Fota Wikimedia
«Ja vydaŭ ukaz ab pryniaćci dadatkovych mier u dačynieńni da niekatorych rasijskich trubapravodaŭ, pryznačanych dla ekspartu enierhanośbitaŭ, u suviazi z nadzvyčajnym stanoviščam u krainie, abvieščanym va ŭkazie 14024 ad 15 krasavika 2021 hoda ŭ suviazi ź niezvyčajnaj i nadzvyčajnaj pahrozaj nacyjanalnaj biaśpiecy, źniešniaj palitycy i ekanomicy Złučanych Štataŭ, stvoranaj peŭnaj škodnaj źniešniaj dziejnaściu ŭrada Rasijskaj Fiederacyi»,— havorycca ŭ apublikavanym Biełym domam liście Džo Bajdena, nakiravanym u Kanhres.
U liście havorycca, što ŭkaz nakiravany na prajekty rasijskich trubapravodaŭ, jakija mohuć asłabić enierhietyčnuju biaśpieku Jeŭropy, u tym liku Ukrainy, i stvaryć pahrozu nacyjanalnaj biaśpiecy, mižnarodnym spravam i ekanomicy ZŠA.
«Ukaz błakuje ŭłasnaść i majomasnyja intaresy zamiežnych asob, vyznačanych dziaržsakratarom paśla kansultacyi ź ministram finansaŭ», — havorycca ŭ liście. U pryvatnaści, sankcyi mohuć być uviedzienyja za pasłuhi, jakija spryjajuć budaŭnictvu hazapravoda «Paŭnočny patok — 2».
Raniej Pucin zajaviŭ, što hazapravod «Paŭnočny patok — 2» amal dabudavany, zastałosia prakłaści 15 km. «Hazpram» paviedamlaŭ, što raźličvaje ŭžo sioleta pastavić pa hazapravodzie 5,6 miljarda kuboŭ hazu. Heta aznačaje, što kampanija čakaje ŭvod pieršaj nitki hazapravoda ŭ ekspłuatacyju nie paźniej za siaredzinu kastryčnika.
