Na «Biełaruśfilmie» idzie padbor aktoraŭ na stužku «Masakra». Pra heta paviedamiŭ scenaryst karciny Alaksandr Kačan.
«Masakra» – hatyčnaja trahikamiedyja žachaŭ, składzienaja pa addalenym matyvam «Łokisa» Praspera Meryme.
Dziejańnie ŭ filmie pieraniesienaje ŭ Biełaruś, paśla paŭstańnia Kastusia Kalinoŭskaha. Aktorski skład hetaha ajčynnaha choraru jašče nie zaćvierdžany, ale viadoma, jakija ŭ filmie hieroi – i chto prachodzić proby.
Hraf Pazurkievič – luty ŭ hnievie patomny miadźviedź-piarevaracień, jaki žadaje być čałaviekam – ale abstaviny hetamu nie vielmji spryjajuć. Pieršapačatkova režysior Andrej Kudzinienka mierkavaŭ addać rolu rasiejskamu aktoru Alaksandru Damaharavu, jaki dobra vałodaje polskaj movaj. Ale hraf, najchutčej, budzie syhrany biełarusam.
Ciarod niečakanych spašukoŭcaŭ nazyvaŭsia rok-muzyka Siarhiej Michałok. U kastynhu braŭ udzieł i Pavał Charłančuk. Ad pačatku proby prajšoŭ adzin ź lepšych biełaruskich aktoraŭ Anatol Kot, jaki syhraŭ u “Akupacyi” Andreja Kudzinienki.
Ale Anatolu Katu moža być prapanavanaja i hratesknaja rola dvareckaha Sihizmunda.
Dvarecki Sihizmund – słuha hrafa ciomnaha pachodžańnia, błahoha vyhladu i z hniusnymi zvyčkami. Vielmi lubić stavić pjaŭki.
Akramia Kata, na proby zaprašaŭsia Viačasłaŭ Paŭluć z Kupałaŭskaha teatru.
Niaviesta hrafa Hanna Kazimiraŭna – pieknaja dziaŭčyna, jakaja razryvajecca pamiž płocievaj žarściu da hrafa i pryjaznaściu da iłžeprafiesara Kazancava.
Hetaja hałoŭnaja žanočaja rola, jak rola jejnaje ciotki zarezervavanaja za polskaj aktrysaj. Imiony aktrysaŭ pakul nie nazyvajucca.
Ciotka Hanny – zaciataja polskaja patryjotka, jakaja naviaźliva čytaje natacyi Hańnie i hrafu. Pretendentka na zahryzańnie.
Kazancaŭ – małady ruski avanturnik, jaki vydaje siabie za navukoŭcu. Vielmi zachaplajecca Puškinym, što nie dadaje jamu rozumu.
Mahčyma, jahonuju rolu vykanaje adzin ź junakoŭ, jaki hraŭ u “Rozyhryšy” Kudzinienki.
Hryška – kiemlivy słuha Kazancava, daviedzieny da źniasileńnia kucharkaju Vierkaj. Vykanaŭca nieviadomy.
Kucharka Vierka – boj-baba, vostraja na jazyk, kroŭ z małakom. Raskryvaje ŭ filmie temu biełaruskaj cnatlivaści. Vykanaŭca nieviadomaja.
Adzin z sama sakavitych piersanažaŭ u filmie – ajciec Pavał. Ajciec Pavał – stojeny buntaŭnik z atradu Kastusia Kalinoŭskaha. Majsterski vałodaje kryžom i vintoŭkaj. Syple biełaruskimi prykazkami j prymaŭkami. Rola zuchavataha baciuški prapanoŭvałasia Alaksandru Kołbyšavu, jaki syhraŭ Štyrkina ŭ “Akupacyi”.
Anatol Kot i Alaksandr Kołbyšaŭ mohuć iznoŭ sustrecca na zdymačnaj placoŭcy.
Siarod znakavych aktrysaŭ «Masakry» – Śviatłana Zielankoŭskaja. Pad jaje pišacca rola pani Astroŭskaj. Astroŭskaja lubić ciškom u haściach nažłukcicca – i z nahody i biez nahody zładzić kancerty. Jejnamu mužu, panu Astroŭskamu, nieabačlivamu amataru miadźviedziny, taksama nie pašancavała.
Na hrafskaj siadzibie ź miadźviežymi zvyčkami padrabiazna paznajomiacca i dva akupanty – zły i vietlivy.
Rola vietlivaha akupanta – rasiejskaha hienierała, moža być prapanavanaja Juryju Kuźniacovu, ź jakim Andrej Kudzienka pracavaŭ na filmie «Rozyhryš». Kuźniacoŭ bolš viadomy, jak milicejski kiraŭnik z «Vulicy raźbitych lichtaroŭ». Ale dla «Masakry» jon – «smačny kavałak sała ŭ biarłozie».
Jašče harčejšaja dola ŭ «ruskaha fašysta» Bucharyna (u dziavoctvie – Baturyna). Kali stužka prapanoŭvałasia ruskim pradusaram, tyja sa ślazami na vačoch umalali źmianić proźvišča (Baturyna, jakaja, vierahodna, vyłučajecca najdabrejšym noravam – žonka maskoŭskaha mera Łužkova). Na rolu Bucharyna prabavaŭsia litoŭski aktor Vładas Bahdonas, jaki zdymaŭsia ŭ karcinie Elema Klimava «Idzi i hladzi».
Zrešty, Bahdonasu ŭžo viadomy hrafski pałac. Jon słužyŭ u siadzibie Žałudok, što pad Lidaju – dzie j buduć adbyvacca zdymki.
Maci hrafa – viedźma i arystakratka, jakaja z kožnym kadram maładzieje. Hety truk byŭ prydumany pad Hražynu Šapałoŭskuju. Ale rola prapanujecca biełaruskaj aktrysie Aksanie Lasnoj.
Rola sielskaha muzyki, jaki zažyhaje na miadźviežym karnavale – pasuje Lavonu Volskamu.
Režysiora pryśpiešvajuć, kab jon najchutčej zrabiŭ kančatkovy adbor. Ale Kudzinienka kaža: «Ja chaču, kab aktory na ŭsie roli byli padabrany dakładna».
Letam kastynh zavieršycca. Uvosień pačnucca zdymki pieraviertnickaj biełaruskaje hotyki.
