Kurs tureckaj liry ŭpaŭ na 17% adnosna dalara paśla taho, jak prezydent krainy Redžep Erdahan zvolniŭ staršyniu Centralnaha banku krainy. U niadzielu hazeta Financial Times paviedamlała pra padzieńnie kursu na 14%, ale rankam paniadziełka źnižeńnie praciahnułasia, piša ŭkrainskaja słužba «Radyjo Svaboda» sa spasyłkaj na tureckija ŚMI.
U pačatku tarhoŭ 22 sakavika ŭ Azii tureckaja valuta była ŭžo na ŭzroŭni rekordna minimalnaha kursu — 8,36 liry za 1 dalar (u paraŭnańni z 7,21 u kancy minułaha tydnia). Taki spad pahražaje maštabnym kryzisam u valucie i płaciežnym balansie, bo niekatoryja miascovyja banki ŭžo prypynili abmien valuty i zołata.
Erdahan zvolniŭ staršyniu Centralnaha banku Nadžy Ahbału ŭviečary 19 sakavika, pryznačyŭšy na pasadu kolišniaha ministra finansaŭ Sachapa Kaŭcyahłu. Heta vyklikała zaniepakojenaść investaraŭ z nahody palityčnaha ŭmiašańnia ŭ hrašova-kredytnuju palityku.
Nieviadoma, što stała pryčynaj rašeńnia, ale Erdahan pryniaŭ jaho na nastupny dzień paśla taho, jak Centrabank rezka pavysiŭ klučavuju pracentnuju staŭku — treci raz za piać miesiacaŭ, z 17% da 19%.
Finansavyja rynki stanoŭča adreahavali na rost pracentnych stavak, ale heta supiarečyć punktu hledžańnia Erdahana ab tym, što bolš vysokija pracentnyja staŭki vyklikajuć inflacyju. U toj čas jak amal usie ekanamisty schodziacca ŭ dumcy, što pavyšeńnie pracentnych stavak zapavolvaje inflacyju.
Słabaść liry moža pahoršyć inflacyju, bo Tureččyna zaležyć ad impartu enerhii i tavaraŭ pa cenach u dalarach dla svajho pramysłovaha sektaru.
