Što za vybary ŭ Hruzii?
Na vybarach 2 kastryčnika hruzinam treba budzie abrać meraŭ 64 haradoŭ. Ale samym važnym dla dalejšaha palityčnaha žyćcia krainy z hetaha śpisa źjaŭlajecca pasada mera Tbilisi. Hałoŭnaja intryha ŭ tym, ci zmoža dziejny mer Tbilisi Kacha Kaładze, jon ža kandydat ad kirujučaj partyi «Hruzinskaja mara — Demakratyčnaja Hruzija», znoŭ stać meram stalicy.
Kacha Kaładze. Fota: staronka palityka ŭ Facebook.
Adnym ź jaho hałoŭnych apanientaŭ źjaŭlajecca deputat Nika Mielija, jaki pradstaŭlaje apazicyjnuju partyju «Adziny nacyjanalny ruch». Jaje zasnavalnik — eks-prezident Hruzii Michaił Saakašvili.
10 vieraśnia ŭ ŚMI prasačyłasia navina ab tym, što ŭ liku inšych mižnarodnych arhanizacyj vybarčaja administracyja Hruzii vydała akredytacyju Centrvybarkamu Biełarusi i jaje kiraŭniku Lidzii Jarmošynaj. Jak tolki hetyja źviestki paćvierdzilisia, pa krainie prakaciłasia chvala abureńnia.
Nika Mielija. Fota: staronka palityka ŭ Facebook.
Čamu dla hruzinaŭ vielmi važny mižnarodnyja naziralniki? Z-za pandemii padčas papiarednich parłamienckich vybaraŭ u kastryčniku minułaha hoda zamiežnych naziralnikaŭ na vybarčych učastkach u Hruzii było našmat mienš, čym płanavałasia pieršapačatkova.
Apanienty ŭłady ličać, što heta dazvoliła padtasavać vyniki vybaraŭ.
U krasaviku kirujučaja partyja «Hruzinskaja mara — Demakratyčnaja Hruzija» padpisała pahadnieńnie z apazicyjaj. Zhodna ź im u vypadku, kali ŭłada nie atrymaje padtrymki bolš jak 43% vybarščykaŭ na miascovych vybarach, u krainie pavinny adbycca daterminovyja parłamienckija vybary.
I choć naprykancy lipienia akurat pierad pačatkam pieradvybarnaj honki «Hruzinskaja mara» vyjšła z hetaha pahadnieńnia, miascovyja žychary ŭpeŭnienyja: kali hetaja partyja prajhraje, daterminovym vybaram usio roŭna być.
Mienavita tamu hruziny ličać nievierahodna važnym udzieł i sumlennaść mižnarodnych naziralnikaŭ jak u dzień hałasavańnia 2 kastryčnika, tak i padčas padliku hałasoŭ.
«Hruzinski CVK pavinien byŭ abmierkavać kandydaturu Lidzii Jarmošynaj adkryta»
Adnoj ź pieršych nakont rehistracyi Jarmošynaj aburyłasia Nino Hohuadze — siabra partyi Elenie Chaštaryja «Droa». Jana nahadała pra toje, jak u Biełarusi prajšli prezidenckija vybary i jakuju rolu ŭ ich adyhrała Jarmošyna.
Nino Hohuadze. Fota: skrynšot ź siužeta telekanała 1TV.ge.
«I CVK hetaj dziaržavy hruzinskaja ŭłada zaprasiła ŭ jakaści naziralnika na svabodnyja vybary? — ličyć Hohuadze. — Kali ŭspomnicie niadaŭniaje hrebavańnie mižnarodnymi partniorami i na hetym fonie zaklučeńnie damovy ź biełaruskim KDB, kurs ułady «Hruzinskaj mary» stanovicca zrazumiełym.
Vybary 2 kastryčnika vielmi važnyja dla niezaležnaści Hruzii. Partyju, jakaja śpiełasia z režymami Pucina i Łukašenki, nieabchodna adchilić».
Kirujučaja «Hruzinskaja mara», zrešty, jak i CVK Hruzii, z abvinavačvańniami nie zhadžajecca. U CVK padkreślili: «Vybarčaje hruzinskaje zakanadaŭstva zdolnaje zabiaśpiečyć prazrystyja i spraviadlivyja vybary».
U kiraŭnika niaŭradavaj arhanizacyi «Mižnarodnaje tavarystva za spraviadlivyja vybary i demakratyju» Nino Dalidze inšaje mierkavańnie:
Nino Dalidze. Fota: staronka palityka ŭ Facebook.
