Skrynšot ź videa MUS
Siarhieja zatrymali 24 sakavika, da suda jon byŭ źmieščany ŭ Homielskaje SIZA, piša spring96.org.
Dziecuk — syn eks-vykładčycy Biełaruskaha dziaržaŭnaha ŭniviersiteta, jakuju sudzili za fota z BČB-ściaham.
5 sakavika da Valeryi Dziecuk pryjšli z ahladam kvatery. Pavodle infarmacyi MUS, 28 lutaha kala vioski Asaŭcy niekalki žančyn praviali pikiet z BČB-ściahami i płakatam z nadpisam «Zmaharki ŭsiaho śvietu! Vinšujem Vas sa śviatam 8 Sakavika».
Svoj telefon žančyna addavać milicyjantam nie chacieła, na abaronu maci staŭ 35-hadovy syn Siarhiej, jaki ŭ toj čas znachodziŭsia doma.
Siarhiej kazaŭ tady «Radyjo Svaboda», što jaho amapaŭcy adnieśli ŭ inšy pakoj, dzie ź im razmaŭlaŭ nieviadomy, jaki pradstaviŭsia načalnikam adździeła.
«Jon skazaŭ, što asabista za nas uziaŭsia, i my ŭsie budziem siadzieć. Za što — niezrazumieła… U IČU, dzie jana ciapier znachodzicca, ad mianie ŭziali tolki ciopłuju vopratku — pradukty admovilisia brać», — dadaŭ Siarhiej.
U pres-słužbie MUS paviedamili, što syn ahresiŭna adreahavaŭ na źjaŭleńnie supracoŭnikaŭ, abražaŭ ich i pahražaŭ hvałtam. Paźniej mužčyna supakoiŭsia, ale materyjały pravierki adpravili śledčym.
Sud raspačaŭsia 29 červienia, adnak padrabiaznaj infarmacyi pra sudovy praces u pravaabaroncaŭ pakul niama.
Siońnia sudździa Viktar Kazačok vynies prysud Siarhieju Dziecuku — try hady pazbaŭleńnia voli ŭ kałonii ahulnaha režymu.
