Nahadajem, zhodna z pastanovaj №100, z sakavika rost cen na peŭnyja tavary nie pavinien byŭ pieravyšać 0,2% u miesiac. U śpis uvajšli krupy, makarona, kuryca, śvinina, jałavičyna, kaŭbasy, małako, harbata, myła i inšyja tavary.
Za hety čas vytvorcam i pradaŭcam niekalki razoŭ dazvalali padvyšać ceny adnosna stanu na 28 lutaha. Tak raśli ceny na alej, rys, potym na dziciačaje charčavańnie, chleb i chlebabułačnyja vyraby, a zatym jašče i na małočnyja pradukty. Na pačatku vieraśnia dazvolili pavysić ceny na miasa. Adnarazova, na 4,9%. Jak paviedamlaje MARH, u siarednim ceny vyraśli na 5%.
Čytačy «Našaj Nivy» pieryjadyčna paviedamlajuć nam pra rost cen na tyja ci inšyja tavary. My paprasili dasłać ich čeki za luty z cenami da «zamarozki» i paraŭnali ź ciapierašnimi. Dla paraŭnańnia my karystalisia servisam infoprice.by. Brali adnyja i tyja ž pradukty ŭ adnych i tych ža kramach u lutym i ŭ vieraśni. Viadoma, naš raźlik nie pretenduje na statystyčnuju dakładnaść. Heta bolš pohlad prostaha pakupnika.
Hrečka i rys padraśli na 11-12%, chleb — na 10%
Pačak šlifavanaha rysu ŭ lutym kaštavaŭ 2,45 rubla. Ciapier jaho možna nabyć užo na 12,2% daražej, za 2,75 rubla.
Za adzin i toj ža pačak hrečki ŭ lutym treba było addać 2, 68 rub., a ciapier 2,99 rub. Rost skłaŭ 11,5%.
Pačak makarony Rasta Ricci vahoj 400 hramaŭ u lutym kaštavaŭ 1, 45 rub., a ciapier — 1,79 rub. U vyniku nabyć makaronu ciapier abychodzicca biełarusam daražej na 23%.
Alej «Zołotaja siemiečka» možna było nabyć za 4,99 rub., a ciapier cana vyrasła na 4% da 5,19 rub. Prytym što MARH u krasaviku dazvoliŭ padniać ceny na alej da 15% ad cenaŭ u lutym.
A voś kiłahram cukru «Haradzieja» zastaŭsia na tych ža pazicyjach: i ŭ lutym, i ciapier kaštuje 1,72 rub.
Taksama ŭ śpisie tavaraŭ z zafiksavanymi cenami apynuŭsia i zbožžavy chleb. Tak, adzin i toj ža «Litoŭski» z kmienam u lutym možna było znajści pa 1,54 rub. — ciapier jon kaštuje 1,69 rub. Cana pavialičyłasia na 9,7%.
Cikava, što pšaničny tostavy chleb «Čajnyj», jaki nie ŭvachodzić u śpis «zamarožanych» tavaraŭ, ź lutaha vyras na 26%: z 1,5 rub. da 1,89 rub.
Tušku brojlera možna było nabyć pa 2,29 rubli za kiło, ciapier — bolš za 5
File kuraniaci-brojlera kaštavała 7,99 rub. za 1 kh — zaraz 8,35 rub., ale za 850 h. Vyličvajem — i atrymlivajem 9,82 rub. za kiłahram. Daražej na 22,9%.
Tuška kuraniaci-brojlera kaštavała ŭ lutym u «Hrynie» 2,29 rub. Anałahičnaj marki ciapier niama. A možna znajści «Chalalnuju» pa 5,32 rub. za kiłahram. Darečy, što cikava, i ŭ je-dastaŭcy kiłahram tuški-brojlera ad «Piatruchi» kaštuje prykładna na takim ža ŭzroŭni — 5,19 rub.
Śvinaja šyja ŭ zvyčajnyja nie akcyjnyja dni ŭ «Vitalury» kaštavała 12,79 rub. za kiłahram, a ciapier — 15,99 rub. Rost skłaŭ 25%.
Kiłahram łapatačnaj častki śvińni ŭ toj ža kramie možna było nabyć za 8,29 rub., ciapier cana vyrasła da 10,49 rub. Rost uvohule skłaŭ 27%.
