Deficyt biudžetu na 2021 hod byŭ pavialičany ŭ suviazi z pryniaćciem zakanadaŭčych aktaŭ pa padtrymcy asobnych pradpryjemstvaŭ u pieryjad pandemii. Ciapier zapłanavany deficyt składaje 5,6 młrd rubloŭ, abo 3,5% ad VUP. Refinansavać deficyt płanujecca za košt reštkaŭ srodkaŭ biudžetu minułych hadoŭ i novych dziaržaŭnych zapazyčańniaŭ, paviedamiła namieśnica ministra finansaŭ Volha Tarasievič, vystupajučy na kruhłym stale «pazykovy rynak Respubliki Biełaruś».
U minułym hodzie ŭdałosia «pieravykanać płan pa pryciahnieńni zapazyčańniaŭ», što ŭ spałučeńni z zapazyčańniami na ŭnutranym rynku dazvoliła Minfinu sfarmavać rezierv u pamiery 1 młrd dalaraŭ dla finansavańnia deficytu biudžetu ŭ 2021 hodzie, adznačaje pradstaŭnik Minfina.
— U biahučym hodzie płanujecca pryciahnieńnie paradku 1 młrd dalaraŭ niaźviazanych kredytaŭ. Pałova hetaj sumy budzie pryciahnuta z boku dziaržaŭnaha kredytu Rasijskaj Fiederacyi, akramia jaho praduhledžany inšyja dvuchbakovyja kredyty i ablihacyjnyja vypuski, — zajaviła Volha Tarasievič.
Dla refinansavańnia dziaržaŭnaha doŭhu ŭ 2022 hodzie ŭsiaho płanujecca pryciahnuć 1, 7 młrd dalaraŭ. U pryvatnaści, Minfin pracuje nad raźmiaščeńniem dziaržablihacyj na terytoryi Rasii. U Ministerstvie finansaŭ ličać, što ŭ trymalnikaŭ biełaruskich jeŭrabondaŭ niama ekanamičnych padstaŭ ad ich pazbaŭlacca.
— Hrafik płaciažoŭ pa dziaržaŭnym doŭhu ŭ siarednieterminovaj pierśpiektyvie nosić kiravany charaktar, situacyja z płaciežnym bałansam źjaŭlajecca stabilnaj. Biełaruskija jeŭrabondy zabiaśpiečvajuć inviestaram vysokuju prybytkovaść — ad 5,3% da 7% pa stanie na siaredzinu sakavika. Ekanamičnyja pieradumovy dla prodažu biełaruskich papier adsutničajuć, — zajaviła namieśnik ministra finansaŭ.
