Pieršapačatkova niekatoryja ŚMI śćviardžali sa spasyłkaj na ekstrannyja słužby, što mužčyna sam vykinuŭsia z akna, adnak paźniej paviedamleńnie abvierhli.
Siabry zahinułaha śćviardžali, što jaho źbili da śmierci i abrabavali troje mužčyn «kaŭkazskaj źniešnaści».
Źjaviłasia i videa kamiery na padjeździe. Bačna, što čałavieka zabivali ŭ dvary.
Paźniej troch padazravanych u zabojstvie zatrymali. Akazałasia, heta 28-hadovy žychar Krasnadarskaha kraja, 37-hadovy raniej sudzimy dahiestaniec… i biełarus.
Jak paviedamlajecca, jany pryznalisia ŭ zabojstvie i ciapier znachodziacca ŭ SIZA.
Biełarusa zavuć Dźmitryj Makarevič, jamu 28 hadoŭ.
Makarevič rodam z Babrujska. Žanaty, maje syna.
Adsłužyŭ u piataj bryhadzie śpiecnaza ŭ Marjinaj Horcy (darečy, mienavita vajskoŭcy piataj bryhady razhaniali letašnija pratesty ŭ Breście, padčas hetaha byŭ zabity Hienadź Šutaŭ).
«U vojsku ŭsio bolš-mienš roŭna było. Dźmitryj trochi sklizki, a tak norm, — zhadvaje pra jaho były sasłužyviec. — Sklizki — značyć moža adkaznaść uziać na siabie, a paśla saskočyć.
Ciapier my znosin nie padtrymlivali. Usio, što viedaju: Dźmitryj i jašče adzin naš śpiecnazaviec pa proźviščy Savič vajavali na Danbasie, kali kanflikt tam tolki pačynaŭsia».
Ukrainskaja baza «Miratvorac» śviedčyć, što Dźmitryj sapraŭdy vajavaŭ na Danbasie ŭ składzie bataljona «Sparta». Mienavita hety bataljon uznačalvaŭ Arsien Paŭłaŭ, bolš viadomy jak «Mataroła».
Pazyŭny Dźmitryja byŭ «Makar». U sakaviku 2015 hoda jamu paranili abiedźvie nahi, u 2016 znoŭ atrymaŭ ranieńni.
Pra jaho ŭžo navat pisała «Jeŭraradyjo»:
«Słužyli ŭ adnoj rocie. Potym ja daviedaŭsia, što spačatku na vajnu pajechaŭ adzin čałaviek, potym Makarevič. Jon i mnie prapanoŭvaŭ, i inšym, — raspaviadaŭ minčuk Pavieł S. — Ja kažu: «U mianie Radzima tut, u Biełarusi, siamja tut. Heta nie maja vajna». Heta ich rašeńni. Nakolki ja viedaju, źjechaŭšy tudy, jany razyšlisia z žonkami. Ciažka skazać, što zdaryłasia, čamu jany tudy pajechali dobraachvotnikami».
U samaabvieščanaj Navarosii abodva biełarusy zdabyli aŭtarytet, atrymali ad svaich kamandziraŭ šerah uznaharod. Abodva ŭdzielničali ŭ bajach na terytoryi Danieckaha aeraporta.
Intaresy Makareviča možna prasačyć pa jaho padpiskach u sacsietkach. Pabliki RNIE, inšaja barkašoŭščyna, dapamoha Navarosii, bataljony Danbasa, vieterany Danbasa… Fotazdymki palavych kamandziraŭ Hivi i Mataroły z podpisam «Viečnaja słava hierojam». Nu i fota samoha Dźmitryja ŭ šaliku z nadpisam «Ja russkij».
Razvaleny daniecki aeraport. Makarevič źleva
U 2018 hodzie Makarevič viarnuŭsia ŭ Biełaruś pamianiać pašpart. Jaho zatrymali nibyta za chulihanku.
Maci Dźmitryja raskazvała telekanału, ciapier pryznanamu ekstremisckim, što jaje syn zastupiŭsia za siabra, była bojka. U vyniku Makareviča pakarali 1,5 hadami kałonii.
Adsiadzieŭšy, jon pajechaŭ u Rasiju. Čym heta skončyłasia, užo viadoma — zabojstvam Siarhieja Vieranikina.
Praŭda, astrachanski siabar zabitaha Vieranikina kaža, što toj taksama vioŭ zusim nie biazhrešny ład žyćcia:
«Jon pryjazdžaŭ tudy na pracu. Hulaŭ, kajfavaŭ z chłopcami, z tymi ž kaŭkazcami. Jano ŭsio było čakana: Siarhiej to pracavaŭ, to «ruchaŭsia» pa rečach. Kraŭ rečy časam. Jon nie vielmi prystojny ład žyćcia vioŭ, tamu, moža, jany niešta nie padzialili ci jašče što? Usiakaje moža być».
Inšy siabar zahinułaha raskazaŭ padrabiaznaści:
«Ich tam było dvoje: Siarhiej i Alaksandr. Za imi ci to pryhladvali, ci to što, niezrazumieła. Bo da ich padlacieli hetyja troje, na Alaksandra nakinuli piatlu, sprabavali zadušyć.
A Siarhieja adrazu ŭdaryli nažom u šyju, tam kala dziasiatka ranieńniaŭ. Jaho bili, nahami ŭ tvar taksama. I abrabavali.
Alaksandr zmoh vyrvacca i źbiehčy».
U Rasii dziejničaje maratoryj na śmiarotnaje pakarańnie, tamu maksimum, što pahražaje zabojcam — pažyćciovaje źniavoleńnie.
Ciapier patryjot ruskaha śvietu «Makar» chutčej za ŭsio praviadzie vielmi doŭhi termin u sapraŭdnaj ruskaj kałonii.
