Pracoŭnaja bijahrafija Ivanova nasyčanaja: jon pačynaŭ z zaatechnika ŭ kruhlanskim kałhasie «Kastryčnik», išoŭ pa sielskich haspadarkach, padniaŭsia da kiraŭnika viekapomnaha «Rasśvieta» u Kiraŭskim rajonie — adzin z samych paśpiachovych kałhasaŭ jašče za Sajuzam. Potym kiravaŭ Kiraŭskim vykankamam, potym — Škłoŭskim. Mienš za hod byŭ namieśnikam kiraŭnika Administracyi prezidenta, namieśnikam śpikiera Pałaty pradstaŭnikoŭ, sienataram, vice-hubiernataram Minskaj vobłaści, vice-premjeram, kiraŭnikom Biełaruskaj kalijnaj kampanii, urešcie, kiraŭnikom Biełkaapsajuza. Ale što možna skazać pra jaho šyrej za aficyjnuju daviedku? 

«Kuryravaŭ» maci i žonku Łukašenki 

Valeryj Ivanoŭ byŭ staršynioj Škłoŭskaha vykankama ŭ časy (2004-2008), kali była jašče žyvaja maci Łukašenki. Zrešty, pieršaja ledzi, Halina Łukašenka, taksama pracavała i dahetul pracuje ŭ Škłovie. Dla luboha kiraŭnika horada heta byŭ śviaty abaviazak — «pryhladvać» za hetymi žančynami.

Što heta značyć? Nu, naprykład, arhanizavać usio tak, kab pryvieźli drovaŭ, pakasili siena, prapałoli buraki, dapamahli prybrać uradžaj u vialikaj haspadarcy, to bok dapamahčy tam, dzie adna žančyna dakładna nie daść rady. I chacia hety fakt Ivanoŭ nie vypiačvaje, ale ŭ čynavienskich kołach ličycca, što voś hety dahlad značna ŭmacavaŭ davier da Ivanova, mocna paspryjaŭ jahonaj karjery.

Daŭno znajomy z Łukašenkam asabista

U adroźnieńnie ad Šejmana, Ivanoŭ nikoli nie vykonvaŭ hučnych palityčnych zadač, tolki tamu i nie byŭ viadomy šyrokaj aŭdytoryi. Ale abaznanyja prypisvajuć jamu z Łukašenkam daŭniaje znajomstva: usiaho hod roźnica va ŭzroście, raśli pobač, vučylisia ŭ adnym VNU — Ivanoŭ skončyŭ horackuju sielhasakademiju ŭ 1983, Łukašenka — u 1985-m. 

Kali pahladzieć videa pryznačeńnia, možna pabačyć, što pry ŭvachodzie u kabiniet Łukašenki i siedziačy pierad im Ivanoŭ vočy dołu nie apuskaje i słovy ŭ sšytak nie zapisvaje: siadzić prama, hladzić u vočy. 

Paźbiahaŭ palityki i nie dabyŭ svaje deputackija kadencyi

Ivanoŭ byŭ deputatam parłamienta - i nižniaj, i vierchniaj pałataŭ. U Pałacie pradstaŭnikoŭ jon navat byŭ namieśnikam śpikiera, vystupaŭ z zajavami ŭ Jeŭropie, ale ciahaciŭsia svajoj rollu, lubiŭ padkreślivać, što jon «čysty haspadarnik». U vyniku ni ŭ Pałacie, ni ŭ Saviecie Respubliki da kanca svaich kadencyj nie dabyŭ: jaho to pryznačyli namieśnikam staršyni abłvykankama, to vice-premjeram. 

Zakon zabaraniaje čynoŭniku być jašče i «pradstaŭnikom naroda», tamu z parłamienckich orhanaŭ jamu prychodziłasia sychodzić. 

Ź jaho imiem źviazanaja tolki adna hučnaja palityčnaja historyja: «Biełkaapsajuz», jakim jon kiravaŭ, vydaŭ Anžalicy Ahurbaš, jakuju raniej caniŭ Łukašenka, futry kansihnacyjaj.

Ciapier ža praz sud patrabujuć viarnuć hrošy, imavierna, bo palityčnaja pazicyja śpiavački ciapier mocna źmianiłasia.

Nie nadta aktyŭničaŭ u Minskim abłvykankamie

Jaho dziejnaść u abłvykankamie nazyvajuć cichaj, biez pakazuchi.

Pad pakazuchaj majecca na ŭvazie zvykły styl udarnaha kiravańnia, ułaścivy ŭpraŭlencam «sytych hadoŭ», kali abłvykankam nabiraŭ dziaržaŭnych kredytaŭ, ładziŭ na ich niejkija mieha-prajekty, jakija prezientavalisia «navierch» i ŭ ŚMI jak ambicyjna-paśpiachovyja, potym jany pravalivalisia, ale razhrabać prablemy z kredytami davodziłasia ŭžo nastupnym kiraŭnikam.

