Jon abvinavačvaŭsia ŭ machlarstvie i pieravyšeńni ŭłady abo słužbovych paŭnamoctvaŭ, piša BiełTA.
Uładzimira Dudarava pryznali vinavatym u złačynstvach, praduhledžanych č. 3 art. 426, č. 4 art. 209 KK. «Dziejańni, učynienyja Uładzimiram Dudaravym, jaŭna vychodzili za miežy jaho słužbovych paŭnamoctvaŭ i paciahnuli istotnuju škodu dziaržavie i hramadskim intaresam», — adznačyli ŭ sudzie.
U 2006 hodzie Uładzimir Dudaraŭ, słužbovaja asoba harvykankama, byŭ abrany staršynioj žyllova-budaŭničaha kaapieratyva «Centr Dom» (ŽBK). Paviedamlajecca, što ŭ 2008-m jon, vykarystoŭvajučy svajo stanovišča, niezakonna zavałodaŭ techničnym paviercham nad svajoj kvateraj, koštam bolš za 413 młn niedenaminavanych rubloŭ. Paśla hetaha biez pahadnieńnia členaŭ ŽBK unios źmieny ŭ prajektna-kaštarysnuju dakumientacyju doma.
U 2015-m jon byŭ na pasadzie načalnika adździeła budaŭnictva Mahiloŭskaha harvykankama. Dla svajho baćki jon znajšoŭ adnapaviarchovy draŭlany dom na vulicy Vierbavaj i dapamoh aformić kuplu-prodaž. Abjekt u adpaviednaści z hienpłanam abłasnoha centra znachodzicca ŭ łandšaftna-rekreacyjnaj zonie, dzie zabaroniena pašyreńnie i budaŭnictva novaj siadzibnaj zabudovy. Dudaraŭ pra heta viedaŭ, adnak ad imia svajho baćki źviarnuŭsia da IP dla padrychtoŭki prajektna-kaštarysnaj dakumientacyi, kab pačać budaŭničyja pracy na miescy nabytaha doma. IP zrabiła prajekty. Paźniej, u 2017-m, Dudaraŭ źviarnuŭsia da načalnika ŭpraŭleńnia architektury i horadabudaŭnictva i pierakanaŭ jaho ŭzhadnić prajekt. Paśla ŭzhadniŭ sa słužbovymi asobami TAA «HradBudAljans» pracy na učastku. Heta kvalifikavałasia jak samavolnaje budaŭnictva.
Z 21 vieraśnia 2018 hoda pa 7 žniŭnia 2019-ha Dudaraŭ byŭ na pasadzie namieśnika staršyni harvykankama. U krasaviku 2019-ha jon daŭ ukazańnie načalniku ŭpraŭleńnia architektury i horadabudaŭnictva nie pryciahvać da administracyjnaj adkaznaści svajho baćku za samavolnaje budaŭnictva pa skarzie adnaho z žycharoŭ Mahilova i nie znosić pabudovy. Z metaj lehalizacyi samavolnaha budaŭnictva arhanizavaŭ składańnie defiektnaha aktu TAA «HradBudAljans» ab razbureńni padmurka nazvanaha doma, što nibyta i pasłužyła pryčynaj ŭźviadzieńnia novaj pabudovy.
U mai 2020 hoda Dudaraŭ staŭ abłasnym kaardynataram inicyjatyŭnaj hrupy Viktara Babaryki, ale ŭ červieni taho ž hoda byŭ zatrymany.
