U sieradu, 17 sakavika, Siarhieja Piechcierava zatrymali. Jon paśpieŭ paviedamić siabru, što jaho zabirajuć u RAUS, uviečary mahiloŭca adpuścili. Tady ŭ Siarhieja kanfiskavali aŭtamabil, pracoŭny kampjutar i telefon z-za BČB-nalepki na mašynie. Kanfiskacyju matyvavali nieabchodnaściu ahladu ŭ ramkach administracyjnaj spravy, rastłumačyŭ Piechcieraŭ.
Na dumku Siarhieja, milicyja znoŭ zaniałasia im z-za telehram-kanała LOSQUE, u jakim jon publikuje infarmacyju. «Ja dumaju, heta ŭsio z-za pablika. Začyščajuć infarmacyjnyja kanały pierad Dniom Voli. Dumaju, u mianie zabrali telefon i kampjutar, kab ja nie moh niešta pościć», — miarkuje Siarhiej.
U svaim instagram-akaŭncie jon taksama napisaŭ, što paśla aryštu ŭ vieraśni — Piechcieravu dali 14 sutak pa art 23.34 KaAP RB — jaho čatyry razy «ciahali ludzi ŭ pahonach».
— Choć ja ničoha nie rabiŭ. Nie znachodziŭsia ŭ dvarovych čatach, nie «psavaŭ ścieny», nie raspaŭsiudžvaŭ haziety, nie spyniaŭ ciahniki, nie raskidvaŭ šruby pad RAUS, nie zaklikaŭ praz LOSQUE vychodzić na maršy i błačyŭ usie takija zakliki. Usia maja postvybarnaja aktyŭnaść była nakiravana na dapamohu ludziam i na raźvićcio horada (jak i raniej). Pracavać, zarablać i płacić padatki ŭ Biełarusi stała niemahčyma. Ja — «lišni».
Siarhiej napisaŭ taksama, što jon vierniecca. Adjezd ža, jak mahiloviec rastłumačyŭ Tut.by, byŭ vymušanaj mieraj biaśpieki.
Siarhiej Piechcieraŭ — ajcišnik i adzin z samych jarkich aktyvistaŭ novaj chvali ŭ Mahilovie. U 2019 hodzie jon razam z prajektam manitorynhu čyścini pavietra Pavetra.Online dajšoŭ da finału respublikanskaha konkursu sacyjalnych prajektaŭ Social Weekend.
Uviesnu 2020 hoda Piechcieraŭ razam z tavaryšam Antonam Turko zapuściŭ interaktyŭnuju anłajn-kartu ŭ padtrymku biełarusaŭ, jakija advažylisia na samaizalacyju ŭ razhar pieršaj chvali epidemii karanavirusa.
U žniŭni 2020 hoda dapamahaŭ rodnym i blizkim tych, chto trapiŭ u Mahiloŭski IČU.
U studzieni 2021 hoda narodnym hałasavańniem mahiloŭcy vybrali jaho i stvaralnika prajekta DRONNY Andreja Muzarava «ludźmi hoda — 2020».
