Naradziŭsia ŭ vioscy Krasnaja Hara Krasnahorskaha rajona Branskaj vobłaści ŭ 1978-m. Baćki pracavali ŭ miascovaj arhanizacyi ahrarnaha kompleksu. Jak jon apynuŭsia ŭ Biełarusi, nie da kanca jasna.
Zhodna z materyjałam za 2014 hod u rajoncy «Prystaličča», «Padvojski pryniaŭ rašeńnie pastupić u Minskuju suvoraŭskuju vučelniu, baćki padtrymali rašeńnie syna, tak z rańniaha ŭzrostu pačaŭ hartavacca charaktar, bo, kab ažyćciavić maru, junamu Iharu naležała pierajechać z Rasii ŭ Biełaruś».
Pry hetym u aficyjnaj bijahrafii śćviardžajecca, što pierad Suvoraŭskaj jon vučyŭsia ŭ Samachvałavickaj siaredniaj škole pad Minskam. Niesupadzieńnie.
«U maim žyćci dźvie žarści — siamja i rabota»
Jak i ŭsich vypusknikoŭ Suvoraŭskaj vučelni, u Akademiju MUS Padvojskaha zaličyli pa ŭkazie i biez ekzamienaŭ, amal adrazu abrali kamandziram adździaleńnia 4 uzvoda.
Paśla vypusku jon pracavaŭ śledčym u milicyi, byŭ načalnikam papiaredniaha śledstva ŭ Sienicy, potym słužyŭ u Mačuliščach — zajmaŭsia ałkaholikami, prablemnaj moładździu i vypusknikami turmaŭ. Paśla staŭ načalnikam Mačuliščanskaha adździeła milicyi Minskaha RUUS.
Cikavy fakt ź jahonaj bijahrafii. Z 2014 pa 2018 hod byŭ deputatam pa Mačuliščanskaj vybarčaj akruzie — maŭlaŭ, «bałatavacca paprasili ludzi».
Voś što kazaŭ Padvojski rajoncy «Prystaličča» pra svaju rabotu:
«Heta nievytłumačalna jak kachańnie, ciabie prosta zaciahvaje z hałavoj, i ty nie možaš dumać ni pra što inšaje. Zajmaješsia spravami ŭ pracoŭnym kabiniecie ci jedzieš u mašynie damoŭ — u tvajoj hałavie ŭvieś čas vybudoŭvajucca łancužki, viersii. I adpačynak, jak rastańnie, zdajecca ciažkim: nie chapaje pracoŭnaha drajvu, myślenčaha pracesu. […] U maim žyćci dźvie žarści — siamja i rabota. […] Časam stanovicca horka ad dumki, što vypuskaješ niekatoryja momanty i nie bačyš, jak staleje dačuška.
Ale ŭ toj ža čas uśviedamlaješ, što achviara vysakarodnaja: časam ad tvajoj raboty zaležyć biaśpieka dziaciej u inšych siemjach i ich dabrabyt, a taksama žyćcio».
Z 2017 hoda Padvojski pracavaŭ va ŭpraŭleńni ŭnutranych spraŭ Minskaha abłvykankama. Byŭ navat namieśnikam načalnika milicyi hramadskaha paradku. A praz dva hady jaho pieraviali ŭ HUUS Minharvykankama.
Što tyčycca asabistaha žyćcia, to Padvojski žanaty. Jaho žonka pracuje top-mieniedžarkaj u adnoj ź sietak rytejłu.
Padvojski ŭ vuzkich kołach raskazvaŭ, što zarobak jamu jak by i nie treba — «usio sychodzić na paliva i inšuju drobiaź», žonka — asnoŭny zdabytčyk, a słužba dla jaho jak chobi.
«I Padvojski, i Kazłoŭ — adnaho pola jahady»
U minskuju milicyju Padvojskaha pryvioŭ jaho siabra Kubrakoŭ, ciapier ministr. Siabroŭskija adnosiny ŭ ich zaviazalisia ŭ siaredzinie 2000-ch: Kubrakoŭ z Padvojskim adnačasova (u 2007-m) byli pryznačanyja načalnikami rajonnych milicyj. Kubrakoŭ — Zasłaŭskaj, Padvojski — Mačuliščanskaj. Jany sazvońvalisia, tavaryšavali, abmieńvalisia infarmacyjaj.
Kali Kubrakoŭ uznačaliŭ Minskuju milicyju, to pačaŭ padciahvać u svaju kamandu znajomych sabie kadraŭ.
Ciapierašnija i byłyja kalehi adhukajucca pra Padvojskaha strymana, jany ličać, što ŭ hetym čałavieku prajaŭlajucca dva baki adnoj asoby.
«U Padvojskaha nie było takoha, što davaj, idzi, rubi pałki. Jon navat davaŭ vusnyja rasparadžeńni nie zatrymlivać ludziej, kali jany niešta nadzivačyli nienaŭmysna — bojka tam niejkaja ci jašče što, kali niama paciarpiełych, kali duraść — nu to nie psavać im losy. Abyścisia razmovaj.
Ale kali namierana parušeńnie zakona — zatrymlivać. Kazaŭ, kab usio było «jurydyčna-pryhoža».
