Pa sutnaści heta standartny tur vychodnaha dnia ŭ Lvoŭ. U čaćvier uviečary vyjazdžajecie, u paniadziełak rankam viartajeciesia. U prahramie ahladnyja ekskursii pa horadzie i pajezdka ŭ Karpaty dla achvotnych. U košt uvachodziać dźvie načoŭki ŭ trochzorkavym hateli sa śniadankami. Vakcynacyja — bonus za dadatkovuju apłatu.
U tur buduć vypraŭlać kožny tydzień.
Firma «Biełturyst», jakaja heta arhanizuje, kaža, što možna pryščapicca abo Pfizer, abo AstraZeneca. Heta dvuchkampanientnyja vakcyny — to-bok u tur daviadziecca źjeździć dvojčy. Druhi ŭkoł Pfizer robiać nie raniej, čym praz 21 dzień, AstraZeneca — praz 28 dzion. Adnakampanientnaj vakcyny Janssen u dostupie niama.
Za pryščepku turfirma prosić 55 dalaraŭ (va Ukrainie jana biaspłatnaja). Sam tur kaštuje 85 jeŭra plus 50 rubloŭ za turystyčnuju pasłuhu. Atrymlivajecca, što «poŭny kurs vakcynacyi» abydziecca ŭ 293 dalary.
Heta biez uliku miedstrachoŭki i PŁR-testa, jaki patrebny dla ŭjezdu va Ukrainu (jon spatrebicca tolki pieršy raz, pry druhim ujeździe možna budzie pakazać siertyfikat ab pieršaj pryščepcy).
Ź siertyfikatam va Ukrainie jość składanaści. Kab jaho atrymać, patrebny indyvidualny padatkovy numar i damova ź siamiejnym doktaram.
U «Biełturyście» zapeŭnivajuć, što viedajuć pra abmiežavańni i vyrašajuć ich.
«Pryščepku robić dziaržaŭnaja balnica. Siertyfikat vydajecca taki ž, jak ukraincam. Na apošniaj viersii kiuar-koda nie było. Ale pa im usia Ukraina ŭ Jeŭropu haniaje», — adkazała firma.
Prablema ŭ tym, što elektronny siertyfikat z kiuar-kodam, jaki pryznaje Jeŭrapiejski sajuz, vydajecca tolki hramadzianam Ukrainy i tym, chto maje časovy abo pastajanny vid na žycharstva.
Dniami Ministerstva achovy zdaroŭja Ukrainy paviedamlała, što ŭ ich na składach amal 11,5 miljona doz vakcyn ad roznych vytvorcaŭ. U 35 tysiač doz termin prydatnaści zakančvajecca 30 vieraśnia, u 1,6 miljona — 31 kastryčnika. U viedamstvie adznačajuć, što prymajuć miery, kab racyjanalna vykarystać vakcyny.
Raniej hubiernatar Hrodzienskaj vobłaści Uładzimir Karanik tłumačyŭ, čamu ŭ Biełarusi dahetul nie zakupili Pfizer.
«Prymianiajem tyja vakcyny, jakija zarehistravany i dastupny ŭ Biełarusi. «Sputnika V» u nas naładžana vytvorčaść, z kitajskaj vakcynaj, z ulikam siabroŭskich adnosin z Kitajem, jość mahčymaść pry vostrym deficycie vakcyn u śviecie nabyvać jaje.
Nakont raznastajnaści. Dla rehistracyi vakcyny patrebny zvarot vytvorcy. Pfizer nie źviartaŭsia, bo jany adčuvajuć surjoznuju prablemu zadavolić popyt, jaki jość u śviecie».