Łahičny łancužok tam taki: Maskva aścierahajecca, što da ŭłady ŭ Biełarusi paśla Łukašenki mohuć pryjści antyrasijskija siły, a značyć, kab Kreml pierastaŭ trymacca za kiraŭnika, jaki vidavočna zasiadzieŭsia, jamu, Kramlu, patrebnyja harantyi bolš doŭhaterminovaj, žaleznaj pryviazki niezaležna ad taho, chto budzie kiravać u Biełarusi.
Łukjanaŭ prapanuje madel Armienii, dzie jość rasijskaja vajskovaja baza, to-bok Maskva nie aścierahajecca dazvalać armianam svabodna i časam turbulentna mianiać svaju ŭładu, tamu što pry lubym zychodzie hetaja ŭłada vymušanaja budzie zastavacca prarasijskaj.
Tamu, robić vysnovu ekśpiert, u Biełarusi jość sens raźmiaścić rasijskija vojski na pastajannaj asnovie, a dalej chaj sabie biełarusy sami vyrašajuć, chto i jak im budzie kiravać, ale Maskva ŭžo budzie spakojnaja.
Ja redka kamientuju čužyja teksty, ale tut pavažany ekśpiert, na moj pohlad, dapuskaje važnuju pamyłku, zanadta raspaŭsiudžanuju jak u Rasii, tak i siarod biełaruskich ekśpiertaŭ pa źniešniaj palitycy, asabliva tych, chto nazyvaje siabie «realistami».
Pamyłka hetaja — u hipiertrafavanaj uvazie da hieapalityčnych mierkavańniaŭ i niedaacency ŭnutranych faktaraŭ, vialikija dziadźki ŭsie vyrašać, a ludzi chaj tam hulajucca ŭ demakratyju paśla hetaha. Subjektnaść samoha hramadstva i toje, jakija prablemy heta moža padkinuć uładam, albo ihnarujecca, albo niedaaceńvajecca.
Baza ŭ Armienii słužyć u jakaści stabilizatara rasijskaha ŭpłyvu nie tolki tamu, što jana tam jość, a jašče i tamu, što Rasija dla Armienii — harant biaśpieki ad varožych susiedziaŭ, pahrozu ad jakich adčuvajuć usie armianie. I jak śledstva, baza (a paśla niadaŭniaj vajny z Azierbajdžanam — i ahułam vajenny patranaž Maskvy) nie stała pradmietam hramadskaha raskołu.
A ciapier ujavicie raźmiaščeńnie rasijskaj bazy ŭ Biełarusi ciapier. Jašče ŭ śniežni 2015 hoda, kali biełarusy byli pad masiravanym infarmacyjnym upłyvam militarysckaj rasijskaj prapahandy, bolš ludziej vystupała suprać rasijskaj bazy (34%), čym za jaje (27%). Astatnija byli abyjakavyja.
Ciapier ukrainskija fobii astyli, prychilnikami stałaj rasijskaj vajskovaj prysutnaści buduć tolki zaŭziatyja rusafiły ci, chutčej, «natafoby», jakich dakładna nie stała bolš za piać hadoŭ. Ale navat kali abapiracca na tyja ličby i dadać da ich rezkuju palaryzacyju ŭ hramadstvie, to źjaŭleńnie bazy stała b surjoznym destabilizujučym faktaram.
Apanienty Łukašenki paličyli b jaje zdačaj suvierenitetu, kab vyratavać svaju ŭładu. Staŭleńnie da hetaj bazy paśla Łukašenki było b takim ža, jak da jahonaj taksičnaj spadčyny, pradmieta zakulisnaj uhody, pra jakuju niepapularny kiraŭnik nie spytaŭ hramadstva.
Paśla źmieny ŭłady, siły, jakija pradstaŭlajuć siońniašni pratest, stavili b pytańnie ab hetaj bazie jak ab niezakonna raźmieščanaj. Takuju ž by pazicyju zaniaŭ by Zachad, tamu što, ź ich punktu hledžańnia, Łukašenka nie maje prava na takija ździełki, a značyć, havorka idzie ab adnabakovaj paŭzučaj interviencyi.
Narešcie, navošta ŭ hetaj łohicy stavić bazu samomu Łukašenku? Bo jon taksama moža pračytać artykuł Łukjanava i zrazumieć niemudrahielistuju łohiku: niama bazy — Maskvie patrebny Łukašenka jak antyzachodni jakar, jość baza — Łukašenka ŭžo nie mocna i patrebny.
Heta značyć, kali ŭvieś truk projdzie, to Łukašenku daviadziecca zmušać na hety krok, chutčej za ŭsio — žorstkim ekanamičnym šantažom. U narodzie heta tolki dadaść vajennaj bazie vobraz naviazanaha vonkavaha trajanskaha kania.
Nie abapirajučysia na dastatkovuju padtrymku ŭ samoj Biełarusi — jak u kirujučych elitach, tak i ŭ hramadstvie — takaja baza budzie nie stabilizataram rasijska-biełaruskaha siabroŭstva, a razdražnialnikam u hetych adnosinach i hienierataram palityčnych kanfliktaŭ u samoj Biełarusi.
Kali chtości zapiarečyć, što lubaja budučaja ŭłada pabaicca vyhaniać rasijskuju bazu, bo tady Maskva pierakryje naftu i haz, to niezrazumieła, u čym naohuł jaje sens. Hetyja vientyli mohuć sami pa sabie strymać ad luboha vychadu z-pad rasijskaha kaŭpaka.
A kali nie mohuć, adkul upeŭnienaść, što prezident Babaryka abo Łatuška ŭ jakim-niebudź 2028 hodzie nie paprosić rasijskich sałdat prajechać na radzimu, kab zaadno śsiekčy na hetym unutrypalityčnych ačkoŭ, jak abaronca niezaležnaści?
