U sudzie Zavodskaha rajona Minska 19 sakavika abviaścili prysud 23-hadovamu inžynieru Mikitu Kočuru, abvinavačanamu pa č. 2 art. 363 Kryminalnaha kodeksa (Supraciŭ supracoŭniku milicyi pry vykanańni, spałučanaje z prymianieńniem hvałtu). Sudździa Anžeła Kaściukievič pryznała Kočura vinavatym i prysudziła jamu 4 hady pazbaŭleńnia voli z adbyvańniem pakarańnia ŭ kałonii ahulnaha režymu. Napiaredadni prakuror Volha Dzindzilevič zaprasiła dla jaho mienavita takoje pakarańnie, paviedamlajuć pravaabaroncy.
Uviečary 11 žniŭnia, kali ŭ Minsku prachodzili akcyi pratestu suprać vynikaŭ prezidenckich vybaraŭ, Mikita Kočur sustreŭsia z bratam i jahonaj žonkaj na vulicy Niakrasava, kab pakazać niadaŭna nabyty matacykł. Brat Kočura z žonkaj i dziećmi pryjechali na mašynie, pryparkavali jaje pobač. Dvoje dziaciej zastalisia siadzieć u mašynie, a darosłyja razmaŭlali pobač kala matacykła. Zatym da ich padjechała milicyja, supracoŭniki DAI padyšli da Kočura i stali patrabavać u jaho dakumienty. Kočur, u svaju čarhu, paprasiŭ supracoŭnikaŭ pradstavicca i pakazać słužbovyja paśviedčańni. U vyniku Mikitu ściahnuli z matacykła, pavalili na ziamlu, źbili dubinkami i zatym pavieźli ŭ RUUS.
Paźniej na Mikitu Kočura zaviali kryminalnuju spravu pa č.2 art. 363 Kryminalnaha kodeksa (Supraciŭ supracoŭnikam milicyi pry vykanańni, spałučanaje z prymianieńniem hvałtu). 20 listapada jaho ŭziali pad vartu. Paciarpiełymi pa kryminalnaj spravie byli pryznanyja načalnik UUS Savieckaha rajona Siarhiej Kalińnik, staršy inśpiektar DAI Savieckaha rajona Jaŭhien Kryvarot, supracoŭniki milicyi Nieviarovič i Nadziožny.
Zhodna z pradjaŭlenym abvinavačańniem, pa patrabavańni supracoŭnikaŭ milicyi Kočur admoviŭsia pradjavić dakumienty i padać da ahladu transpartny srodak (matacykł «Chonda»), taksama admoviŭsia prajści ŭ Savieckaje RUUS dla vyśviatleńnia asoby. Zamiest hetaha jon akazaŭ supraciŭ supracoŭnikam milicyi - šturchaŭ i nanosiŭ udary, parvaŭ adnamu ź ich kašulu. A pałkoŭnik Siarhiej Kalińnik ŭpaŭ ad šturška Kačura i atrymaŭ traŭmu łokcia.
Mikita Kočur svajoj viny ŭ złačynstvie nie pryznaŭ.
Paśla daśledavańnia materyjałaŭ spravy prakuror Volha Dzindzilevič zaprasiła dla Kočura čatyry hady kałonii, ličačy jaho vinu całkam dakazanaj. Sudździa Anžeła Kaściukievič vyniesła mienavita takoje rašeńnie. Taksama pa rašeńni suda Kočur pavinien vypłacić paciarpiełamu Kalińniku 7500 rubloŭ kampiensacyi, a taksama pakryć pracesualnyja vydatki.
