Dakumienty na biaspłatnaje navučańnie prymajuć da 7 žniŭnia. Zastałosia siem biudžetnych miescaŭ na nastaŭnikaŭ matematyki i infarmatyki, 15 — bijałohii i chimii.
«Kali b tolki mazyrski ŭniviersitet, heta było b paŭbiady. Ale biudžetnyja miescy na piedahahičnych profilach nie zapoŭnieny va ŭsich VNU — u Minsku, Breście, Homieli, Mahilovie, Viciebsku», — kamientuje situacyju viadomy repietytar, zasnavalnik adukacyjnaha centra «100 bałaŭ» Jaŭhien Liviant.
Voś niekalki ličbaŭ. U Bresckim dziaržuniviersitecie imia Puškina na 22 miescy pa śpiecyjalnaści «fizika i infarmatyka» było padadziena 8 zajaŭ. U homielskim dadatkovy nabor na fiziku składaje šeść čałaviek.
Jaŭhien Liviant kaža, što nie šakavany. Jašče vosiem hod tamu jon źviartaŭ uvahu na prablemu.
«Z taho času kolkaść biudžetnych miescaŭ źmienšyłasia — i ŭsio adno niedabor. U 2012 hodzie było 265 miescaŭ na vykładčykaŭ fiziki i matematyki ŭ pieduniviersitecie ŭ Minsku. U 2021-m — 110 miescaŭ, — pryvodzić jon ličby. — U mnohich škołach užo niama nastaŭnikaŭ fiziki i matematyki. Baćki raskazvajuć, jak u dziaciej čverciami zamianiajuć inšyja vykładčyki ci naohuł staršakłaśniki».
Kali zajści na sajt upraŭleńniaŭ adukacyi Minska, možna ŭbačyć šmat vakansij. U Frunzienskim rajonie nastaŭnikaŭ matematyki nie chapaje ŭ 15 škołach, fiziki — u 8. U Zavodskim heta 10 i 6 škoł adpaviedna. Z ulikam taho, što ŭ škołach zvyčajna adzin-dva vykładčyki fiziki, padmieny moža i nie być.
Što dalej rabić z abituryjentami, jakija ledź adoleli paroh na CT, vialikaje pytańnie.
«Navat kali ich dabiaruć, paśla ŭsio adno adličać. Ci buduć malavać im adznaki. Vučniaŭ, jakija nabrali mienš za 60 bałaŭ pa matematycy, nielha puskać u VNU. Nie tamu, što ja taki radykał. Jany prosta ničoha nie zmohuć zrazumieć, moj vopyt pracy heta pakazvaje. A kab spraŭlacca z vyšejšaj matematykaj, pavinna być ad 70 bałaŭ na CT».
Ekśpiert charaktarazuje situacyju jak «blizkuju da katastrofy». Nie chapaje nastaŭnikaŭ pa matematycy i fizicy jašče i tamu, što takim śpiecyjalistam kudy praściej padacca ŭ IT, dzie zarobki nieparaŭnalna vyšejšyja za školnyja.
