«Jość daručeńnie, važnaje vielmi. Natalli Ivanaŭnie pastupiła, i mnie, i vam, i Alaksandru Piatroviču»
Byłyja siłaviki śćviardžajuć, što pra adklučeńnie vady i ciapła ŭ Novaj Baravoj viedali Natalla Kačanava, Alaksandr Barsukoŭ, Natalla Ejsmant i Dźmitryj Bałaba.
U jakaści dokazaŭ prapanoŭvajuć niekalki aŭdyjazapisaŭ, dzie hałasy, padobnyja da pres-sakratarki Natalli Ejsmant i Dźmitryja Bałaby, abmiarkoŭvajuć Novuju Baravuju.
Nahadajem, žychary rajona dali adpor nieznajomcam, što pryjechali zrazać stužki.
U zapisie, datavanym 10 listapada, hałasy abmiarkoŭvajuć situacyju paśla taho, jak jany źjeździli ŭ Novuju Baravuju.
«Nu, ja prosta ŭvohule, ščyra kažučy, analizuju, i ŭ mianie kiraŭnik padrabiazna raspytvaŭ pra situacyju, jakaja była ŭ Baravoj, — kaža pieršy hołas, padobny da Natalli Ejsmant. — Z vašymi ŭ tym liku treba damaŭlacca, jak dziejničać».
«Viadoma, treba prahavorvać takija rečy adrazu, — adkazvaje druhi hołas, padobny da Dźmitryja Bałaby. — Spantanna ŭ takija rečy leźci nie treba».
«Tamu što tak i atrymałasia. Ja vielmi doŭha dumała, što ŭvohule možna było zrabić, — kaža pieršy hołas. — Što było nie tak i što možna było zrabić lepš. My prosta nie byli hatovyja, my rassłabilisia. Apošnija tydni nas rassłabili — paŭsiul praktyčna było spakojna».
«Paŭsiul usio na ŭra, a tut raz — aktyŭnyja prablemy», — padkazvaje druhi.
«Tak, i tut bach. I viadoma, ja ŭnutrana była niezadavolena vielmi», — kaža pieršy hołas.
A ŭžo potym, jak śćviardžaje abjadnańnie byłych siłavikoŭ, hałasy, padobnyja da Ejsmant i Bałaby, abmiarkoŭvali adklučeńnie aciapleńnia i vady ŭ Novaj Baravoj.
Darečy, pa słovach byłych siłavikoŭ, tady ŭ miascovych čatach Novaj Baravoj źjaviłasia paviedamleńnie kštałtu: zdymicie bieł-čyrvona-biełuju simvoliku — dadzim vodu.
A da hetaha, u zapisie ad 6 listapada hołas, padobny da Natalli Ejsmant, kaža hołasu, padobnamu da Dźmitryja Bałaby, pra niejkaje zadańnie.
«Vam Natalla Ivanaŭna (Kačanava — zaŭv. «NN») zvaniła?» — pytajecca hołas, padobny da Ejsmant.
«Nie, kaniečnie, nie», — adkazvaje hołas padobny da Dźmitryja Bałaby.
Bolš za 18 tysiač minčan abjadnalisia ŭ śpiecyjalny čat pa dapamozie žycharam Novaj Baravoj. Vieźli pitnuju vadu i abahravalniki. Fota: Onliner.by
«Jość daručeńnie, važnaje vielmi. Joj pastupiła, i mnie, i vam, i Alaksandru Piatroviču. (….) Ja dumaju, Natalla Ivanaŭna vam skaža tady. (…) Prosta tam skazana było, što nam treba heta ŭsio vielmi dobra zrabić.
Voś. Nu, tady pahladzim, jak by, patrebna prosta abaviazkova pierahavaryć i spłanavać. Heta patrebna na pačatku tydnia ŭsio zrabić. (…) Zrabić heta patrebna na nastupnym tydni», — adznačaje hołas, padobny da Ejsmant.
Na zapisie, što datavany nastupnym dniom, 7 listapada, hołas, padobny da Ejsmant, kaža, što «patrebna sustrecca i abmierkavać, tamu što ŭ paniadziełak rankam Natalla Ivanaŭna ŭžo zachoča pačuć prapanovy».
Byłyja siłaviki śćviardžajuć, što ŭ vyniku była adklučana haračaja vada i aciapleńnie ŭ rajonie. Nahadajem, pa viersii «Minskvodakanała», złamałasia zapornaja armatura, havorka navat išła pra naŭmysnaje paškodžańnie. Ale potym publična ab vynikach niejkich rasśledavańniaŭ hetaha vypadku havorki nie išło.
