Fota Depositphotos.com
Analiz elektronnych miedycynskich kartak u Kalifornii vyjaviŭ, što 32% nie mieli simptomaŭ na pačatku infiekcyi, ale nastupstvy zaražeńnia ŭ niekatorych ź ich prajaŭlalisia praź niekalki tydniaŭ abo miesiacaŭ, paviedamlaje The New York Times.
Daśledčyki praanalizavali miedycynskija kartki 1407 čałaviek, jakija nie mieli patreby ŭ špitalizacyi, kali test na karanavirus pakazaŭ stanoŭčy vynik. 27% ź ich adčuvali nastupstvy kavidu praz 60 dzion paśla zaražeńnia.
Navukoŭcy vyjavili, što ŭ treci pacyjentaŭ z doŭhaterminovymi postkavidnymi nastupstvami ŭvohule nie było simptomaŭ na pačatku infiekcyi. Pacyjenty adčuvali siabie całkam zdarovymi na praciahu jak minimum 10 dzion paśla taho, jak atrymali stanoŭčy test.
Vyvučeńnie doŭhaterminovych nastupstvaŭ kavidu stanovicca ŭsio bolš pryjarytetnym dla daktaroŭ, bo šmat ludziej paviedamlajuć pra zaciažnyja simptomy karanavirusa, jakija pieraškadžajuć im viarnucca da narmalnaha žyćcia.
Doŭhaterminovyja simptomy zakranajuć usie ŭzrostavyja hrupy, u tym liku dziaciej. Navukoŭcy praanalizavali miedycynskija zapisy 34 dziaciej — 11 ź ich mieli simptomy zaciažnoha kavidu.
Daśledčyki vyłučyli postkavidnyja simptomy, jakija sustrakajucca najčaściej. Siarod ich bol u hrudziach, dychavica, kašal, bol u žyvacie i hałaŭny bol.
Heta daśledavańnie zaciažnoha kavidu adroźnivajecca ad papiarednich tym, što navukoŭcy vyvučali doŭhaterminovyja simptomy tych pacyjentaŭ, jakim nie patrebna była špitalizacyja na pačatku infiekcyi. Adnak jakraz takija pacyjenty ŭsio čaściej źviartajucca pa dapamohu daktaroŭ užo paśla pieraniesienaha karanavirusa.
