Transpartny padatak pryjšoŭ na źmienu dziaržpošlinie, jakuju raniej płacili pry prachodžańni techahladu. Novy padatak adnosicca da katehoryi majomasnych.
Kali kazać prosta: ciapier płaciać nie za toje, što jeździać pa darohach, a za toje, što va ŭłasnaści jość transpartny srodak. Pry hetym usio roŭna, karystajeciesia vy svajoj mašynaj kruhły hod ci jana amal uvieś čas staić u haražy — płacić usio roŭna pryjdziecca.
Ahulnaje praviła takoje: kali ŭ bazie DAI MUS na vas zarehistravany jaki-niebudź transpartny srodak, vy źjaŭlajeciesia płacielščykam padatku.
Pieraličyć hrošy ŭ kaznu treba za kožny aformleny na vas aŭtamabil.
Nie treba płacić padatak na transpartnyja srodki, jakija znachodziacca va ŭhonie, byli vypuščanyja nie paźniej za 1991 hod, abstalavanyja dla vykarystańnia invalidami, a taksama źniatyja z uliku da 1 lipienia 2021 hoda. Nie płaciać padatak na aŭto i ŭładalniki elektrakaraŭ.
Kali mašyna kuplena ŭ kredyt ci lizinh
Z kredytnaj mašynaj usio prosta: navat kali jana znachodzicca ŭ załohu ŭ banka, jaje ŭłaśnikam źjaŭlajecca toj, chto atrymaŭ kredyt. Jon i budzie płacielščykam transpartnaha padatku.
Płacić pryjdziecca i za aŭto, aformlenaje ŭ lizinh.
— Pry pieradačy transpartnaha srodku ŭ finansavuju arendu (lizinh) płacielščykam transpartnaha padatku budzie lizinhaatrymalnik, — udakładniajuć u Ministerstvie pa padatkach i zborach.
Kamu vystaviać rachunak?
Łohika majomasnych padatkaŭ u našaj krainie takaja: sioleta my płacim za toje, čym vałodali letaś. Tamu ciapier sumy da apłaty vystaŭlajuć tym, chto pavodle źviestak na 1 studzienia 2021 hoda nie atrymaŭ dopusku da ŭdziełu ŭ darožnym ruchu (nie prachodziŭ techahlad). Pavodle źviestak MPZ, takich naličyli kala 2 młn čałaviek.
Pakolki hety hod u płanie vypłaty transpartnaha padatku źjaŭlajecca pierachodnym, usim aŭtaŭładalnikam vystaviać adnolkavuju sumu ŭ 1 bazavuju vieličyniu (29 rubloŭ). Za pryčep, pryčep-daču i matacykł — 20 rubloŭ. Heta tak zvany avansavy płaciež. Raźličycca z kaznoj treba da 15 śniežnia 2021 hoda.
A ŭžo ŭ nastupnym hodzie astatniuju sumu padatku raźličać dla kožnaj kankretnaj mašyny.
Sioleta paviedamleńni ad padatkovaj pryjduć da 15 listapada, ale niekatoryja aŭtaŭładalniki ŭžo mohuć ubačyć naličanyja sumy ŭ ARIP.
Z 2022 hoda paviedamleńni buduć prychodzić da 1 vieraśnia, a vypłacić padatak treba budzie da 15 listapada.
A kali paśpieŭ prajści techahlad da 2021 hoda i zapłaciŭ dziaržpošlinu?
Takim aŭtaŭładalnikam sioleta płacić padatak budzie nie treba. A voś dalej usio budzie zaležać ad terminu dziejańnia atrymanaha dazvołu na dopusk da ŭdziełu ŭ darožnym ruchu.
Naprykład, uładalnik novaha aŭtamabila ŭ lipieni 2020 hoda prajšoŭ techahlad i, jak i naležyć, zapłaciŭ padatak na 2 hady napierad. Termin dziejańnia dazvołu zakančvajecca ŭ lipieni 2022 hoda. Za 2021 hod padatku da vypłaty nie budzie, za 2022 hod suma budzie raźličanaja z 1 žniŭnia da 31 śniežnia, ale vypłačvać jaje treba budzie tolki ŭ 2023 hodzie.
Kali ž techahlad dziejničaŭ, naprykład, da lipienia 2021 hoda, to ŭ hetym hodzie padatak płacić nie treba, a ŭ nastupnym hodzie pryjdzie płaciež za pieryjad z 1 žniŭnia pa 31 śniežnia 2021 hoda.
Za jakuju mašynu kolki płacić?
Pamier padatku dla lehkavych aŭtamabilaŭ zaležyć ad dazvolenaj maksimalnaj masy. Naprykład, dla mašyny masaj da 1,5 tony staŭka składzie 61 rubiel, ad 1,5 da 1,75 tony — 81 rubiel i h. d.
Važny momant: dziaržpošlina, jakuju aŭtaŭładalniki płacili raniej, bolš za transpartny padatak. Adnak, navat kali vy pierapłacili, hrošy vam nie viernuć.
— Dziaržaŭnaja pošlina za vydaču dazvołu viartańnia abo zaliku całkam abo častkova nie padlahaje. Reč u tym, što jurydyčna značnaje dziejańnie, za jakoje jana vypłačanaja, užo ździejśniena, — tłumačać u Ministerstvie pa padatkach i zborach. Vyklučeńniem buduć tolki tyja situacyi, kali dziaržpošlinu čałaviek paśpieŭ vypłacić, naprykład, u śniežni 2020 hoda, a prachodzić techahlad pajechaŭ užo ŭ studzieni 2021 hoda — heta značyć paśla admieny pošliny.
U hetym vypadku padatak buduć vystaŭlać u zaležnaści ad kolkaści miesiacaŭ, na praciahu jakich aŭtamabil byŭ u vašaj ułasnaści.
Pry hetym važna, kab mašyna była nie tolki źniataja z uliku, ale i aformlena na novaha ŭłaśnika. Pry prodažy mašyny biez afarmleńnia (naprykład, pa rachunak-daviedcy), vy budziecie ličycca jaje ŭłaśnikam i padatak treba budzie płacić vam. Padatak buduć naličvać da taho času, pakul vy nie damoviciesia z pakupnikom ab tym, kab jon aformiŭ mašynu naležnym čynam.
A kali mašyna pieratvaryłasia ŭ aŭtachłam?
Kab nie płacić padatak, jaje možna ŭtylizavać u sproščanym paradku. Zrabić heta možna pa zajaŭnym pryncypie biez pradastaŭleńnia aŭtamabila i jakich-niebudź dakumientaŭ u DAI. Kali na praciahu apošnich troch hadoŭ mašyna nie ŭdzielničała ŭ darožnym ruchu, jaje zdymuć z uliku. Havorka idzie ab tym, što aŭtamabil za hety čas nie strachavaŭsia i nie prachodziŭ pa bazie administracyjnych pravaparušeńniaŭ.
Ilhoty — tolki tym, u kaho jość pravy kiroŭcy
Jość katehoryi hramadzian, jakija buduć płacić transpartny padatak pa lhotnaj staŭcy. Naprykład, dla piensijanieraŭ praduhledžana źnižka 50%. Praŭda, skarystacca joju možna budzie tolki, kali jość paśviedčańnie kiroŭcy patrebnaj katehoryi.
Ci budzie DAI praviarać apłatu padatku?
Nie, DAI da transpartnaha padatku nijakaha dačynieńnia nie maje. Usie pretenzii pa niavypłacie vam buduć vystaŭlać padatkovyja orhany. Za niavypłatu padatku budzie naličvacca pienia za kožny dzień praterminoŭki.
