Fota Depositphotos.com
Usie try vakcyny byli adobranyja ŭradam da zaviaršeńnia kliničnych vyprabavańniaŭ, jakija składajucca z troch faz. Trochfaznaść vyprabavańnia — mižnarodna pryznany navukovy standart, nakiravany na harantavańnie biaśpieki i efiektyŭnaści vakcyn, piša DW.
«Sputnik-V» byŭ adobrany ŭ Rasii jašče ŭ žniŭni 2020, adnak kliničnyja vyprabavańni hetaj vakcyny skončylisia tolki sioleta ŭ lutym.
Jak praviła, vakcyna abo inšy preparat stanoviacca masava dastupnymi tolki paśla taho, jak zaviaršajecca treciaja faza kliničnych vyprabavańniaŭ, jakija musiać pravodzicca niezaležnymi daśledčykami.
Padčas pandemii dazvalajecca paralelna pravodzić vyprabavańni 2 i 3 stadyi, kab paskoryć praces.
Rasija adobryła druhuju vakcynu «Epivakkarona» letaś u kastryčniku, a ŭ lutym rehistracyju prajšła i treciaja vakcyna «KaviVak». Adnak ni pieršaja, ni druhaja jašče nie prajšli kliničnyja vyprabavańni da kanca.
Vakcyna «Epivakkarona» zasnavanaja na chimična sintezavanym antyhienie — heta značyć, što ŭ joj niama žyvoha virusa. Antyhien — heta rečyva, jakoje prymušaje imunnuju sistemu čałavieka vypracoŭvać antycieły suprać virusa.
Vakcyna prajšła pieršuju i druhuju fazy vyprabavańniaŭ, adnak vyniki treciaj fazy čakajucca tolki ŭ mai. Na siońniašni dzień vakcynu adobryli tolki ŭ Rasii i Turkmienistanie.
Vakcynu možna zachoŭvać u standartnych chaładzilnikach. Raniej rasijski ŭrad śćviardžaŭ, što vakcyna pakazała efiektyŭnaść 100% u papiarednich vyprabavańniach.
Nakont vakcyny «KaviVak» zusim mała źviestak u mižnarodnych krynicach. Hetu vakcynu raspracoŭvaje Centr Čumakova, što źjaŭlajecca filijałam Rasijskaj akademii navuk.
Vakcyna ŭklučaje ŭ siabie spajkavyja białki i hienietyčny materyjał virusa. Takaja forma vakcyny adnosna raspaŭsiudžanaja ŭ śviecie.
Pa słovach stvaralnikaŭ, vakcynu možna zachoŭvać pry tempieratury ad 2 da 8 °S, što robić jaje zručnaj dla transpartavańnia.
Rasijskaje infarmacyjnaje ahienctva TASS paviedamlała, što KaviVak možna vykarystoŭvać dla paŭtornaj imunizacyi. Taksama vakcyna prydatnaja dla pažyłych ludziej i ludziej z chraničnymi zachvorvańniami, bo jaje pabočnyja efiekty, jak śćviardžajecca, mienš zaŭvažnyja, čym u inšych vakcyn.
Adnak pytańnie nakont treciaj fazy vyprabavańniaŭ zastajecca adkrytym.
