Źjechali abo siadziać — voś los bolšaści supracoŭnikaŭ siłavych viedamstvaŭ, jakija asudzili hvałt u žniŭni 2020 hoda. Tady tolki nievialikaja častka supracoŭnikaŭ siłavych viedamstvaŭ publična vystupili suprać hvałtu i zvolnilisia.
Chtości zapisvaŭ videazvaroty, chtości publikavaŭ zvaroty ŭ svaich sacsietkach. Byli i tyja, chto raskazvaŭ pra padrychtoŭku da vybaraŭ i zahady, jakija im addavali vyšejšyja čyny.
Jeŭraradyjo vyrašyła prasačyć ich losy i daviedacca, dzie jany ciapier.
Juryj Machnač
U žniŭni 2020 hoda Juryj Machnač zapisaŭ videazvarot, u jakim asudziŭ hvałt i raskazaŭ pra toje, chto addavaŭ zahady ŭžyvać siłu da pratestoŭcaŭ. 19 žniŭnia, nieŭzabavie paśla pačatku masavych pratestaŭ, jon zvolniŭsia ź milicyi.
U svaim žnivieńskim videazvarocie aficer raskazvaŭ, što milicyjaniery atrymali zahad abaraniać uładu lubymi srodkami i sposabami. Nibyta pry jaje źmienie ich usich čakała b śmierć.
Ciapier Juryj Machnač vyjechaŭ ź Biełarusi ŭ Polšču.
Siarhiej Kuračkin
Siarhiej Kuračkin druhi źleva.
Siarhiej Kuračkin zvolniŭsia ź milicyi 20 žniŭnia 2020 hoda — u samy razhar pratestaŭ. Jon słužyŭ u Iŭjeŭskim RAUS u zvańni majora milicyi. U čas zadušeńnia pratestaŭ jon admoviŭsia jechać u Lidu, kali tam u adździaleńni milicyi źbivali zatrymanych ludziej.
Ciapier Siarhiej žyvie ŭ Polščy, dzie jamu dapamoh Fond salidarnaści, stvorany dla dapamohi ludziam, jakija stracili pracu praz pratesty, u tym liku dla dapamohi byłym siłavikam.
Jahor Jemialjanaŭ
U žniŭni 2020-ha kapitan milicyi Jahor Jemialjanaŭ admoviŭsia ŭdzielničać u zadušeńni pratestaŭ u Navapołacku i zvolniŭsia. Nieŭzabavie pierajechaŭ u Minsk.
Amal praz hod, 20 traŭnia 2021-ha, Jemialjanava zatrymali na jaho novym pracoŭnym miescy — u minskim fitnies-centry. Jaho asudzili pa niekalkich administracyjnych artykułach, uklučajučy «chulihanku» i «niepadparadkavańnie słužbovaj asobie». Ahułam jon pravioŭ u izalatary kala 40 sutak.
U vieraśni 2021 hoda stała viadoma, što były kapitan milicyi z Navapołacka Jahor Jemialjanaŭ znachodzicca ŭ Kijevie. Pra heta napisała jaho žonka ŭ sacyjalnych sietkach.
Dźmitryj Kułakoŭski
Kułakoŭski — były načalnik kryminalnaha vyšuku Zavodskaha RUUS Minska. Jon zvolniŭsia nieŭzabavie paśla prezidenckich vybaraŭ, bo byŭ nie zhodny ź dziejańniami ŭładaŭ. U kastryčniku jaho zatrymali, jon pravioŭ 27 sutak za kratami ŭ izalatary na Akreścina.
U śniežni 2020 hoda jon byŭ zatrymany pa kryminalnaj spravie za «abrazu pradstaŭnika ŭłady». Pierad hetym jon sprabavaŭ vyjechać ź Biełarusi, ale vyśvietliłasia, što vyjezd za miažu dla jaho časova abmiežavany.
U studzieni 2021 hoda jaho asudzili na dva hady chimii.
