U pastanovie havorycca, što Baskaŭ adchilajecca ad usioj nacyjanalnaj i internacyjanalnaj chakiejnaj aktyŭnaści z 10 vieraśnia 2021 da 9 vieraśnia 2026. Heta aznačaje, što jamu zabaroniena ŭdzielničać u chakiejnych mierapryjemstvach, u tym liku ŭ Biełarusi, roŭna jak i treniravać. 

Biełaruskaja fiederacyja chakieja, praŭda, u svajoj reakcyi zajaviła, što Baskaŭ «praciahnie raźvivać chakiej na svajoj pasadzie». 

Čym pahražaje hetaja ŭpartaść? 

«Fiederacyja maje mahčymaść pakinuć Baskava la styrna, ale jana pavinna razumieć, što za nievykanańnie rašeńnia IIHF sankcyi buduć užo suprać fiederacyi, što moža całkam vyklučyć biełaruski chakiej z suśvietnaha sportu», — skazaŭ «Našaj Nivie» kiraŭnik Fondu spartyŭnaj Salidarnaści Alaksandr Apiejkin. 

Nahadajem, jak skazana ŭ zajavie IIHF, rašeńnie ab dyskvalifikacyi Baskava było pryniataje paśla 10 miesiacaŭ rasśledavańnia.

IIHF paviedamlaje, što 25 listapada raspačała rasśledavańnie pa mahčymym dačynieńni Baskava da incydenta sa śmierciu Ramana Bandarenki. Fiederacyja atrymała spravazdačy ad Biełaruskaha fonda spartovaj salidarnaści i daručyła niezaležnaj dasojedčaj firmie pravieści analiz ahulnadastupnaj infarmacyi na hety kont.

«Hruntujučysia na acency paviedamleńniaŭ ŚMI, aŭdyjozapisaŭ i fatahrafij, firma pryjšła da vysnovy, što, choć nielha vyklučać prysutnaść Baskava na mierapryjemstvie, jana nie znajšła dokazaŭ aktyŭnaha ŭdziełu Baskava ŭ napadzie na Bandarenka, — havorycca ŭ paviedamleńni. — Akramia taho, firma ŭkazała, što Baskaŭ ličycca zaŭziatym prychilnikam prezidenta Biełarusi Alaksandra Łukašenki i ŭdzielničaŭ u palityčnych mitynhach u padtrymku Łukašenki ŭ 2020 hodzie.

U červieni 2020 hoda Baskaŭ napisaŭ adkryty list z krytykaj spartsmienaŭ, jakija padtrymlivajuć apazicyjny ruch Biełarusi. Firma taksama ŭpamianuła pra paviedamleńni, što Baskaŭ u jakaści spartovaha kiraŭnika zvolniŭ niekalki «nienadziejnych» spartsmienaŭ i trenieraŭ».

Taksama IIHF adznačyła, što biełaruski NAK nie abaraniŭ naležnym čynam spartsmienaŭ ad dyskryminacyi pa palityčnych pohladach. Tamu Mižnarodny alimpijski kamitetvyklučyŭ z členaŭ NAK Alaksandra Łukašenku i Dźmitryja Baskava.

Клас
0
Панылы сорам
0
Ха-ха
0
Ого
0
Сумна
0
Абуральна
0