Jak paviedamlajuć svajaki zatrymanych pa «spravie Zielcera», u žodzinskaj turmie №8 palitviaźniam nie pieradajuć ni pieradačy, ni listy, a da niekatorych navat nie puskajuć advakataŭ. Ale pa słovach svajakoŭ, hetaje praviła tyčycca tolki tych, kaho zatrymali mienavita za kamientary. Svajaki sprabujuć dasyłać viaźniam pasyłki, ale nieviadoma, ci pieradaduć ich adrazu albo tolki paśla karancinu.
Faktyčna ŭsie fihuranty «spravy Zielcera» ŭžo try tydni siadziać u tym adzieńni, u jakim ich zatrymali, biez srodkaŭ hihijeny i ciopłych rečaŭ. Adkazy na listy rodnyja taksama nie atrymlivajuć, jany navat nie viedajuć, ci addajuć listy źniavolenym. Dakładnuju datu zakančeńnia karancinu ŭ žodzinskaj turmie blizkija nie viedajuć, ale doŭžycca jon užo prykładna dva tydni. Svajakam kažuć, što jon dakładna budzie dziejničać jašče da kanca hetaha tydnia.
Pa «spravie Zielcera» prachodzić kala 200 čałaviek. Ich zatrymali za kamientary pad paviedamleńniem pra hibiel supracoŭnika KDB. Kryminalnyja spravy zaviedzienyja pa artykułach 130 (naŭmysnyja dziejańni, nakiravanyja na abudžeńnie inšaj sacyjalnaj varožaści abo varožaści pa prykmiecie inšaj sacyjalnaj prynaležnaści) i 369 (abraza pradstaŭnika ŭłady i jaho blizkich u suviazi z vykanańniem im słužbovych abaviazkaŭ).
U siecivie nazvali hetyja zatrymańni «prymušeńniem da žałoby».
Dźmitryj Fiedasiuk byŭ zastreleny ajcišnikam Andrejem Zielceram 28 vieraśnia. Supracoŭniki KDB nibyta pravodzili płanavuju adpracoŭku ludziej, jakija mahli mieć dačynieńnie da «terarystyčnaj dziejnaści». Pry sprobie trapić u kvateru Zielcera Fiedasiuk byŭ zastreleny.
Da hetaha času nieviadoma, u čym padazravali Zielcera.
«Muž šapnuŭ: «Heta KDB». Jak zatrymlivajuć biełarusaŭ za kamientary
