Što adbyvajecca? U karkasnych damach kala mietro, zdadzienych paśla 2008 hoda, stali vystaŭlać na prodaž adnapakajoŭki z čarnavoj addziełkaj ad 56 tysiač dalaraŭ. Z ramontam, hatovyja da pražyvańnia — ad 60 tysiač. Razmova pra kvatery płoščaj 40-43 kvadratnyja mietry.
Pa nazirańniach ekśpierta, u mai takija ceny byli tolki ŭ panelnych damach. Adnapakajoŭki ŭ karkasnych z budaŭničaj addziełkaj vystaŭlali za 65 tysiač dalaraŭ, a z ramontam — za 75-80 tysiač. Kab nie było iluzij — takija prapanovy jość i ciapier, nie ŭsie skidvajuć sumu.
«Pa cenach krychu vyšejšych, čym u damach, jakija budujucca, u hatovych pradajuć tyja, kamu patrebna terminova pradać, — tłumačyć Natalla Litoŭskaja. —
Bo stamilisia čakać. Zanadta doŭha nie brali ich nieruchomaść, bo ŭ novabudoŭlach pobač ź blizkim terminam zdačy było tańniej.
Nie vyklučana, što pradajuć, kab dakłaści krychu ci dakredytavacca, pakul jość kredyty, i kupić kvateru bolšaj płoščy ŭ susiedniaj novabudoŭli. Naohuł taki razumny chod — pradaŭ za 60 tysiač, uziaŭ kredyt na 20, pabudavaŭ jeŭratrošku i atrymaŭ klučy ŭ nastupnym hodzie».
Ekśpiert zaŭvažaje, što heta jašče nie cenapad — zruch namieciŭsia tolki pa adnym siehmiencie druhasnaha žylla.
«U inšych trend na źnižeńnie zachoŭvajecca, ale ź jakoj chutkaściu ceny buduć źmianšacca, nichto nie pradkaža».
A voś pa novabudoŭlach situacyju prahnazavać składana.
«Popyt na ich vysoki, i niejkich źmianieńniaŭ cen, pakul jość kredyty, čakać nie varta. Ale možna čakać startu novych prajektaŭ. Tam na stadyi katłavana zvyčajna ceny na 15-20% nižejšyja za tyja, što buduć u tym ža domie bližej da zdačy», — adznačaje Litoŭskaja.