«Hruzinski CVK pavinien byŭ abmierkavać kandydaturu Lidzii Jarmošynaj adkryta. Pakul ža vybarkam u štyki ŭsprymaje zaŭvahi hramadzianskich aktyvistaŭ. Pry hetym u praviłach akredytacyi (mižnarodnych naziralnikaŭ — zaŭv. «Našaj Nivy») jość pałažeńnie ab tym, što arhanizacyja nie pavinna być datyčnaj da parušeńnia pravoŭ čałavieka.
Ale CVK Biełarusi nie tolki sfalsifikavaŭ vybary, ale i davioŭ situacyju da zatrymańniaŭ, čałaviečych achviar i hanieńniaŭ na biełarusaŭ. Da taho ž Lidzija Jarmošyna znachodzicca ŭ sankcyjnym śpisie Jeŭrapiejskaha Sajuza. Pra što tut jašče kazać?»
«Dla Jarmošynaj u Tbilisi varta było b arhanizavać «chałodny duš»
«Tak, u nas libieralnyja zakony. Da ŭdziełu mižnarodnych naziralnikaŭ u vybarach prymianiajecca zajaŭny pryncyp, — kaža nastaŭnica tbiliskaj škoły Nika Taładze, jakaja taksama aburanaja navinoj pra Jarmošynu. — Napeŭna, jana padała zajaŭku biez usialakaha zaprašeńnia, heta značyć na ahulnych padstavach.
Ale paśla taho, što hetaja žančyna praviarnuła ŭ Biełarusi, nijakim niezaležnym naziralnikam jana być nie moža. Uvieś śviet byŭ u šoku ad taho, što adbyvałasia ŭ Biełarusi letaś. Jana nie pavinna choć niejak upłyvać na vyniki vybaraŭ u našaj krainie».
«Ciapier, kali dla hruzinaŭ nastolki važnyja sumlennyja vybary i ich vyniki, u jakaści naziralnika da ich pryjedzie Lidzija Jarmošyna? Hetaha nielha dapuścić, — ličyć biełaruska Łarysa Pahockaja, jakaja niekalki miesiacaŭ žyvie ŭ Tbilisi. — Usie biełarusy, jakija ciapier žyvuć u Hruzii, razumiejuć, da čaho pryvodziać falsifikavanyja vybary. Dla Jarmošynaj u Tbilisi varta było b arhanizavać chałodny duš».
U najbližejšyja dni pradstaŭniki biełaruskaj dyjaspary i aktyŭnyja hruziny źbirajucca vyjści na akcyi pratestu la budynkaŭ Parłamienta i CVK u Tbilisi.
Padobnyja skandały ź Lidzijaj Jarmošynaj zdaralisia i raniej
Niešta padobnaje z kiraŭnikom CVK Biełarusi ŭžo adbyvałasia ŭ 2012 hodzie ŭ Vienie. Uletku taho hoda tam pavinna była prajści kanfierencyja arhanizacyi pa biaśpiecy i supracoŭnictvu ŭ Jeŭropie (ABSIE) pad nazvaj «Demakratyčnyja vybary i nazirańnie za imi».
Siarod zaprošanych taksama była Lidzija Jarmošyna. Paśla hetaj naviny biełaruskaja apazicyja nazvała mierapryjemstva «Vienskim valsam z katami». Charakterna, što ŭjezd u Jeŭrasajuz Lidzii Jarmošynaj byŭ zabaronieny ŭžo tady.
Usie zadavalisia pytańniem: chto ž zaprasiŭ Lidziju Jarmošynu ŭ Vienu? Bo navat pres-sakratar BDIPČ ABSIE Tomas Rymier tady zajaviŭ, što ABSIE kiraŭnika CVK Biełarusi nie zaprašała. Chto ž tady daŭ joj vizu, było niezrazumieła. Paśla vyśvietliłasia, što heta ŭsio ž ABSIE. Vizu atrymała nie sama Jarmošyna, a biełaruski Centrvybarkam. Aŭstryja, na terytoryi jakoj znachodzicca ofis ABSIE, pa mižnarodnych praviłach vymušana była prymać usich.
Padčas kanfierencyi praz udzieł u joj Lidzii Jarmošynaj hramadzianskija aktyvisty taksama zładzili akcyju pratestu. Metaj ich akcyi było pryciahnieńnie ŭvahi «da prablemy falsifikacyi vybaraŭ u Biełarusi», dzie z 1996 hoda, kali Jarmošyna ŭznačaliła CVK, pa ich słovach, «nivodnaja vybarčaja kampanija nie była pryznanaja sumlennaj abo adkrytaj».