Dzianis Urad
U sakaviku 2021 hoda, pavodle viersii dziaržprapahandy, kapitan Dzianis Urad, budučy śpiecsuviazistam Hienštaba Uzbrojenych sił, sfatahrafavaŭ sakretny list ad ministra ŭnutranych spraŭ ministru abarony i adpraviŭ pryznanamu ekstremisckim telehram-kanału. Nieŭzabavie jaho zatrymali pa kryminalnaj spravie za «zdradu dziaržavie».
U traŭni Viarchoŭny sud prysudziŭ Dzianisa da 18 hadoŭ pazbaŭleńnia voli ŭ kałonii ŭzmocnienaha režymu. Taksama jaho pazbavili voinskaha zvańnia. Sud prachodziŭ u zakrytym režymie.
Ivan Kołas
Homielski ŭčastkovy Ivan Kołas pakinuŭ Biełaruś u noč na 12 žniŭnia, paśla taho, jak jon zapisaŭ videazvarot da kaleh z zaklikam spynić hvałt.
Pa słovach byłoha milicyjaniera, nieŭzabavie paśla publikacyi videa da jaho pryjšli z kiraŭnictva. Jon admoviŭsia adčynić im dźviery, a formu, žeton i paśviedčańnie vykinuŭ z bałkona.
U žniŭni 2020-ha Ivan vyjechaŭ u Kijeŭ. Dzie jon ciapier — nieviadoma.
Jaŭhien Asinski
Budučy ŭčastkovym inśpiektaram u Leninskim RUUS, 12 žniŭnia jon napisaŭ rapart, zdaŭ žeton i paśviedčańnie, viarnuŭ pistalet, naručniki — i syšoŭ. Užo ŭviečary 14 žniŭnia jon byŭ u Kijevie.
Fondy salidarnaści dapamahli jamu z arendaj žylla, a vałanciory By_change prapanavali asvoić IT-śpiecyjalnaść. Jaŭhien vybraŭ UX/UI-dyzajn, atrymaŭ mientara pa motion-dyzajnie i ŭvajšoŭ u prahramu UpSkill Lab ad EPAM — anłajn vučyć UX/UI-dyzajn.
Raman Viesiałoŭski
Da žniŭnia 2020 hoda Raman Viesiałoŭski byŭ staršym siaržantam patrulna-pastavoj słužby adnaho ź minskich RUUS.
«Pa dakumientach ja zvolnieny ź milicyi z 31 žniŭnia. Na samaj spravie syšoŭ raniej — 24 žniŭnia ja adpraviŭsia na balničny i bolš na pracu nie viarnuŭsia. Mianie zvolnili pa artykule — za prahuły: ja ž u 2019 hodzie padpisaŭ kantrakt na 5 hadoŭ, pa-inšamu mianie nichto nie adpuściŭ by», — raskazvaje dev.by Viesiałoŭski.
Ciapier jon — prajekt-mieniedžar, pracuje ŭ bujnoj IT-kampanii.
Abjadnańnie byłych siłavikoŭ, pryznanaje ŭładami ekstremisckim
Vialikaja hrupa ludziej, jakija pakinuli słužbu ŭ orhanach unutranych spraŭ, zasnavała inicyjatyvu, jakaja zajmajecca rasśledavańniem parušeńniaŭ siłavych viedamstvaŭ Biełarusi. Adno ź ich asnoŭnych rasśledavańniaŭ — ab zabojstvie Ramana Bandarenki. Ofis inicyjatyvy znachodzicca ŭ Varšavie.
U inicyjatyvu ŭvachodziać byłyja supracoŭniki MUS Stanisłaŭ Jakimienka, Siarhiej Čubukoŭ, Aleh Talerčyk, Siarhiej Makar, Ihar Łoban, Michaił Kucko, Siarhiej Kuračkin, Maćviej Kuprejčyk, Uładzimir Žyhar, Alaksandr Azaraŭ, Stanisłaŭ Łupanosaŭ i Andrej Astapovič.
Čytacie taksama: «Milicyjaniery ŭ šoku, bajacca, što prasłuchoŭvali kožnaha». Byłyja siłaviki pra toje, jak adreahavali na źlivy ŭ MUS
Chto taki antyhieroj internetu, milicyjanier Ihar Padvojski, i za što jon nie lubić Čamadanavu
