«Niefiltravanaje kino» pačynałasia ź pieradprahladaŭ na fiestyvali Cinema Perpetuum Mobile, što taksama pakazvaŭ karotki mietr i rabiŭsia kamandaj kinaamataraŭ bieź dziaržaŭnaj ci jakoj inšaj bujnoj padtrymki. Tut była praktyka źbiracca i prosta biez razboru hladzieć karciny, padadzienyja na Cinema Perpetuum u jakaści zajaŭki — i na hetych pakazach naradziłasia ideja novaha festu.
Siońnia, viadoma, «Niafiltr» prapanuje nie randomnyja padborki, a ŭsio ž admysłova sfarmiravanyja prahramy, dzie možna sustreć udzielnikaŭ Kanskaha, Vieniecyjanskaha ci Bierlinskaha kinafiestyvalaŭ, ale nazva jaho zastajecca raniejšaj.
Za minułyja hady — padzieja paŭstała pad nahladam jurysta pa adukacyi Alaksandra Martyniuka — «Niefiltravanaje kino» stała samaj lohkaj i niefarmalnaj tusoŭkaj dla aŭtaraŭ dy hledačoŭ. Zamiežnyja režysiory žyli ŭ adnym miescy, farmiravali siabroŭskija suviazi i časta viartalisia na nastupny hod. Niekatoryja navat pryjazdžali ŭ Biełaruś zdymać svajo kino.
Sioletniaja konkursnaja prahrama składajecca ź siekcyj animacyi, dakumientalistyki dy hulniavoha kino. Taksama «Niafiltr» uklučaje ŭ siabie padborki ekśpierymientalnych i «niefiltravanych» karcin, vosiem biełaruskich rabot, a jašče siekcyi «Žančyny ŭ kino», «Uschod-Zachad» i «Filmy Kitaja». Asobna budzie pakazana prahrama stužak, adabranych štučnym intelektam. Aproč filmaŭ u raskładzie jość vystava zroblenych štučnym intelektam tvoraŭ mastactva, vystup eks-teatra «EYE» i dyskusija pa fiem-prahramie «Žančyny ŭ kino».
Pieramožcy buduć abvieščany 14 sakavika. Uvachod na mierapryjemstvy pieršaha i treciaha dnia «Niefiltravanaha kino» adbyvajecca pa dobraachvotnych unioskach, kvitki na konkursnyja pakazy ŭ druhi dzień fiestyvalu dastupnyja ŭ kinateatry «Biełaruś».