«Tavaryš pałkoŭnik, tam SACHR zatrymlivaŭ na Čarviakova čałavieka»
Miarkujučy pa aŭdyjazapisach, dalej havorka pamiž hałasami, padobnymi da Ejsmant i Bałaby, išła pra padrychtoŭku da pajezdki na Płošču Pieramien. Jašče raniejšyja zapisy śviedčać, što peŭnyja «inicyjatyŭnyja» hrupy rehularna jeździli ŭ aktyŭnyja žyllovyja kompleksy — «Miehapolis», «Kaskad», «Novaja Baravaja» i «Płošča Pieramien».
U zapisie ad 10 listapada hołas, padobny da Natalli Ejsmant, vykazaŭsia, što «mianie tut raskrytykavali, što padziei nie skončylisia, a ja tut pa viečarach šmat adpačyvaju».
«Prosta my zaŭtra płanujem, ja spadziajusia, što surjozna. Ja nie lublu, kali mianie krytykujuć», — kaža hołas, padobny da Ejsmant.
«Damovilisia, tady ź Dzimam Šakutam toj ža čałaviek stelefanujecca. Hrupa budzie taja ž, što była ŭ minuły raz», — adkazaŭ na heta hołas, padobny da Bałaby.
Z razmovy na zapisu vynikaje, što budzie hrupa SACHR, a prykryvać jaje budzie AMAP. Z nastupnaha zapisu stanovicca zrazumieła, što hrupy AMAPa dźvie.
Nazaŭtra ŭ 22:13 hołas, padobny da Bałaby, razmaŭlaje z hołasam, padobnym da kamandzira hrupy AMAP Rusłana Kulašova.
«My tut na Čarviakova, pajšli dziaŭčaty tudy rezać. Pakul čakajem. Nibyta, cišynia», — kaža pieršy hołas, padobny da Kulašova.
«Na murale cišynia, nikoha zusim?» — pierapytvaje druhi hołas, padobny da hołasa Bałaby.
«Tak-tak, niešta haŭkajuć z Šokam (eks-siłaviki śćviardžajuć, što heta mianuška Šakuty — zaŭv. «NN»). Ale nichto nie vychodzić», — kaža pieršy hołas.
«Ty ŭ kantakcie ź dźviuma hrupami, tak?» — pytajecca druhi.
«Tak-tak. Tut my ŭsie razam», — adkazvaje pieršy.
Dalej, u 23:32 hołas, padobny da Kulašova, znoŭ razmaŭlaje z hołasam, padobnym da Bałaby.
«Tavaryš pałkoŭnik, tam SACHR zatrymlivaŭ na Čarviakova čałavieka. Jon tam buchi na ich kidaŭsia. My jaho dastaŭlali ŭ Centralnaje (RUUS — zaŭv. «NN»). Dyk tam dziažurka zvaniła, pytałsia: «Što, jak?» Nu, ułasna, my-ta jaho nie zatrymlivali, prosta dastavili. Nu, byccam by, tam usio narmalna», — kaža pieršy hołas, padobny da Kulašova.
«Šok i abureńnie. Mama siadzić, płača». Siastra Ramana Bandarenki prakamientavała prypynieńnie spravy ab zabojstvie brata
«Dastavili, jany ž tam u temie, usie ŭ kursie. Tamu nijakich prablem niama, dastavili, chaj raźbirajucca tam pa im. (…) A mocna tam buchi na Čarviakova?» — pierapytvaje druhi hołas, padobny da Bałaby.
«Tak, my jaho pakul vieźli, jon zasnuŭ» — kaža pieršy hołas.
«Pryhažunčyk, vy jaho choć pazdymali krychu, nie?» — pytaje druhi.
«A jon užo jość. Videa zdymali žychary miascovyja, užo i na Niechtu vykinuli», — kaža pieršy.
«Nie Niechcie jość užo?» — pierapytvaje druhi.
«Tak-tak-tak, my hladzieli, jak jon vałtuziŭsia», — paćviardžaje pieršy.
«Z kim jon tam vałtuziŭsia, z chłopcami?» — pytajecca druhi.
«Tak-tak. Pa-mojmu, ź Dzimam, ja tak zrazumieŭ», — adkazvaje pieršy.
«Z Šakutam?» — pieraptyvaje druhi.
