Cimur Hazizaŭ ź blizkimi paśla prysudu. Pobač — maci Nadzieja
Pavodle abvinavačańnia, na masavym mierapryjemstvie 4 kastryčnika 2020 hoda Cimur Hazizaŭ naŭmysna pieraškadžaŭ pracy transpartu, błakavaŭ darohu, nie padparadkoŭvaŭsia zakonnym patrabavańniam supracoŭnikaŭ. Jon dziejničaŭ sumiesna i ŭzhodniena z hrupaj asob na praśpiekcie Dziaržynskaha z 16:40 da 18:40.
Cimur nie pryznaje vinu i ŭpeŭnieny, što nie ździajśniaŭ złačynstva.
Na pasiadžeńni 20 vieraśnia Hazizaŭ dapoŭniŭ svaje pakazańni: jon adznačyŭ, što abvinavaŭca ŭnios u spravu šmat lišniaj infarmacyi, jakaja nie datyčycca spravy. Palitviazień adznačyŭ, što jahony aŭtamabil taksama byŭ zabłakavany razam z hramadskim transpartam, a takasama toje, što jon u toj dzień płanavaŭ svoj maršrut udalečyni ad centra horada.
U apošnim słovie Cimur Hazizaŭ raspavioŭ, što pakładzienyja ŭ asnovu abvinavačańnia listavańni ŭ telehram-čatach z deputatami i asabistyja pracoŭnyja pieramovy tolki padkreślivajuć, što jon žyŭ i dziejničaŭ zakonnymi mietadami i naładžvaŭ suviazi z pradstaŭnikami ŭłady. Jon upeŭnieny, što heta pakazvaje jaho jak aktyŭnaha žychara krainy, a nie čałavieka, jaki schilny da dekstruktyŭnaj abo ekstremisckaj dziejnaści. Pa jahonych słovach, heta mohuć padkreślić jahonyja dačka, byłaja žonka, siamja, kalehi.
«Ja pravioŭ bolš za piać maksimalnych administracyjnych terminaŭ za ŭdzieł u niejkim niesankcyjanavanym mierapryjemstvie, — skazaŭ Hazizaŭ. — Heta pazbaviła mianie mahčymaści bačyć svajo dzicia i padtrymać baćku… Vakoł šmat pišuć pra jadnańnie, ale paralelna ja sutyknuŭsia z tym, što prysud prapisany niezaležna ad vinavataści. Chočacca raźličvać, što Vysoki sud uličyć uskosnyja dokazy vinavataści i niaznačnaść administracyjnaj praviny i vyniesie spraviadlivaje rašeńnie».
