Ministr nazvaŭ sankcyi baraćboj za rynki. Na jaho dumku, krainy-kankurenty ŭdaryli pa tych pradpryjemstvach, jakija prajšli madernizacyju i stali kankurentazdolnymi. Jon nazvaŭ «Amkador», BiełAZ, MAZ. Adnak biełaruskija pradpryjemstvy znachodziać vychad ź situacyi, paviedamlaje reform.by.
«BiełAZ vielmi mocna zaviazany na ruchaviki ŭnutranaha zharańnia, jakija vyrableny ŭ Złučanych Štatach Amieryki. I zrazumieła, što siońnia jość abmiežavańni pa pastaŭcy hetych ruchavikoŭ. Ale siońnia BiełAZ užo kataje karjernyja samazvały, jakija pracujuć na inšych enierhietyčnych srodkach. Heta i hazavyja ruchaviki, jakija vyrablajucca ŭ Rasijskaj Fiederacyi, heta vykarystańnie akumulatarnych batarej, jakija nie vyrablajucca ŭ Jeŭropie, a vyrablajucca ŭ Azii: Kitaj, Kareja. Vielmi važna, što hetyja elemienty ŭ najbližejšy čas — my pierad saboj stavim zadaču — vyrablalisia ŭ našaj krainie. Kab voś hetaja zaležnaść, tak zvanaja, ad jeŭrapiejskich krain była jak maha mienšaja», — skazaŭ Parchomčyk.
Jon nie ŭdakładniŭ, pra jakija mienavita ruchaviki idzie havorka, nie nazvaŭ ich mahutnaść, a taksama madeli karjernych samazvałaŭ, jakija pieraviedzienyja na hazavyja matory z Rasija. Treba adznačyć, što ŭ mai hetaha hoda BiełAZ aficyjna paviedamlaŭ ab zapusku sieryjnaj vytvorčaści samazvała BIEŁAZ 7513-z z hazadyzielnym ruchavikom.
Pry hetym u pres-relizie zavoda zhadvałasia, što 136-tonnaja mašyna kamplektujecca amierykanskim ruchavikom Cummins KTA50-C. Da hetaha paviedamlałasia, što zavod vypraboŭvaŭ 45-tonny samazvał z hazaporšnievym ruchavikom rasijskaj vytvorčaści. Płanavałasia pastavić takija matory na 90 i 120-tonnyja mašyny. U hetym hodzie Biełstat aficyjna spyniŭ publikacyju statystyki ab eksparcie i imparcie transpartnych srodkaŭ i pradukcyi mašynabudavańnia.
Parchomčyk pryznaŭ, što z-za sankcyj biełaruskija pradpryjemstvy vymušanyja admaŭlacca ad vysakajakasnych jeŭrapiejskich kamplektujučych i zamianiać ich pastaŭkami ad inšych vytvorcaŭ.
«Idzie zamiena kamplektujučych. Ja adrazu skažu, što my pierachodzim, nu skažam, ad vysakajakasnych (ja heta nie chavaju) jeŭrapiejskich kamplektujučych na kamplektujučyja inšych vytvorcaŭ. Heta znoŭ ža azijackija krainy, heta Kitaj, heta Turcyja. Nu, kažu, niechta straciŭ, niechta znojdzie. Niama sumnievaŭ, što nivodnaje pradpryjemstva nie spynicca», — skazaŭ Parchomčyk.
Ministr dadaŭ, što łakalizacyja traktaroŭ składaje 75%. Heta tyčycca nie ŭsich madelej. U niekatorych dola impartu bolš. Jon taksama adznačyŭ, što vyrasła łakalizacyja biełaruskich kambajnaŭ, jakaja raniej składała 20-30%.
