Brest, 10 žniŭnia. Fota BiełTA

Brest, 10 žniŭnia. Fota BiełTA

Niepaŭnaletnija Siarhiej Hackievič i Dzianis Chaziej atrymali pa 3 hady vychavaŭčaj kałonii. Siemiarych abvinavačanych adpravili ŭ kałoniju ŭzmocnienaha režymu: Alaksandra Drazdova, Illu Mihno, Cimura Ryzapura — na čatyry z pałovaj hady, Siarhieja Sałochu, Jahora i Vitala Prakapčukoŭ — na 4 hady, Siarhieja Kryŭčeniu — na try z pałovaj.

Dziasiataj abvinavačanaj, 18-hadovaj Vitalii Bandarenka, pakarańnie nie pryznačali. Sudovuju vytvorčaść u dačynieńni da jaje prypynili, bo dziaŭčyna źjechała za miažu. Vitaliju zatrymali ŭ kancy lutaha, kali jana viartałasia ŭ Biełaruś.

Pavodle viersii śledstva, padčas akcyi pratestu ŭ centry Bresta — na vulicach Savieckaj i Naftavaj, bulvarach Šaŭčenki i kasmanaŭtaŭ, praśpiekcie Mašerava — abvinavačanyja hruba parušyli hramadski paradak i ŭčynili pahromy. Paśla čaho nanieśli supracoŭnikam milicyi ŭdary rukami i nahami, roznymi pradmietami. U chod dla hetaha išli doški, pałki, vuličnyja skryni dla śmiećcia, frahmienty łavak, tratuarnaj plitki i asfaltu, butelki, kamiani, jomistaści z farbaj, piratechničnyja vyraby. Zatym abvinavačanyja naŭmysna źniščyli i paškodzili transpartnyja srodki i inšuju majomaść, jakaja naležała milicyi i cyvilnym.

Paciarpiełymi pryznali 29 čałaviek. Ź ich u zale prysutničała siamiora. Adzin na pasiadžeńnie nie źjaviŭsia pa ŭvažlivaj pryčynie: źjechaŭ na vučobu. Astatnija znachodzilisia ŭ asobnym pakoi, na pytańni adkazvali źmienienymi hałasami.

U vyniku biesparadkaŭ adzin supracoŭnik milicyi atrymaŭ lohkaje cialesnaje paškodžańnie: dźvie rany ŭ vobłaści pieršaha palca pravaj kiści. Jašče 25 čałaviek, pa viersii śledstva, atrymali «paboi». Taksama, pa viersii dziaržabvinavaŭcy, abvinavačanyja, «abjadnanyja adzinym złačynnym namieram», sprabavali «prymianić hvałt», «pryčynić cialesnyja paškodžańni» i «nanieści paboi» jašče dvum supracoŭnikam.

Akramia taho, paškodžany milicejski i hramadzianski transpart: lehkavy UAZ, aŭtobus MAZ, aŭtazak, niekalki mikraaŭtobusaŭ Ford i HAZ.

Ahulnaja suma pryčynienaj škody, na dumku śledstva, bolš za 27 tysiač rubloŭ.

Клас
Панылы сорам
Ха-ха
Ого
Сумна
Абуральна