«Aha», — paćviardžaje pieršy.
Byłyja siłaviki śćviardžajuć, što, kali Bandarenku pieradali supracoŭnikam AMAPa, jon byŭ užo ŭ ciažkim stanie, tamu hety stan i pryniali za apjanieńnie. I, jak viadoma raniej, nie ŭ stanie ałkaholnaha apjanieńnia.
Nahadajem, užo potym, kali dziažurny Centralnaha RUUS u druhi raz pazvaniŭ u «chutkuju», jon paviedamiŭ, što pachu ałkaholu ad Ramana Bandarenki nie čutno.
«Ja tak miarkuju, što heta Šakuta niedzie tam prykłaŭsia»
Dalej byłyja siłaviki pryvodziać zapis razmovy hałasoŭ, padobnych da Dźmitryja Bałaby i kapitana milicyi Hienadzia Mołaša. Hety zvanok, jak śćviardžajecca, adbyŭsia 12 listapada ŭ 7:54.
«Pa dastaŭlenym toje, što vy mnie pisali, što tam?» — pytajecca pieršy hołas, padobny da Bałaby.
«U jaho ciažkija cialesnyja paškodžańni. ČMT ciažkaj stupieni. Jamu trepanacyju čerapa zrabili ŭ BSMP», — adkazvaje druhi hołas, padobny da Mołaša.
«Je*, tvaju mać», — emacyjna ŭsklikvaje pieršy hołas.
«89 hoda naradžeńnia. Proźvišča — Bandarenka. Raman Iharavič», — kaža druhi.
«Našy jaho tolki zabrali z Płoščy Pieramien?» — pytajecca pieršy.
«Tak-tak, zabrali. Z busa SOBRa zabrali ŭ naš bus i źvieźli jaho ŭ Centralnaje RUUS», — paćviardžaje druhi.
«Usio zrazumieła, dobra. A jon nie skardziŭsia pa darozie? Ničoha?» — zadaje pytańni pieršy.
«Nu, skardziŭsia… Uvohule, jany dumali, što jon pjany byŭ. Jak akazałasia, drenna było», — adkazvaje druhi.
Byłyja siłaviki śćviardžajuć, SACHR pieradaŭ Ramana Bandarenku AMAP užo ŭ ciažkim stanie.
U 7:56 taho ž ranku, jak miarkuje abjadnańnie siłavikoŭ, adbyŭsia inšy zvanok. Hołas, padobny da Dźmitryja Bałaby, kamunikavaŭ z hołasam, padobnym da načalnika staličnaj milicyi Michaiła Hryba.
«Bojka na Płoščy Pieramien. Zabrali ŭ SACHRa z busa čałavieka. (…) Dastavili ŭ Centralnaje. Kamandzir hrupy pierakonvaje, dumali, što byŭ pjany. Tamu dastavili ŭ Centralnaje, pieradali i źjechali. Nu, i dalej dapracoŭvali. Ja sam byŭ niedzie na Dziaržynskaha. Źjechaŭ kala hadziny nočy. Ja tam byŭ z kamandaj», — kaža hołas, padobny da Bałaby.
«Ja tak razumieju, «S» (eks-siłaviki miarkujuć, što tak u razmovie abaznačali pres-sakratarku Natallu Ejsmant — zaŭv. «NN») tam taksama była, da?» — udakładniaje hołas, padobny da Hryba.
«Tak-tak, viadoma. Mienavita tam i była bojka. I jość videa tam. Ja tak miarkuju, što heta Šakuta niedzie tam prykłaŭsia. Užo niekalki videa jość u internecie. Našy jaho palcam nie kranuli, hetaha čałavieka», — kaža pieršy hołas.
— (…) Ja hrupu da hetaha źvioŭ napramuju z SACHRam. A zvanok mnie byŭ učora. (…) Jany pastajanna ich prykryvajuć, ź imi hrupa ŭvieś čas. Naša zadača — padstrachoŭka. Kali vialikaja kolkaść, nu i zabrać-dastavić u RUUS».
Taksama abjadnańnie apubličyła i aŭdyjazapis z hałasami, padobnymi da Bałaby i Kulašova. Śćviardžajecca, što zapis byŭ zrobleny 12 listapada ŭ 11:20.
«Rusłan, hladzi, zadača jakaja. Prosić śledstva chutka vas aprasicca»
Taksama abjadnańnie apubličyła i aŭdyjazapis z hałasami, padobnymi da Bałaby i Kulašova. Śćviardžajecca, što zapis byŭ zrobleny 12 listapada ŭ 11:20.
