Žančynu zavuć Maryja Uśpienskaja, joj 40 hadoŭ. Zielcer jaje druhi muž, ad minułaha šlubu Maryja maje syna-školnika. Padčas pierastrełki mały byŭ u himnazii.
Uśpienskaja pracavała ekanamistam, paśla — zvyčajnaj pradavačkaj u sietkavaj kramie. Ciapier pacichu vučyłasia na teściroŭščyka, vučyła anhlijskuju.
Kvatera, u jakoj usio adbyłosia, naležyć maci Maryi. «Naša Niva» havaryła ź joj, taja kaža, što Maryja «nie vykazvała niejkich radykalnych ci ahresiŭnych dumak». Pa jaje słovach, ničoha ŭ jaje pavodzinach nie abiacała takoha finału.
Viadoma, što Uśpienskaja źbirała podpisy za Cichanoŭskuju ŭ 2020 hodzie. Ale ž, kažuć, udzielničać u pratesnych akcyjach nie chacieła, bajałasia praz małoha syna.
Juryst: «Pa Kryminalnym kodeksie, saŭdzielnik — heta vykanaŭca albo ci to arhanizatar, ci to padbuchtorščyk, ci to pamahaty»
Ciapier Uśpienskaja zatrymanaja, pa słovach svajakoŭ, znachodzicca na Akreścina. Śledčy kamitet paviedamiŭ, što Maryja «pravodziła videazdymku złačynstva i sadziejničała jaho ździajśnieńniu, zatrymanaja pa padazreńni ŭ saŭdziele ŭ zabojstvie supracoŭnika KDB».
Na videa, jakoje apublikavali dziaržSMI, bačna, što Maryja sapraŭdy znachodzicca pobač z mužam. Ale ŭ Andreja Zielcera ŭ rukach strelba, a ŭ žančyny — zvyčajny telefon. U čym saŭdzieł u zabojstvie? I za što jaje mohuć asudzić?
Spytali ŭ jurysta Andreja Mačałava.
«Aficyjny kamientar SK, što žančynu zatrymali jak saŭdzielnika zabojstva. Pa Kryminalnym kodeksie, saŭdzielnik — heta vykanaŭca albo ci to arhanizatar, ci to padbuchtorščyk, ci to pamahaty.
Vykanaŭcam jaje nie paličać, bo navat z taho videa bačna, što zbroi ŭ jaje niama. Što tyčycca inšych farmulovak, to pamiž imi vielmi tonkija miežy.
Arhanizatar — čałaviek, jaki, umoŭna, kažučy, zahadaŭ čałavieku, maŭlaŭ, biary zbroju i stralaj, rabi toje i toje, abo sam dastaŭ zbroju i daŭ vykanaŭcu.
Padbuchtorščyk — heta asoba, jakaja schilaje da vykanańnia złačynstva, umoŭna kažučy, nie dziejańniem, ale słovami.
I pamahaty — asoba, jakaja dapamahała vykanańniu złačynstva paradami, ukazańniami, infarmacyjaj, — kaža Mačałaŭ. — Bolš zrazumiełaj rola žančyny budzie tolki ŭ vypadku publikacyi videa z kamiery ŭ kvatery i ź jaje telefona.
Ale navat bolš važnaj za videazapisy krynicaj stanuć pakazańni samoj žančyny, jakija jana dała ŭ pieršuju ž noč paśla zatrymańnia. Upeŭnieny, što jaje ŭžo dapytali.
U takich spravach, jak praviła, bolš važnym arhumientam byvajuć pakazańni, jakija dajucca čałaviekam na pieršych dopytach. Navat kali na videa nie budzie ničoha bačna ci zrazumieła, ale jana pryznajecca ŭ čymści — prysłuchajucca na sudzie mienavita da pakazańniaŭ.
Nu i asablivaść hetaj spravy, što navat kali nie budzie jurydyčnych dokazaŭ, što žančyna była saŭdzielnikam, to tut budzie ŭsio tłumačycca maksimalna šyroka, maksimalna suprać jaje.
Bo vidavočna, što ŭsia napružanaść abryniecca na žančynu, jana paniasie ŭsiu adkaznaść. Sprava, chutčej za ŭsio, budzie kvalifikavana jak zabojstva, tam maksimalnaje pakarańnie — rasstreł. Ale ŭ Biełarusi žančyn nie karajuć pažyćciovym źniavoleńniem ci śmiarotnym pakarańniem, tamu maksimum, što pahražaje žančynie — 25 hadoŭ pazbaŭleńnia voli».
Čytajcie taksama:
Pierastrełka na Jakuboŭskaha, dzie ajcišnik i kadebist zabili adzin adnaho: što viadoma