Śviny farš «Novy» ŭ lutym možna było nabyć pa 7,49 rub. A ciapier jon padaražeŭ na 36% i kaštuje pa 10,19 rub. za kiłahram.
Što tyčycca kaŭbas, katoryja taksama jość u śpisie, to varanaja «Doktarskaja» (650 hramaŭ) kaštavała ŭ «Susiedziach» 5,92 rubla. U vieraśni cana zastałasia toj ža.
A voś, naprykład, «Finski sierviełat», ceny na jaki nie rehulujucca, kaštavaŭ 11,49 rub. za kh, a siońnia — 15,79 rub., što na 37% daražej.
Na 28% padaražeła i kaŭbasa salami «Kramloŭskaja»: była 10,99 rub. za kiło, a stała na 28% daražejšaj — 14,05 rub.
Jajki padaražali na 39%, a małako na 18%
«Małočka» taksama padrasła. Naprykład, butelka małaka «Stary Miensk», 950 mł u lutym kaštavała 1,35 rubla, a ciapier stała 1,59 rub., što na 18% bolš.
Śmiatana «Zdravuška» (tłustaść 15%, vaha 400 h.) kaštavała 1,55 rub. A ciapier — 1,62 rub. Rost — 4,5%.
Prykładna na stolki ž (4,4%) padresła cana bijakiefiru «Lohkaja ciena». Za pačak 930 h. treba było addać 1,12 rub. A ciapier — 1 rub. 17 kap.
Tvaroh «Biełłakt» tłustaściu ŭ 10% raniej možna było nabyć pa 1,52 rub. za pačak u 200 h. Ciapier cana padrasła da 1,54 rub., ci na 1,3% daražej.
Pačak masła «Sialanskaje» było 2,89 rubla, a stała — 3,37 rubla. Rost — 17%.
Dziasiatak jajek u lutym možna było znajści pa 1,99 rubla. Siońnia adny z samych tannych kaštujuć 2,77 rub. A heta daražej na 39%.
Sadavina i harodnina značna patańnieli
Zrazumieła, što sadavina i harodnina ŭ lutym buduć našmat daražejšymi, čym u vieraśni. Tak, naprykład, buraki ŭ lutym kaštavali 1,19 rubla za kiłahram, a ciapier ich možna znajści pa 0,79 rubla. Morkva pradavałasia pa 1,38, a ciapier — pa 0,89.
Bolš čym napałovu patańnieli pamidory «śliva», u lutym kaštavali 4,79 rubla, a ciapier 2,09. Hurki ŭvohule skinuli bolš za 70%: zimoj cana była kala 8 rubloŭ, ciapier možna znajści za 2.
Bulba ŭzimku kaštavała 1,39 rubla za kiłahram, a ciapier jaje možna znajści na 1,01 rubla, što na 37% mienš. A voś apielsiny padaraželi na 25%: 3,99 rubli suprać 4,99.
Čamu ceny vyraśli, niahledziačy na zamarozku?
Jak adznačajuć abaznanyja ŭ śfiery, reč u tym, što paśla pandemii ceny na pradukty rastuć va ŭsim śviecie. Daražeje toj ža samy kambikorm dla ptušak, vieterynarnyja preparaty i ŭhnajeńni. Strymlivać ceny ŭ takoj situacyi — zadača vielmi składanaja. Taksama, naturalna, jość spakusa pradać pradukcyju na rynki, dzie ceny vyšejšyja, i zarabić bolš.
«Vytvorcy ŭžo nieadnarazova znachodzili vyjście z hetaj situacyi, — kažuć pradaŭcy. — Sprava ŭ tym, što padvyšać ceny nielha na isnyja pazicyi tavaraŭ. Ale kali ty ŭvodziš novy pradukt, to i canu možaš pastavić novuju. Naprykład, zamiest ściahna kurycy možna pradavać miakać ściahna. I voś užo košt vyšejšy.
Taksama vytvorcy skaračajuć asartymient dla ŭnutranaha rynku i starajucca jak maha bolš pastaŭlać na źniešni. U pryvatnaści, u Rasiju, dzie ceny nie rehulujucca. Tamu časta tych praduktaŭ, što vy kuplali raniej, moža i nie być».
Nahadajem, dziaržrehulavańnie cenaŭ praciahnuli da 31 śniežnia 2021 hoda. Ale pry hetym MARH budzie dazvalać padymać ceny pry nieabchodnaści, jak heta było z alejem, rysam i miasam.
