U pryvatnaści, źmieny zakranuli zakony «Ab uzbrojenych siłach Respubliki Biełaruś» i «Ab nadzvyčajnym stanoviščy».
Raniej padstavaj dla ŭviadzieńnia ČS (aproč stychijnych biedstvaŭ i katastrof) ličyŭsia pačatak biesparadkaŭ, ale nie było ŭdakładniena — mienavita što i ŭ jakim abjoma možna ličyć biesparadkami.
Ciapier hety momant kankretyzavali: da biesparadkaŭ buduć adnosić sproby hvałtoŭnaj źmieny kanstytucyjnaha ładu, zachopu ci prysvajeńnia ŭłady, uzbrojeny miaciež, masavyja chvalavańni, mižnacyjanalnyja i mižkanfiesijnyja kanflikty, što supravadžajucca hvałtoŭnymi dziejańniami, jakija stvarajuć pahrozu žyćciu i biaśpiecy hramadzian.
Što važnaha ŭ novym zakonie?
Toje, što, kali ŭ Biełarusi budzie ŭviedzienaje ČS, da zabiaśpiačeńnia paradku mohuć być dałučanyja vajenizavanyja arhanizacyi. Miarkujecca, što ŭ papiaredžvańni i spynieńni biesparadkaŭ, zabieśpiačeńni achovy hramadskaha paradku i biaśpieki buduć zadziejničanyja siły i srodki MNS, Śledčaha kamiteta, Dziaržaŭnaha kamiteta sudovych ekśpiertyz i Departamienta finansavych rasśledavańniaŭ.
«Čałaviek sa zbrojaj kaštuje dziasiatka siłavikoŭ tolki z dubinkami pa ŭpłyvie na niaŭzbrojenych hramadzianaŭ. Tamu ź lutaha idzie aktyŭnaja praca pa padbory štata dla supracivu masavym vystupam hramadzianaŭ, jakija pa słužbie ci pracy majuć zbroju.
Štat MUS abmiežavany, i hramadzianie, jakija słužać (pracujuć) u arhanizacyjach z asablivymi ŭstaŭnymi zadačami, mohuć stać terytaryjalnymi vojskami (što važna — łajalnymi), jakija buduć zadziejničanyja dla supracivu vystupam hramadzianaŭ u miežach režymu ČS», — kamientuje vajenny ekśpiert Jahor Lebiadok.
Kab razumieć, da takich arhanizacyj, naprykład, naležać lesahaspadarčyja, słužby inkasacyi, Biełpošta, BFST «Dynama» i inšyja.
U novym zakonie taksama prapisana: kali niešta zdarycca z prezidentam, jaho paŭnamoctvy buduć aŭtamatyčna pieradadzienyja Savietu biaśpieki.
Usio heta, na pohlad ekśpiertaŭ, było zroblena zusim nie z metaj zachavańnia miru i paradku ŭ krainie, jak heta padajecca, a kab pierastrachavacca na vypadak novych chvalavańniaŭ u hramadstvie.
«Unutry dziaržaparata viedajuć pra niebiaśpiečanaść i nielehitymnaść svajho isnavańnia i takimi voś srodkami sprabujuć praduhledzieć roznyja varyjanty raźvićcia padziej», — ličyć juryst Aleh Ahiejeŭ.
Akramia taho, na dumku ekśpiertaŭ, novy zakon patrebny, kab źniać dadatkovuju adkaznaść (jurydyčnuju ci psichałahičnuju) z asob, jakija byli (ci buduć) zadziejničanyja ŭ zadušeńni pratestaŭ.
«Žurnalisty prama ciapier pracujuć u režymie nadzvyčajnaha stanovišča, choć čas nibyta mirny»
Badaj, adzin z samych cikavych punktaŭ u abnoŭlenym zakonie tyčycca paradku pracy sa ŚMI i internetam padčas ČS. Ciapier užo aficyjna vypusk ŚMI ŭ taki pieryjad moža być prypynieny (ci ŭvohule spynieny), a dostup da internet-resursaŭ i sietkavych vydańniaŭ abmiežavany.
Ilustracyjnaje fota.
Deputat Pałaty pradstaŭnikoŭ Nacyjanalnaha schodu siarhiej Kliševič upeŭnieny, što «internet i ŚMI, sacyjalnyja sietki — heta zbroja» i ich vykarystańnie musić być abmiežavanaje: «U hetym zakonie vyrazna prapisana, što ŭ vypadku ŭviadzieńnia nadzvyčajnaha stanovišča buduć peŭnyja abmiežavańni ŭ pracy srodkaŭ masavaj infarmacyi, akredytacyi žurnalistaŭ, u tym liku mižnarodnych, u pracy interneta».
Ale toje ž samaje ŭ Biełarusi było i bieź isnavańnia hetaha zakona.
«Tyja źmieny i abmiežavańni, jakija jany ŭnieśli ŭviesnu, byli ŭžo ździejśnienyja ŭ mirny čas, kali nijakich nadzvyčajnych stanovišč anansavana nie było. Ničoha nie pieraškadžała błakavać internet i vykidvać zamiežnych žurnalistaŭ, zakryvać karespandenckija punkty ŭ 2020 hodzie. Žurnalisty prama ciapier pracujuć u režymie nadzvyčajnaha stanovišča, jak my bačym, choć čas nibyta mirny», — kamientuje Aleh Ahiejeŭ.
U MUS razhladajuć ideju pazbaŭlać hramadzianstva biełarusaŭ, jakija źjechali za miažu
U Niurnbierhu abmierkavali płan pryznańnia Łukašenki mižnarodnym terarystam. Pra što damovilisia?