Pa prybyćci ŭ Paryž Savieljeŭ raspavioŭ padrabiazna svaju historyju: jon prabyŭ u rasijskaj turmie 7,5 hoda — u 2013 hodzie jaho zatrymali z bujnoj partyjaj narkotykaŭ u Krasnadary. Pa słovach zasnavalnika pravaabarončaha prajekta Uładzimira Asiečkina, heta adbyłosia tak: prahramista paprasili pieravieźci sistemny błok na mašynie ŭ inšy horad, ale praź niekalki chvilin jaho spynili apieratyŭniki FSB. Padčas pieratrusu jany vyjavili kampjutar i «šeść kiłahram sintetyčnych narkotykaŭ» u im.
Asiečkin raspaviadaŭ, što ŭvieś čas śledstva Savieljeva źbivali, a praz dva hady sud pryznačyŭ jamu dzieviać hadoŭ. Pakarańnie jon adbyvaŭ u Sarataŭskaj vobłaści, dzie ź lutaha 2016 hoda pa luty 2021 hoda pracavaŭ administrataram videakamier nazirańnia ŭ suchotnaj balnicy №1 (ATB-1).
Savieljeva daterminova vyzvalili za dobryja pavodziny, čamu častkova spryjała jaho praca. Prahramist zachavaŭ videazapisy katavańniaŭ źniavolenych i scen seksualnaha hvałtu na USB-nazapašvalniki i schavaŭ kala vychadu z turmy. U dzień vyzvaleńnia — užo paśla pieratrusu — jon zabraŭ fłeški.
24 vieraśnia Savieljeva zatrymali ŭ aeraporcie Pułkava ŭ Pieciarburhu i prymusili padpisać pakazańni ab tym, što jon nibyta pracavaŭ u intaresach «niejkaj zamiežnaj dziaržavy».
Paśla dopytu Savieljeŭ źjechaŭ u Minsk i źviazaŭsia z Gulagu.net — tady pravaabaroncy vyrašyli, što jaho nieabchodna evakuiravać. U Minsk Savieljeŭ dabraŭsia na maršrutcy, jakaja idzie praz rasijska-biełaruskuju miažu. Tam, pa słovach Asiečkina, jon zaŭvažyŭ vonkavaje nazirańnie, a ŭ kvatery znajšoŭ «pradmiety, jakija nahadvajuć niešta, źviazanaje z žučkami».
Ź Minska prahramist vylecieŭ u Stambuł, adtul — u Tunis, a tam uziaŭ kvitok nazad u Biełaruś, ale z prypynkam u aeraporcie Šarl-de-Hol u Paryžy. Prybyŭšy tudy ŭ noč na 16 kastryčnika, Savieljeŭ źviarnuŭsia ŭ palicyju i paprasiŭ palityčnaha prytułku.