«Šmat chto pačnie kazać, što ŭ nas u biudžecie hrošaj nie chapaje, tamu my pra padatki zahavaryli, — vykazaŭsia Alaksandr Łukašenka, — Heta zvyčajnyja zajavy našych «śviadomych» pratestunoŭ. Absalutna nie. Jakraz dziŭna, ale biudžet składvajecca lepš navat, čym my dumali, lepš, čym mahło b być».
Kankretnych ličbaŭ i tłumačeńniaŭ, čamu ž situacyja ŭ biudžecie składvajecca lepš, čym čakałasia, publična nie ahučyli. Pry hetym navinaŭ ad Minfinu pra źmianšeńnie deficytu biudžetu taksama pakul nie było.
«Mahu skazać, što ŭsio idzie pa płanie, — adznačaje kiraŭnik prajekta «Košt urada» ekanamist Uładzimir Kavałkin. — Tolki voś płan u nas z deficytam u 6 miljardaŭ rubloŭ. Tolki za pieršaje paŭhodździe minus 1,6 miljardy. Heta vializny deficyt. I samaje hałoŭnaje — niezrazumieła, dzie ŭziać hetyja hrošy. Reziervaŭ na heta asabliva niama.
Łukašenka z adnaho boku ličyć, što ŭsio dobra ź biudžetam, ale z druhoha pravodzić naradu pa pytańni, dzie ŭziać hrošy na ramont infrastruktury — mastoŭ i daroh. Jon załazić u svoj prezidencki fond, kab zapłacić biudžetnikam. Tak što kali hlanuć na abjektyŭnyja ličby, to možna pabačyć, što hrošaj u biudžecie na biahučyja patreby nie chapaje. I pazyku davać Biełarusi pakul nichto nie źbirajecca, prynamsi Zachad».
Ekanamist adznačaje, što pakul nielha navat skazać, układziecca biudžet u 6 miljardaŭ deficytu ci nie. Bo hety prahnoz byŭ źviarstany viasnoj, jašče da ŭviadzieńnia dvuch apošnich pakietaŭ zachodnich sankcyjaŭ.
«My da kanca nie viedajem, jakija sankcyi i kali buduć uviedzienyja i jak jany spracujuć. Tamu na biahučuju situacyju akramia žadańniaŭ Łukašenki i Minfinu vielmi ŭpłyvaje hety źniešni faktar, — adznačaje jon. — My viedajem, što vosieńniu płanujecca ŭvieści jašče adzin pakiet sankcyjaŭ, z boku ZŠA. I jany mohuć pavialičyć deficyt biudžetu. Asabliva, kali my kažam pra kalijnuju i naftavuju haliny. U hetym vypadku my kažam pra vypadajučyja dachody ad źniešniehandlovych mytaŭ. Heta, viadoma, moža pavialičyć deficyt».
Dadatkovyja prablemy źjaviacca, kali ŭłady Biełarusi nie zmohuć uziać kredyt u Rasii. Sankcyi i prablemy z kredytam mohuć pryvieści da pavieličeńnia minusa. Ale, pa słovach Kavałkina, pakul prahnazavać kankretnyja ličby składana.
«Vielmi šmat pieramiennych. Davać prahnoz na paŭhoda napierad — sprava ŭ ciapierašnich umovach vielmi niaŭdziačnaja», — zaklučaje jon.
