Pravaachoŭnyja orhany prypynili śledctva pa spravie ab raskopkach dźviuch kurapackich pachavańniaŭ. Nie znajšli vandałaŭ.
6 lipienia prypynienaje raśśledavańnie kryminalnaj spravy pa fakcie apahańvańnia nieviadomymi dźviuch pachavańniaŭ u Kurapatach, pra heta BiełaPAN paviedamiŭ staršy daznavalnik UUS Minskaha abłvykankama Siarhiej Polak.
Pavodle jaho słoŭ, pryčyna ŭ tym, što «nie byli ŭstanoŭleny asoby, jakija padlahajuć pryciahnieńniu da adkaznaści ŭ jakaści abvinavačanych». Razam z tym, jak zaznačyŭ supracoŭnik milicyi, sprava budzie adnoŭlena ŭ vypadku vyjaŭleńnia asob, jakija majuć dačynieńnie da złačynstva.
2—3 krasavika hetaha hoda ŭ Kurapatach niepadalok ad hałoŭnaj alei, jakaja viadzie ad Kryža pakut da najvyšejšaha punkta ŭročyšča, byli raskapanyja dva masavyja pachavańni achviar palityčnych represijaŭ časoŭ Stalina. Złačyncy pakinuli na piasku astanki ludziej, a taksama reštki ich adzieńnia i abutku. Pa hetym fakcie 4 krasavika UUS Mienskaha rajvykankamu była raspačataja sprava. 7 krasavika sprava była pieradadzienaja va UUS Mienskaha abłvykankama.
U Kurapatach nie raz učynialisia akty vandalizmu, i tolki adnojčy złačyncy byli ŭstanoŭlenyja. 30 maja 2009 hoda dvoje niepaŭnaletnich mienčukoŭ — navučency škoły i praftechvučylišča, abvinavačanyja ŭ źniščeńni pamiatnych kryžoŭ u Kurapatach, byli amnistavany śledztvam da suda. A ŭ siaredzinie červienia Baraŭlanski adździeł Minskaha RUUS prypyniŭ jašče adnu kryminalnuju spravu pa fakcie źniščeńnia nieviadomymi šaści pamiatnych kryžoŭ u Kurapatach.
