Dvanaccaty tur čempijanatu Biełarusi pa futbole jašče bolš zamacavaŭ na viaršyni barysaŭski BATE. Ciapier jaho adryŭ składaje astranamičnyja jak dla takoha adrezku pieršynstva 11 punktaŭ.

U centralnym matčy turu barysaŭcy doma z bujnym likam pieramahli žodzinskaje «Tarpieda». Pieršy hoł zabiŭ Siarhiej Kryviec, a potym dublem adznačyŭsia vunderkind Maksim Skavyš.

Minskaje «Dynama» dosyć niečakana sastupiła ŭ Ždanovičach «Homielu» — 1:2. Dubl u pieramožcaŭ aformiŭ brazilski lehijanier Renan Bresan, adzin z najlepšych hulcoŭ sioletniaha pieršynstva.

Druhi pradstaŭnik Biełarusi ŭ Lizie Jeŭropy MTZ‑RIPA taksama prajhraŭ «Niomanu», z tym samym likam — 1:2.

Paradavaŭ tolki navapołacki «Naftan», jaki ŭ haściach adužaŭ mikaševicki «Hranit» — 2:0. Abodva hały na rachunku abaroncy Dźmitryja Viarchoŭcava. Mabyć, stanoŭča adbiŭsia toj fakt, što za minułaj hulnioj chłopca nazirali kupcy z francuzskaha «Vałanśjena».

A na druhoje miesca dosyć niečakana vybiŭsia mahiloŭski «Dniapro». Kamanda ŭ haściach pieramahła aŭtsajdera «Smarhoń».

Bresckaje «Dynama» taksama sastupiła doma. «Minsku» — 1:2. Paśla hulni ŭ adstaŭku padaŭ hałoŭny trenier bresckaj kamandy Jaŭhien Traciuk. Nieviadoma tolki ci jaje prymuć.

Pastupova vybirajecca ź jamy salihorski «Šachcior». «Harniaki» ź minimalnym likam 1:0 vyjhrali ŭ «Viciebska».

Turnirnaja tablica paśla 12 turaŭ vyhladaje nastupnym čynam:

BATE — 31 punkt, «Dniapro» — 20, «Dynama» (Minsk), «Dynama» (Brest), «Tarpieda», «Nioman», «Naftan» — pa 19, «Homiel» — 18, «Šachcior» — 17, «Minsk» — 15, MTZ‑RIPA — 14, «Hranit» — 11, «Viciebsk» — 10, «Smarhoń» — 5.

Najlepšy bambardzir Maksim Skavyš (BATE) — 10 hałoŭ.

Клас
Панылы сорам
Ха-ха
Ого
Сумна
Абуральна

Chočaš padzialicca važnaj infarmacyjaj ananimna i kanfidencyjna?