U dziaržprahramie raźvićcia transparta na 2016-2020 hod kanstatavałasia, što źnižeńnie VUP, zamarudžvańnie pramysłovaj i sielskahaspadarčaj vytvorčaści, padzieńnie realnych prybytkaŭ nasielnictva paciahnie adpaviednaje padzieńnie hruza– i pasažyraabarotu. Imavierna, heta my ciapier i nazirajem.
Pasažyrapieravozki — śfiera datacyjnaja, asnoŭnyja hrošy robiacca na pieravozcy hruzaŭ i mižnarodnym tranzicie.
Rabotniki centralnaha ofisa Biełaruskaj čyhunki na ŭmovach ananimnaści śćviardžajuć, što pasažyrskija rejsy, jakija vychodziać u «nul» — Minsk — Homiel i Minsk — Brest.
Sioleta na niekatorych učastkach byli całkam spynienyja pryharadnyja pieravozki: naprykład, učastak Vaŭkavysk — Bierastavica, tupikovy adrezak padzielenaj miažoj čyhunki Biełastok — Baranavičy.
Cikava, što sioleta palaki adnavili štodzionnyja rejsy ciahnikoŭ na svaim adrezku linii, dzie jany byli admienienyja kala 20 hod tamu. Takaja ilustracyja situacyi ŭ susiednich krainach.
Kali pahladzieć na spravazdačy, to za 2020 hod Biełaruskaja čyhunka spracavała z čystymi stratami ŭ 109 miljonaŭ rubloŭ. U 2019-m straty byli našmat mienšyja — 27 miljonaŭ rubloŭ.
Miarkujučy pa dakumientach, za pieršaje paŭhodździe 2021-ha straty ad pasažyrskich pieravozak skłali 310,9 miljonaŭ rubloŭ, akuplalnaść — usiaho 14,3%.
Aproč taho, praterminavanaja zapazyčanaść «Biełčyhunki» za pastaŭlenaje paliva 37 miljonaŭ rubloŭ, za elektraenierhiju — 12,2 miljona.
Banki nie dajuć kredyty, kiraŭnictva čyhunki prosić «Naftan» uvajści ŭ stanovišča i dačakacca, pakul hrošy vydzielić adzin z rasijskich bankaŭ.
Vytrymki ź lista kiraŭnictva «Biełčyhunki» kiraŭnictvu «Naftana».
Isnujuć prablemy z pavyšeńniem rentabielnaści čyhunačnaha transpartu.
«Mintrans nie moža narmalna rehulavać roznych pieravozčykaŭ, kab jany nie dublavali maršruty. U vyniku i aŭtobusnyja pieravozki, i čyhunačnyja ŭvachodziać u pikie, tamu što pasažyrapatoki padajuć, a taryfy na pieravozku padymać nie daje MART», — kažuć abaznanyja krynicy.
Płaciežazdolnaść unutranych zamoŭcaŭ hruzapieravozak nie zaŭsiody zajzdrosnaja, pavodle ŭnutranych dakumientaŭ debitorskaja zapazyčanaść bałansuje na ŭzroŭni niekalkich dziasiatkaŭ miljonaŭ rubloŭ — pradpryjemstvy nie mohuć apłačvać pasłuhi praz ułasny harotny stan.
Zrešty, jak i nie ŭsie ŭnutranyja pieravozki ŭ pryncypie akupnyja.
«Naprykład, ščebień z «Hranita» voziać šmat, ale sabie ŭ minus. Takija taryfy. I tak amal z usimi budmateryjałami», — kažuć krynicy.
Jašče adna z apošnich prablem — dziasiatki kinutych kantejniernych ciahnikoŭ, jakija rasstaŭlenyja pa biełaruskich stancyjach z-za taho, što ich nie prymaje polskaja čyhunka. Imavierna, pryčyna ŭ madernizacyi polskaha pierahruzačnaha vuzła «Małaševičy», z-za čaho polski bok nie spraŭlajecca z patokam kantejnieraŭ.
Na fonie siektaralnych sankcyj, pahrozy spynieńnia pakupki kaliju i hieapalityčnych supiarečnaściaŭ (Kitaj spyniŭ čyhunačny transpart u litoŭski port, ciahniki jeździli tranzitam cieraź Biełaruś) pierśpiektyvy prynamsi pasažyrskaj śfiery čyhunačnaj haliny vyhladajuć ćmiana.
I padać jašče jość kudy. Pavodle dziaržaŭnych narmatyvaŭ zabieśpiačeńnia transpartam na ŭnutry abłasnych maršrutach z ulikam čyhunki — adzin rejs tudy-nazad miž abłasnym i rajonnym centram u sutki.
Z zabiaśpiečanaściu transpartam taksama nie ŭsio hładka.
«Kali kazać pra elektryčki i dyzieli ciahnikoŭ rehijanalnych linij ekanamkłasa, niekatoryja ź ich jašče majuć dastatkova šmat resursu (zakuplalisia ŭ kancy 80-ch ci napačatku 90-ch), a niekatorym pradaŭžajuć termin ekspłuatacyi ŭžo ŭ katory raz, — kaža rabotnik centralnaha ofisa «Biełčyhunki». — Heta narmalnaja praktyka, ale technika nie viečnaja. Jana łamajecca. I kožny raz łamajecca horš i horš. Voś i dajšli da taho, što na niekatorych maršrutach prosta nie chapaje tych sastavaŭ (Homielskaje adździaleńnie, naprykład). Tamu adzinaje vyjście — skaračeńnie intensiŭnaści i pavyšeńnie cany dla spažyŭcoŭ».