«Strymlivać ceny aznačaje rasstralać rytejł, — u toj ža čas kažuć «Našaj Nivie» rytejlery i pastaŭščyki. — Adbyvajecca štotydniovy rost cen na paliva, pavyšeńnie cen na syravinu i ŭpakoŭku.
Upakoŭka ŭvohule asobnaja tema, pradukty naftachimii sioleta vyraśli ŭ canie na 40-70%. Indeks budoŭli vyras na 40-70%, a va ŭsich budaŭnictva, va ŭsich inviestpłany. Dziki raschod srodkaŭ hihijeny ŭ čas epidemii. Vytvorcam ničoha nie zastajecca, jak šukać varyjanty abychodu pastanovy, bo treba płacić zarobki ludziam i kredyty bankam».
Nam patłumačyli, jak štučnaje strymlivańnie cen adbivajecca na stanie hamancoŭ biełarusaŭ, a taksama jakija isnujuć łajfchaki dla abychodu abmiežavańniaŭ.
«Najpierš treba razumieć, što z umoŭnaj paŭtary tysiačy najmieńniaŭ, jakija pradajucca ŭ supiermarkiecie, ceny nielha padymać na 62. A heta značyć, što «dabirać» rytejł usio adno budzie — prosta na inšych praduktach i napojach. Nielha padymać canu na jajki? Padymiem na vino, vy ŭsio adno zapłacicie, heta iluzija», — kaža pradstaŭnik rytejłu.
«Ciapier, naprykład, na miasa i kaŭbasnyja vyraby dazvolili padniać canu na 4,9%. Chtości hetym karystajecca i padymaje prejskurantnuju canu, paralelna admianiajučy akcyi.
To-bok u lutym atrymałasia tak, što ty ŭzhadniŭ akcyju -20%, i tut nabyła moc pastanova pa abmiežavańni cen, i MARH tłumačyŭ: niavažna — akcyja, nie akcyja, cana na palicy źmianicca nie pavinna. Atrymlivajecca, ciaham paŭhoda pastaŭlaŭsia tavar pa akcyjnaj canie abo zusim nie pastaŭlaŭsia. A ciapier niekatoryja vyrašyli pad temu pavyšeńnia pasprabavać admianić voś takija akcyi, što daje bolšy rost».
«Jość varyjant vypuścić anałahičny pradukt z padobnaj nazvaj, nieistotna źmianiŭšy recepturu — heta ŭžo pa ŭsich kryteryjach akazvajecca novy pradukt, z novym dakumientam jakaści i canoj.
Atrymlivajecca, canu my nie pavyšali, a prosta vyvieli na rynak novy pradukt, — raskazvaje naš surazmoŭca jašče adzin łajfchak. — Taksama pry kožnym abłvykankamie jość kamisija, jakaja razhladaje zvaroty ab padniaćci cen.
To-bok u ramkach hetaj pastanovy padvyšać možna, kali ty dakažaš abhruntavanaść pavyšeńnia. Naprykład, inhredyjenty praduktu, jakija my impartujem, padaraželi na 55%. Tut vybar abo zdymać tavar z prodažu ŭvohule, abo damaŭlacca ab uzhadnieńni adpusknoj cany».
Taksama surazmoŭcy dadajuć, što va ŭmovach abmiežavańnia składvajecca deficyt asobnych tavaraŭ.
«Naprykład, ptuška — ciapier deficyt, znajści pastaŭščyka z dobrymi abjomami — vializnaja prablema. Čamu tak adbyvajecca? Tamu što niama sensu vytvorcu pradavać jaje tut, dzie rytejł ničoha nie moža zapłacić, bo pradaje z rehulavanaj nadbaŭkaj i vajuje z pastaŭščykami za pracent. Ptuška pajšła ŭ Rasiju, dzie płaciać bolš, tak my na spravie nazirajem pryvid poźniaha kamunizmu», — reziumujuć dziejačy rytejłu.
Čytajcie taksama:
Miasa — amal na 30%, małako — na 18%. Pahladzieli, jak źmianilisia ceny paśla «zamarozki»