Kažuć, Ivanoŭ byŭ praciŭnikam takich praktyk: lepš nie vypiačvacca, čym rabić dla pompy, a potym raschlobvać. 

Syn Valeryja Ivanova — načalnik mytni

Siarhiej Ivanoŭ uznačalvaje Mahiloŭskuju abłasnuju mytniu. Kažuć, baćka nie staŭ dapamahać jamu ź pieravodam u Minsk, chacia i moh. 

Pryjšoŭ u «Biełaruśkalij» u časy razychodu z «Urałkalijem» 

Niekali «Biełaruśkalij» i «Urałkalij» pradavali sol praz sumiesnaha trejdara ZAT «Biełaruskaja kalijnaja kampanija», ale ruskich pierastali zadavalniać umovy, tady atrymaŭsia vialiki skandał z aryštam Uładzisłava Baumhiertniera. I aktyŭnaść Ivanova pryjšłasia na toj čas, kali raniejšyja kantrakty stali sypacca. 

Zadača Ivanova była ŭ tym, kab pierajhrać ekspartnyja kantrakty, naładzić novyja schiemy zbytu. Ci spraviŭsia Ivanoŭ? Kažuć, mnohija ŭ śviecie chacieli pažyvicca za košt pasvaranaha pradpryjemstva i prapanoŭvali adnaŭlać pastaŭki na svaich, ekstravahantnych umovach, pa simvaličnych cenach, ale z premijaj dla čałavieka, jaki prymaje rašeńni. Jak ličać mieniedžary tych časoŭ, u Ivanova atrymałasia nie pajści na karupcyjnyja ŭhody i adnavić pastaŭki na svaich umovach, ale pa nižejšych cenach, čym tyja, pa jakich pradavali raniej. 

Užo kiravaŭ padobnaj Kiraŭnictvu spravami arhanizacyjaj

«Biełkaapsajuz», jakim Ivanoŭ kiravaŭ z 2013 hoda, možna z naciažkaj paraŭnać z Kiraŭnictvam spravami prezidenta, tolki mienš udałym. Heta taksama vialikaja, razhalinavanaja arhanizacyja, jakaja navat maje svoj univiersitet u Homieli. Jak i Kiraŭnictva spravami, «Biełkaapsajuz» taksama źjaŭlajecca vialikim apierataram nieruchomaści.

Možna pryhadać, što ŭ rańni postsaviecki čas paŭdziaržaŭnyja i dziaržaŭnyja arhanizacyi, razumiejučy, što sami jany zarablać ničoha nie mohuć, a ludzi raźbiahajucca, pačali zarablać na adzinym, što było — na zdačy pamiaškańniaŭ u arendu. Z časam bolšaść raźlikaŭ za hetyja pamiaškańni paciakli nie na rachunki pradpryjemstvaŭ, a na rachunki Upraŭleńnia spravami, ale voś u Biełkaapsajuza zastałosia šmat svajho, ciapier jany heta raspradajuć i zdajuć u arendu

Ale asnoŭny, tradycyjny vid dziejnaści «Biełkaapsajuza» — heta zabieśpiačeńnie praduktami žycharoŭ sielskaj miascovaści, narychtoŭka resursaŭ tam ža.

Ci staŭ u hetaj śfiery Ivanoŭ paśpiachovym? Tut, imavierna, pośpiechaŭ ŭ pryncypie damahčysia składana praz strukturu arhanizacyi raboty. Usie łakalnyja «Biełkaapsajuzy», jak toj kazaŭ, słuhi dvuch panoŭ: vykanaŭčaj ułady na miescy i «centra», rajonny ci abłasny dyrektar vymušany dahadžać abodvum.

Samo paniaćcie kaapieracyi ŭ nas vielmi mocna pierakručana. Kali ŭziać umoŭnuju Italiju, to tam haspadary-kaapieratary abjadnoŭvajucca i dyktujuć svaje ŭmovy pastavak pradaŭcam, stanoviacca bahatymi ludźmi, a što moža dyktavać biełaruski fiermier biez ułasnaści? Aničoha.

Kali dadać siudy toje, što ŭ kožnaha rajonnaha filijała svaje rachunki, to pytańnie kantrolu za ŭsioj strukturaj stanovicca vielmi ciažkim, čas ad času ŭspłyvajuć skandały z adkatami, za jakija sadziać ludziej. Tak, byŭ asudžany papiarednik Ivanova, Siarhiej Sidźko na 12 hod trapiŭ za kraty za karupcyju.

Клас
0
Панылы сорам
0
Ха-ха
0
Ого
0
Сумна
0
Абуральна
0