Taksama nie nadta aktyŭna reahavaŭ na prydurkavatyja skarhi hramadzian na supracoŭnikaŭ, naprykład «siadzieli na łavačcy, jeli bielašy». Inšy načalnik moh pazbavić za takoje premii, učynić razborki, Padvojski — nikoli», — skazaŭ nam adzin z rabotnikaŭ MUS.
«I Padvojski, i Kazłoŭ — adnaho pola jahady. Abodva lubiać vysłužycca, ale pracaholiki. Z hledzišča arhanizacyi i taktyki rabotu svaju viedajuć, na fonie pierapracovak davodziłasia bačyć niervovyja zryvy i isteryki.
Charaktarystyka asoby i toje, što jany ciapier robiać, tłumačycca doŭhim časam raboty ŭ MAB — abodva mieli kantakty z horšymi słajami nasielnictva, adpaviedna, da ŭsich ludziej pa-za miežami MUS ź ciaham času pačynali stavicca jak da marhinałaŭ i bandytaŭ», — dadaje inšy supracoŭnik.
Čamadanava raniej padparadkoŭvałasia niepasredna Padvojskamu, a praź jaho Kazłovu
Pa našaj infarmacyi, Padvojski i Kazłoŭ znajomyja daŭno. Pieršy byŭ padnačaleny apošniaha doŭhi čas.
Padvojski byŭ načalnikam adździeła achovy i prafiłaktyki Minskaha RUUS, potym staŭ na stupień vyšej — načalnikam milicyi hramadskaj biaśpieki, pieršym namieśnikam načalnika ŭpraŭleńnia.
Kazłoŭ byŭ načalnikam UAPP — upraŭleńnia achovy pravaparadku i prafiłaktyki UUS Minabłvykankama. Takim čynam, Padvojski padparadkoŭvaŭsia Kazłovu.
Vital Kazłoŭ. Fota ctv.by
Darečy, Kazłoŭ pierajšoŭ u vobłaść z adnaho z rajonnych minskich RUUSaŭ. Pa našaj infarmacyi, jaho prasoŭvańniu pa karjernaj leśvicy dapamahaŭ adyjozny načalnik abłasnoj milicyi Ihar Jaŭsiejeŭ, jaki za razhon Płoščy-2010 trapiŭ u sankcyjnyja śpisy.
Ciapier, kali Padvojski namieśnik načalnika HUUS Minharvykankama, a Kazłoŭ namieśnik načalnika UUS Minskaj vobłaści, jany na roŭnych pasadach. Ale ŭsio ž Padvojski ličycca troški «raŭniejšym».
Što cikava, Volha Čamadanava, jakuju hetaja para aktyŭna abmiarkoŭvaje, nie strymlivajučysia ŭ epitetach, doŭhi čas, bolš za 10 hod, była načalnicaj inśpiekcyi pa spravach niepaŭnaletnich Minskaha RUUS. Jana padparadkoŭvałasia niepasredna Padvojskamu, a praź jaho — Kazłovu.
Pa našaj infarmacyi, Čamadanavu hetyja dvoje nie lubili i praz svoj seksizm, i praź jaje zališniuju inicyjatyŭnaść. Kažuć, što Kazłoŭ škodziŭ jaje karjery, zavaročvajučy sproby prasunuć jaje na pasady načalnika milicyi hramadskaj biaśpieki Minskaha RUUS ci načalnika UAPP.
Volha Čamadanava. Fota: belnaviny.by
«U pres-sakratary jana trapiła vypadkova, bo nichto z rabotnikaŭ ideałohii nie chacieŭ zajmać hetuju pasadu, viedajučy, što trapić pad razdaču na joj možna kožny dzień i na roŭnym miescy. Ale ministr patrabavaŭ ukamplektavać hetuju pasadu. Takim čynam, hałoŭny ideołah MUS Eduard Jarašuk, jaki da taho byŭ načalnikam kadraŭ milicyi Minskaj vobłaści, uspomniŭ pra Čamadanavu. Taja pahadziłasia, razumiejučy, što pry Kazłovie naŭrad ci kali jana vybieracca ź Minskaha RUUS ci atrymaje pavyšeńnie», — havorać našy surazmoŭcy.
Takim čynam, Volha Čamadanava pieralacieła praz hałovy dvuch svaich užo byłych načalnikaŭ i stała hałaŭniejšaj za ich. Paśla hetaha, napeŭna, jany stali nie lubić jaje jašče bolš.
Abaznanyja krynicy taksama tłumačać imaviernuju pryrodu źlivaŭ: najchutčej, abjektam prasłuški byŭ Kazłoŭ, bo Karajeŭ pierad vybarami addaŭ kamandu HUUB (ułasnaj biaśpieki) apieratyŭna adpracoŭvać viarchušku milicyi, kab vyjavić mahčymuju niełajalnaść.
Čytajcie taksama:
«Adčyniŭ dźviery, za vałasy vyciahnuŭ z mašyny, nahoj daŭ, b**». Źjavilisia novyja źlivy prasłuški siłavikoŭ
«Ministr kaža, spahnańnie ź mianie, a Hamołu z pasady źniać». U novym źlivie siłaviki abmiarkoŭvajuć pres-sakratarku MUS Volhu Čamadanavu
