Dackija inviestycyjnyja fondy BankInvest, Jyske Invest i Sparinvest pradali ablihacyi, nabytyja pierad vybarami-2020. Pra heta paviedamili adrazu dźvie bujnyja haziety Danii — Berlingske i Børsen.Sumy skłali 54 miljony dackich kron, 10 miljonaŭ dackich kron i 7,5 miljona dackich kron adpaviedna. Ahułam heta kala 10 miljonaŭ jeŭra.
Chto staŭ novym ułaśnikam hetych ablihacyj, pakul nieviadoma.
«Pierad vybarami byŭ niekatory aptymizm u dačynieńni da taho, što vybary ŭ Biełarusi mohuć prajści spraviadliva, ale ŭsio skončyłasia masavymi falsifikacyjami, a paźniej — hvałtam suprać niazhodnych z falsifikacyjami. Voś čamu adrazu paśla vybaraŭ my pačali praces prodažu biełaruskich dziaržablihacyj, jaki całkam skončyŭsia ŭ kastryčniku 2020 hoda», — raspavioŭ pradstaŭnik BankInvest.
«Na hety momant u nas niama biełaruskich dziaržaŭnych ablihacyj. My pačali praces prodažu partfiela jeŭrabondaŭ Biełarusi paśla vybaraŭ u žniŭni 2020, i 4 sakavika zaviaršyli praces. My heta zrabili, pakolki, pavodle našych acenak, situacyja ŭ Biełarusi nie adpaviadaje našym pryncypam inviestavańnia», — patłumačyŭ hienieralny dyrektar Sparinvest.
Ministr zamiežnych spraŭ Danii Jepe Kofad pachvaliŭ inviestfondy, jakija admovilisia ad dziaržablihacyj Biełarusi:
«Ja rady, što hety sihnał byŭ pačuty ŭ šerahu inviestycyjnych asacyjacyj. Liču, što my pavinny prykłaści ŭsie namahańni, kab praduchilić navat nienaŭmysnuju padtrymku złačynstvaŭ režymu Łukašenki».
Narodnaje antykryzisnaje ŭpraŭleńnie praciahvaje kampaniju pa pracy ź inviestycyjnymi fondami, jakija pierad vybarami kupili biełaruskija ablihacyi na $1,2 miljarda. Łatuška i paplečniki davodziać, što atrymanyja hrošy pajšli nie na refinansavańnie źniešniaha doŭhu, jak heta było zajaŭlena ŭ praśpiekcie emisii, a na represii suprać biełaruskaha naroda.
