajekta Oksfardskaha ŭniviersiteta, jaki adsočvaje tempy vakcynacyi va ŭsim śviecie.
Apošnija apytańni rasijan pakazali, što mienš za treć hatovyja zhadzicca na vakcynacyju Sputnik V.
Niedavier da rasijskaj vakcyny vyklikany jaje chutkaj raspracoŭkaj, a taksama šyroka raspaŭsiudžanym niedavieram da ŭrada, jaki ŭźnik jašče ŭ savieckim minułym i charakterny dla mnohich krain z aŭtarytarnym režymam i niesvabodnymi ŚMI. Ludzi nastolki zvykli, što ich padmanvajuć, što navat kali dziaržaŭnyja ŚMI kažuć praŭdu, joj pierastajuć vieryć.
«My išli naroŭni ź inšymi krainami ŭ raspracoŭcy vakcyny, adnak ciapier adstajom u jaje prymianieńni. Jość vialikaja ryzyka, što heta raściahnie pandemiju ŭ Rasii», — narakaje Anton Hopka, dekan fakulteta technałahičnaha mieniedžmientu i inavacyj Univiersiteta ITMO.
Čytajcie taksama: A połučiłoś kak vsiehda? Rasija adstaje ad Zachadu ŭ vytvorčaści vakcyn ad kavidu, Biełaruś mučycca zaadno
Kab paskoryć vakcynacyju, rasijski ŭrad admoviŭsia ad taktyki «pryjarytetnych hrup vakcynacyi», jakuju vykarystoŭvaje, naprykład, Niamieččyna, i pryščepka sa studzienia dastupnaja ŭsim. Centry vakcynacyi stvaryli ŭ fud-kortach, opiernych teatrach i handlovych centrach, a niekatoryja moły prapanoŭvali biaspłatnaje maroziva za pryščepku.
«Deficytu vakcyny niama, adnak nielha skazać, što ludzi śpiašajucca pryščapicca», — adznačyŭ niadaŭna Dźmitryj Piaskoŭ, pres-sakratar prezidenta. Čynoŭniki spadziajucca, što popyt na vakcynu budzie raści pa miery taho, jak bolš rasijan daviedajucca pra pieravahi vakcyny Sputnik V.
Uładzimir Pucin rehularna raschvalvaje rasijskuju vakcynu na telebačańni i ŭ razmovach z zamiežnymi lidarami, ale sam jašče nie pryščaplaŭsia. U Kramli zajavili, što prezident źbirajecca vakcynavacca ŭ kancy leta abo na pačatku vosieni paśla kansultacyi z doktaram.
Ëść ciažkaści taksama z łahistykaj, 9 z 85 rehijonaŭ jašče nie pačali vakcynacyi.
U toj ža čas za miažoj Rasija mocna rekłamuje svaju vakcynu i navat stvaryła asobny akaŭnt u Twitter dla Sputnik V. Bolš za toje, pa vysnovach amierykanskich čynoŭnikaŭ, rasijskija śpiecsłužby imknucca padarvać davier da zamiežnych vakcyn šlacham anłajn-publikacyj, dzie vykazvajecca sumnieńnie nakont biaśpieki zachodnich vakcyn.
Ahułam bolš za 40 krain adobryli Sputnik V, siarod ich krainy Jeŭrasajuza Słavakija i Vienhryja.
Adnak samich rasijan heta nie pierakonvaje. Sacyjałahičny centr Levada Center na hetym tydni apublikavaŭ vyniki apytańnia, zhodna ź jakim tolki 30% rasijan hatovyja pryščapicca (u śniežni žadajučych było 38%). Mnohija spasyłajucca na mahčymyja pabočnyja efiekty, a taksama majuć sumnieńni ŭ dakładnaści kliničnych vyprabavańniaŭ rasijskaj vakcyny.
