«Premija supolnaści biełaruskaj kinakrytyki musiła naradzicca ŭ bolš spryjalny dla našaha kino čas, ale šturškom dla jaje zasnavańnia stali kulturnyja represii ŭ krainie. Likvidacyja kampanij, jakija sadziejničali źjaŭleńniu i papularyzacyi biełaruskaha (niezaležnaha) kino, źmianieńnie vypracavanaj u papiarednija hady kancepcyi Minskaha mižnarodnaha kinafiestyvalu «Listapad» vynosiać pracu biełaruskich kiniematahrafistaŭ na abočynu kulturnych pracesaŭ», — havorać zasnavalniki.
Supolny arhanizacyjny skład premii składajecca z čatyroch žurnalistaŭ: Ireny Kaciałovič, Darji Amialkovič, Maksima Karpickaha i Tarasa Tarnalickaha. Dyzajn premii stvaryŭ pradprymalnik i režysior Ivan Maślukoŭ.
Da padačy zajavak u jakaści pretendentaŭ na premiju «Čyrvony vieras» zaprašajucca aŭtary karotka- i poŭnamietražnych ihravych, dakumientalnych i animacyjnych filmaŭ, premjera jakich adbyłasia z pačatka 2019 pa kaniec 2020 hoda. Spasyłki na filmy, dasłanyja na konkurs, buduć vykarystanyja vyklučna dla prahladu siabrami žury premii, a nie dla publičnaha pakazu.
Dla ŭdziełu nieabchodna zapoŭnić admysłovuju formu.
Termin padačy zajavak da 21 listapada ŭklučna.
Vyrašać los stužak budzie pašyrany skład žury, u jaki aproč siabraŭ arhkamitetu premii ŭvajšli viadomyja žurnalisty, kinaznaŭcy, daśledčyki i błohiery, što zajmajucca temaj kino: Maksim Žbankoŭ, Ihar Sukmanaŭ, Iryna Dziamjanava, Andrej Rasinski, Anton Kalaha, Uljana Budzik, Jury Kastuzik, Halina Šur, Volha Ramanava i inšyja. Usiaho ahułam 18 udzielnikaŭ, padrabiazny śpis my apublikujem paźniej. Hałasavańnie budzie prachodzić anłajn paśla skančeńnia pryjomu zajavak. Praca arhkamiteta dy siabraŭ žury premii adbyvajecca vyklučna na vałanciorskich pačatkach.
Hałasavańnie projdzie pa trynaccaci naminacyjach:
• Najlepšy ihravy poŭnamietražny film,
• Najlepšy ihravy karotkamietražny film,
• Najlepšy poŭnamietražny dakumientalny film,
• Najlepšy karotkamietražny dakumientalny film,
• Najlepšy animacyjny film,
• Najlepšy režysior,
• Najlepšy akcior,
• Najlepšaja aktrysa,
• Najlepšaja praca apieratara,
• Najlepšy scenar,
• Najlepšaje mastackaje rašeńnie (praca mastaka-pastanoŭščyka),
• Najlepšaje muzyčnaje afarmleńnie,
• Adkryćcio hoda.
