Pytańnie ab pazbaŭleńni peŭnych asob voinskich i śpiecyjalnych zvańniaŭ inicyjavali kiraŭniki siłavych viedamstvaŭ «z ulikam charaktaru i stupieni ciažkaści ŭčynienych supraćpraŭnych dziejańniaŭ», piša Tut.by.
U pres-słužbie Alaksandra Łukašenki tłumačyli pryčyny, pa jakich eks-siłavikoŭ pazbavili zvańniaŭ: «U pieryjad abvastreńnia hramadska-palityčnaha stanovišča ŭ krainie z metaj jaje destabilizacyi asobnyja vajskoŭcy i supracoŭniki nahniatali pratesnyja nastroi ŭ hramadstvie, arhanizoŭvali i ŭdzielničali ŭ niesankcyjanavanych mierapryjemstvach, raźmiaščali ŭ sietcy Internet ekstremisckija materyjały, zaklikali da radykalnych dziejańniaŭ, publikavali asabistyja danyja dziaržaŭnych słužačych, žurnalistaŭ, supracoŭnikaŭ pravaachoŭnych orhanaŭ, vystupali z abvinavačvańniami, abrazami i pahrozami ŭ ich adras. Dyskredytujučy honar i hodnaść vajskoŭca i supracoŭnika, prajaŭlali niepavahu da dziaržaŭnych simvałaŭ, vykidali słužbovyja paśviedčańni, zdymali pahony, admaŭlalisia ad vykanańnia słužbovych abaviazkaŭ».
Voinskich zvańniaŭ pazbaŭlenyja pałkoŭnik i padpałkoŭnik u adstaŭcy, 5 padpałkoŭnikaŭ zapasu, 2 majora zapasu, 8 kapitanaŭ zapasu, 10 kapitanaŭ justycyi zapasu, staršy lejtenant justycyi zapasu, lejtenant i praparščyk zapasu.
Śpiecyjalnych zvańniaŭ pazbaŭlenyja 2 pałkoŭniki milicyi zapasu, 10 padpałkoŭnikaŭ milicyi zapasu, 8 majoraŭ milicyi zapasu, 9 kapitanaŭ milicyi zapasu, 11 staršych lejtenantaŭ milicyi zapasu, 2 lejtenanta, praparščyk i staršyna milicyi zapasu, 3 staršyja siaržanty milicyi zapasu, staršy siaržant unutranaj słužby zapasu, padpałkoŭnik justycyi zapasu, major justycyi zapasu, 4 kapitana justycyi zapasu, 2 staršyja lejtenanty justycyi zapasu.
Siarod proźviščaŭ jość tyja, jakija ŭžo nie raz za apošnija miesiacy sustrakalisia ŭ navinach. Naprykład, były śledčy Jaŭhien Juškievič, jaki 19 krasavika hetaha hoda pierastaŭ vychodzić na suviaź, a paźniej vyśvietliłasia, što jon u SIZA KDB.
Pa słovach advakata, svajakam pakazali pastanovu na pieratrus, dzie paznačany artykuł 289 KK (Akt teraryzmu). Raniej jaho zatrymlivali 24 listapada. Tady jamu zajavili, što jon źjaŭlajecca padazravanym pa č. 1 art. 342 KK (Arhanizacyja i padrychtoŭka dziejańniaŭ, jakija hruba parušajuć hramadski paradak, albo aktyŭny ŭdzieł u ich).
Eks-načalnik DAI Siarhiej Masłoŭski pazbaŭleny śpieczvańnia pałkoŭnika milicyi zapasu. 11 kastryčnika 2020 hoda jaho zatrymali za ŭdzieł u niadzielnym maršy. Jamu dali 15 sutak aryštu, na nastupny dzień paśla suda jon na chutkaj trapiŭ u špital z padazreńniem na insult, udarami i hiematomami. Pa zakančeńni aryštu na volu nie vyjšaŭ, jaho zatrymali znoŭ, užo za niepadparadkavańnie ŭčastkovamu, i taja ž sudździa «vypisała» jašče 15 sutak.
Stanisłaŭ Łupanosaŭ byŭ u zvańni padpałkoŭnika milicyi zapasu. U kancy sakavika hetaha hoda HUBAZiK raspavioŭ pra «krata». U MUS zajavili, što vykryli Łupanosava.
U dačynieńni da jaho raspačataja kryminalnaja sprava, jaho abvinavačvajuć u zamachu na akt teraryzmu, učynieny arhanizavanaj hrupaj (č. 1 art. 14 i č. 3 art. 289 KK RB).
U śpisie šmat proźviščaŭ tych eks-siłavikoŭ, jakich dziaržava nazvała datyčnymi da terarystyčnaj dziejnaści, naprykład, Andrej Astapovič, Ihar Łoban, Ihar Makar i inšyja.
Siarod pazbaŭlenych zvańniaŭ — byłyja pałkoŭnik i padpałkoŭniki ŭ adstaŭcy Uładzimir Baradač, Siarhiej Aniśka i Valeryj Kostka. Były kamandzir bryhady śpiecnaza ŭ Marjinaj Horcy Uładzimir Baradač i supracoŭnik KDB Valeryj Kostka ŭvachodzili ŭ hramadskuju kamisiju pa rasśledavańni źniknieńnia eks-ministr unutranych spraŭ Juryja Zacharanki. Siarhiej Aniśka źjaŭlajecca byłym supracoŭnikam kontrvyviedki.
Fiodar Kandziranda byŭ staršym vykładčykam ahulnavajskovaha fakulteta Vajskovaj akademii. 13 žniŭnia jon padaŭ rapart na zvalnieńnie. Jon pazbaŭleny zvańnia padpałkoŭnika zapasu, jak i Siarhiej Biendzia, Dźmitryj Pratasievič, Siarhiej Šałyhin, Siarhiej Špak.
Major zapasu Alaksandr Isačenka zvolniŭsia z armii paśla žnivieńskich padziej. Ciapier jon pazbaŭleny zvańnia.
Usiaho ŭ śpisie 87 proźviščaŭ. Poŭny śpis apublikavany tut.
