ZŠA, Vialikabrytanija, Kanada i krainy ES uviali sankcyi suprać režymu Alaksandra Łukašenki paśla falsifikacyj na vybarach 2020 hoda i hvałtoŭnaha padaŭleńnia pratestaŭ. Sankcyi nakiravanyja nie tolki na čynoŭnikaŭ, ale i na biznesoŭcaŭ, jakija padtrymlivajuć Łukašenku. Adnak sankcyi nie buduć mieć nijakaha sensu, kali ŭłady Biełarusi atrymajuć kala adnaho miljarda dalaraŭ reziervovych aktyvaŭ ad Mižnarodnaha valutnaha fondu, miarkuje redakcyja The Washington Post.
ZŠA i ich sajuźniki ŭžo ŭviali sankcyi, jakija abmiažoŭvajuć krynicy zachavańnia ŭłady dla Łukašenki. Bajden i Borys Džonsan niadaŭna asabista sustrakalisia ź Cichanoŭskaj i vykazali svaju padtrymku demakratyčnamu ruchu Biełarusi. Ale hetaha mała, jak ličyć redakcyja The Washington Post.
23 žniŭnia MVF, jaki składajecca sa 190 členaŭ, raźmiarkuje 650 miljardaŭ dalaraŭ u vyhladzie Śpiecyjalnych pravoŭ zapazyčańnia (SPZ). Hetyja reziervovyja aktyvy musiać zabiaśpiečyć ekanamičnuju padtrymku krainam, jakija mocna paciarpieli ad kavidu i majuć vialikuju źniešniuju pazyku. Heta najvialikšyja SPZ za ŭsiu historyju fondu, jakija raźmiarkoŭvajucca ŭ adpaviednaści z pamieram ekanomiki krain.
Niekatoryja aŭtarytarnyja ŭrady, takija jak Rasija, Kitaj i Iran, atrymajuć hrošy, bo ich ułada pryznajecca inšymi dziaržavami. Adnak Vieniesueła, naprykład, finansavuju padtrymku nie atrymaje, bo bolšaść krain pryznaje zakonnym prezidentam nie Madura, a lidara apazicyi Huajdo. Nie atrymaje hrošy i Mjanma, dzie ŭładu ź lutaha hetaha hoda zachapiła vajennaja chunta. Ale Biełaruś usio ž moža raźličvać na srodki ad MVF, bo jość šerah krain, jakija ŭsio jašče pryznajuć uładu Łukašenki.
The Washington Post piša, što «hetyja hrošy stanuć mocnym stymułam dla režymu Biełarusi, u jakoj usiaho 7,4 miljarda dalaraŭ mižnarodnych reziervovych aktyvaŭ, dzie 3 miljardy — u zamiežnaj valucie».
ZŠA źjaŭlajucca najbujniejšymi akcyjanierami MVF, i ich hołas maje značnuju vahu ŭ raźmierkavańni srodkaŭ. Adnak, kab całkam pierakryć finansavuju dapamohu režymu Łukašenki, Bajdenu treba mabilizavacca ź jeŭrapiejskimi i inšymi sajuźnikami, kab spynić finansavańnie dyktatury. Dapamoha Biełarusi ad MVF značna asłabić uździejańnie sankcyj, padkreślivajecca ŭ materyjale aŭtarytetnaha amierykanskaha vydańnia. Aŭtary nastojvajuć: «Usie, chto choča, kab u Biełarusi pieramahła demakratyja, musiać praciahvać cisk i spynić nieapraŭdanaje vyłučeńnie srodkaŭ režymu».
