Fota Catholic.by
Vyras u vioscy ŭ siamji viernikaŭ
Stanieŭski rodam ź vioski Zdanievičy, što niedaloka ad Hrodna. Jamu 52 hady. Vučyŭsia ŭ škole ŭ Łuckaŭlanach, paśla słužyŭ u vojsku.
«Dumaju, na jaho charaktar bolš paŭpłyvała nie vajskovaja słužba, a toje, što jon pachodzić z tradycyjnaj vierujučaj siamji i atrymaŭ adpaviednaje vychavańnie. Joj spakojny, dobry čałaviek»,
— kaža ksiondz Viačasłaŭ Barok, jaki razam z budučym arcybiskupam try hady vučyŭsia ŭ Vyšejšaj duchoŭnaj sieminaryi ŭ Hrodnie.
Paśla sieminaryi — Stanieŭski byŭ adnym ź jaje pieršych studentaŭ — maładoha Juzafa nakiravali vikaryjem u Vaŭkavysk.
Vyvučaŭ pytańnie razvodaŭ
Na hetym adukacyja budučaha mitrapalita nie skončyłasia. U Lublinskim katalickim univiersitecie jon staŭ mahistram kananičnaha prava. Abaraniaŭ pracu na temu «Pracesualnyja pravy bakoŭ u vypadku skasavańnia šlubu».
Z 2005 hoda byŭ rektaram hrodzienskaj duchoŭnaj sieminaryi.
U 2013-m Stanieŭskaha pryznačyli dapamožnym biskupam Hrodzienskaj jeparchii. Paźniej jon abiraŭsia hienieralnym sakratarom Kanfierencyi katalickich biskupaŭ.
Fota Catholic.by
Dobry pastar i kampramisnaja fihura
U śviatarskaj supolnaści pra Stanieŭskaha adhukajucca dobra.
«Ale šmat chto zadaje pytańnie, ci budzie jon dobrym kiraŭnikom. Adna sprava — być pastaram svaich viernikaŭ, zusim inšaja — kiravać i prymać rašeńni administracyjnyja», — razvažaje Viačasłaŭ Barok.
Novaha mitrapalita ličać kampramisnaj fihuraj. Vierahodna, ułady prasili Vatykan pryznačyć takoha kiraŭnika kaścioła, jaki b nie prajaŭlaŭ siabie dahetul, nie zaklikaŭ uładu trymacca zakonu.
Ale kampramis nie značyć kiepski varyjant.
«U Polščy, naprykład, Stefan Vyšynski niekali taksama abiraŭsia na arcybiskupa Varšaŭskaha jak fihura kampramisnaja dla kamunistyčnaha režymu. I pry hetym adyhraŭ pazityŭnuju rolu ŭ kaściole, staŭ sumleńniem nie tolki prychodu, ale i hramadstva. Tamu, kali pryznačajecca vierujučy čałaviek, možna nadzieju mieć, što Boh praź jaho vykanaje svaju volu», — kaža Barok.
Biskup Kazimir Vielikasielec, jaki sa studzienia byŭ časovym apolstalskim administrataram, naŭrad ci moh uznačalić kaścioł — praz svoj uzrost.
Maliŭsia za viartańnie Kandrusieviča
Kali były kiraŭnik biełaruskaha kaścioła Tadevuš Kandrusievič akazaŭsia ŭ vyhnańni, Stanieŭski maliŭsia za jaho viartańnie. 9 vieraśnia 2020 hoda ŭ haradzienskim kaściole prajšła słužba, pryśviečanaja hetamu. Razam sa Stanieŭskim jaje vioŭ biskup Alaksandr Kaškievič. Na słužbie prysutničała 10 śviataroŭ z roznych prychodaŭ.
«Historyja pakazvaje, što tyja, chto maryŭ stvaryć nieba na ziamli biez Boha, stvarajuć piekła. My pavinny ŭvieś čas vučycca mudra i pa-božasku vybirać, umieć adroźnivać dabro ad zła, praŭdu ad chłuśni. Heta niaprostaje zadańnie. My žyviom u śviecie, dzie zaŭvažajem źmiaščeńnie paniaćciaŭ i kaštoŭnaściaŭ», — pramaŭlaŭ Stanieŭski.
Pa viartańni Kandrusieviča ŭ Biełaruś jon sustrakaŭ jaho na miažy na mašynie.
Zaklikaŭ biełarusaŭ daravać adno adnamu
Paśla vybaraŭ Stanieŭski napisaŭ kałonku, dzie zaklikaŭ ludziej adkazvać dabrom na zło. Pryvodzim niekatoryja cytaty ź jaje:
«Voś i nastaŭ apošni letni miesiac. Mała chto, napeŭna, mierkavaŭ, što jon budzie nastolki haračym na našaj Baćkaŭščynie».
«Što my robim z synami i dočkami našaj Maci-Biełarusi?! Napeŭna, usie baki adkažuć, što my dbajem ab jaje dabrabycie, ab sile i pryhažości Radzimy. A śviaty apostał Pavieł usich nas, vierujučych i niavierujučych, dakaraje: «Nie hetamu vy navučylisia ad Chrysta. Dazvolcie adnavicca Duchu ŭ vašym rozumie i apraniciesia ŭ novaha čałavieka».
«Daravać?! Tak!!! Jak? Zhodna z vučeńniem Jezusa Chrysta i pa jaho prykładzie.
«Ci ažno siem razoŭ?» — pytajecca siońniašni Piotr.
«Ažno siemdziesiat siem razoŭ», — i siońnia adkazvaje Jezus».