«Rusłan, hladzi, zadača jakaja. (…) Davaj z taboj pa paradku prahavorym. Prosić śledstva chutka vas aprasicca. Tak, jak ty mnie dakładvaŭ.
Tam situacyja: atrymali vyklik, pa 102, nieśli słužbu tam-ta, padjechali, ubačyli cieła ŭ rajonie prypynku, dzie vy jaho tam zabirali, u rajonie prypynačnaha punktu, bł***?» — kaža pieršy hołas, padobny da Bałaby.
«Tak-tak-tak», — adkazvaje druhi hołas, padobny da Kulašova.
«U šalonym stanie. Acanili situacyju. Pryniali rašeńnie. Dumali, što ŭ stanie ałkaholnaha apjanieńnia. Dastavili ŭ Centralnaje rajonnaje ŭpraŭleńnie. Pieradali. Adbyli nieści słužbu dalej. Voś, nie razmazvajučy, jak było nasamreč. Sam i z taboj paru čałaviek. Ale heta treba zrabić vielmi apieratyŭna. (…) mnie zvaniŭ namieśnik načalnika śledstva horada», — kaža pieršy hołas.
«Tut niama čaho raskryvać». Dva dziejnyja siłaviki prakamientavali prypynieńnie spravy Bandarenki
Jašče adna razmova, jak miarkujuć byłyja siłaviki, adbyłasia 12 listapada ŭ 22:24. Hołas, padobny da Bałaby, pytaŭsia ŭ hołasa, padobnaha da Kulašova, jakija toj daŭ pakazańni.
«Nieśli słužbu ŭ Centralnym rajonie. Prykładna ŭ 22:30 pastupiła pa stancyi «Vizit», što bojka na Čarviakova, 60. Vybyli tudy, krutanulisia pa miescy, ale bojki nie znajšli. Tam bačyli, uazik milicejski jeździŭ i tudy, i potym, kali nazad źjazdžali, ubačyli — cieła lažyć.
Padyšli, pahladzieli — čałaviek biez prytomnaści. Pach ałkaholu adčuvaŭsia. Nu, chrop, byccam by spaŭ. Nu to-bok jak, realna nibyta jon tam pjany byŭ. Usio. Źviazalisia z našaj ADS (apieratyŭna-dziažurnaj častkaj — zaŭv. «NN»). A jany źviazalisia z «Brestam». «Brest» daŭ kamandu dastavić u «Centralnaje». Zavieźli ŭ «Centralnaje», centralniki vyklikali chutkuju — usio, my źjechali», — adznačaje hołas, padobny da Kulašova.
«Adzinaje, što tut rabić, viadoma, patrebna było padźniać (videa — zaŭv. «NN»). U lubym razie ŭvieś čas treba było zdymać», — padsumoŭvaje hołas, padobny da Bałaby.
Jak zaŭvažajuć byłyja siłaviki, hołas, padobny da Kulašova, nie skazaŭ infarmacyi pra toje, što Bandarenka AMAPu pieradali SACHR.
Nahadajem, u minułych rasśledavańniach abjadnańnie byłych siłavikoŭ užo pieraličyła imiony tych, chto ŭ toj viečar byŭ u dvary na Płoščy Pieramien. Śćviardžajecca, što ich vyličyli pa bilinhu telefonnych numaroŭ.
Pavodle źviestak byłych siłavikoŭ, heta Dźmitryj Baskaŭ, Dźmitryj Šakuta, Natalla Ejsmant, Hanna Ejsmant, Pavieł Voŭčak, Žanietta Voŭčak.
A taksama supracoŭniki SACHR Siarhiej Sarman, Siarhiej Anciufiejeŭ, Aleh Bujkievič, Raman Savienka, Jaŭhien Cimanoŭski.
I supracoŭniki AMAP Rusłan Kulašoŭ i Raman Kryvašein.
Z usich vyšejpieraličanych situacyju prakamientavała tolki viadučaja Hanna Ejsmant. Jana zajaviła, što ŭ momant źbićcia Ramana Bandarenki nie znachodziłasia na Płoščy Pieramien, a była ŭ pramym efiry. Astatnija ad kamientaroŭ ustrymalisia.
Siłavyja struktury ad kamientaroŭ nakont apublikavanych źlivaŭ ustrymlivajucca. Jak tolki jany daduć kamientary na hety kont, my ich abaviazkova apublikujem.
