Mabilnik Łarysy Tankaškur byŭ kanfiskavany ŭ palitźniavolenaj paśla zaviadzieńnia na jaje kryminalnaj spravy. Telefon kanfiskavali pavodle prysudu i paźniej vystavili na prodaž u kramie kanfiskatu. Ale ciapier jon znoŭ u domie Łarysy Tankaškur i čakaje jaje viartańnia ź viaźnicy, piša «Radyjo Svaboda».
«Pazvaniŭ nieviadomy čałaviek. Skazaŭ, što kupiŭ hety mabilnik u kramie kanfiskatu, moj numar zachavaŭsia, i jon jaho nabraŭ, kab prosta vyśvietlić historyju taho telefona. A jak daviedaŭsia, čyj heta mabilny, dyk sam prapanavaŭ, što viernie jaho biez usialakich umovaŭ. Mabilnik užo doma. Voś takaja ŭ nas dobraja navina. Łarysa vierniecca, a telefon jaje ŭžo čakaje, možna budzie chutka źviazacca z usimi ludźmi, ź jakimi raniej jana kantaktavała», — paviedamiła svajačka Łarysy Tankaškur.
Paštarka ź Minska Łarysa Tankaškur ź lipienia adbyvaje trochmiesiačnaje źniavoleńnie za vydavańnie pryvatnych źviestak milicyjantaŭ, jakija pražyvajuć na ŭčastku, dzie jana pracavała. Na sudzie Łarysa Tankaškur patłumačyła svoj učynak abureńniem dziejańniami siłavikoŭ, jakija bili pratestoŭcaŭ. Žančyna całkam pryznała vinu.
Adbyvaje pakarańnie Łarysa Tankaškur u Baranavickim aryštnym domie, jaki znachodzicca na terytoryi Baranavickaha SIZA. U pieršyja dva miesiacy aryštu ŭ palitźniavolenaj byli prablemy ź listavańniem. Taksama na ŭmovach adbyćcia pakarańnia adbiłasia toje, što jaje adrazu pryznali «schilnaj da ekstremizmu».
Dniami svajaki atrymali ad jaje čarhovy list.
«Pisać asabliva niama pra što. Hałoŭnaje, što kalektyŭ u kamiery padabraŭsia dobry, mnie pašancavała. Ale čas idzie marudna, choć i jość pra što pahavaryć. Hulajem u šaški, čytaju knihi. Vyvodziać na prahułki i ŭ duš, staŭleńnie da nas dobraje. Usio astatniaje pry sustrečy abmiarkujem», — napisała Łarysa ŭ apošnim liście svajakam.
Termin aryštu dla Łarysy Tankaškur zakančvajecca 30 vieraśnia.
«Kali joj drenna, piša, što pryśniłasia mama». Jak adbyvaje aryšt paštarka, pakaranaja za publikacyju adrasoŭ milicyjantaŭ
«Mnie susiedzi dapamahajuć». Jak rychtujecca da aryštu paštarka, jakaja apublikavała imiony padpisčykaŭ milicejskaj haziety
