Niezdarma pierad sustrečaj 20 žniŭnia niamieckaja hazieta Süddeutsche Zeitung napisała pra jaje ŭdzielnikaŭ:
«Na suśvietnaj scenie bolš niama palitykaŭ, akramia hetych dvaich, u jakich by tak dobra atrymlivałasia drenna ładzić na praciahu takoha doŭhaha času».
Ciapierašni kancler Hiermanii, jakaja chutka sychodzić z palityki, daŭno pačała stavicca da Pucina z aściarohaj. Padziei apošnich 15 hadoŭ — ad aneksii Kryma da atručvańnia Alaksieja Navalnaha — apraŭdali jaje staŭleńnie, piša ahladalnik Guardian Endru Rot.
Byli va ŭzajemaadnosinach palitykaŭ i prykłady asabistaj niepryjaznaści. Naprykład, u 2007 hodzie Pucin dazvoliŭ svajmu łabradoru Koni blizka padyści da Mierkiel, jakaja baicca sabak. Paźniej jana patłumačyła žurnalistam, što razumieje, čamu Pucin tak zrabiŭ: maŭlaŭ, jamu treba było dakazać, što jon mužčyna, bo Pucin «baicca ŭłasnaj słabaści».
Pry hetym Mierkiel nie padtrymlivała žadańnie šmatlikich zachodnich lidaraŭ mižnarodnaj izalacyi Pucina. Naadvarot, niamiecki kancler i francuzski premjer Emaniuel Makron zaklikali krainy Jeŭraźviazu padtrymlivać pramy dyjałoh z Pucinym. Tym nie mienš, u apošni čas takija zakliki Mierkiel i Makrona vyklikajuć usio bolš niehatyvu ŭ inšych jeŭrapiejskich palitykaŭ, jakija ličać, što z rasijskim lidaram nielha vieści arhumientavanuju hutarku.
Jašče adzin faktar — toje, što sustreča Mierkiel i Pucina prajšła roŭna praz hod paśla atručvańnia viadomaha rasijskaha apazicyjaniera Alaksieja Navalnaha, lačeńnie paśla jakoha Navalny prachodziŭ akurat u Hiermanii. Zaraz jon znachodzicca za kratami pa spravie, za jakoj vidavočna staić palityčnaja pomsta. Pradstaŭnik Mierkiel Štefen Zajbiert zajaviŭ u sieradu, što historyja z Navalnym vyklikaje vialikaje napružańnie ŭ rasijska-niamieckich adnosinach, bo rasijski bok nie źviartaje patrebnaj uvahi na pazicyju Hiermanii ŭ kiejsie Navalnaha. Apazicyjanier znachodzicca za kratami pa niespraviadlivamu abvinavačvańniu, u dadatak suprać jaho vysoŭvajuć novyja abvinavačvańni.
Časam hučać mierkavańni, što Mierkiel stavicca da Rasii zanadta miakka. Jaje apošni vizit u Kreml pryjšoŭsia na čas, kali skančvajecca budaŭnictva trubapravoda «Paŭnočny patok — 2», jaki dazvolić Rasii dastaŭlać haz naŭprost u Hiermaniju i paźbiahać tranzitu praź inšyja krainy. Prajekt vyklikaŭ abureńnie va Uschodniaj Jeŭropie. Naprykład, prezident Ukrainy Uładzimir Zialenski nazvaŭ trubapravod «mocnaj zbrojaj, jakuju dajuć Rasii». Adnak, jak śćviardžaje Mierkiel, Hiermanija adkaža, kali Rasija budzie cisnuć na Ukrainu, pahražajučy joj spynić pastaŭki haza.
