Hod i try miesiacy Źmicier prabyŭ u SIZA, a amal pad kaniec terminu jaho pieraviali ŭ kałoniju, dzie paśla adbyćcia karancinu jon amal adrazu trapiŭ u štrafny izalatar i prabyŭ u im da dnia vyzvaleńnia (kala 1,5 miesiaca). Pryčyny, na dumku Źmitra, byli nadumanymi: prosta kab izalavać jaho ad inšych asudžanych. Čamu tak rabili — niezrazumieła.
Źmicier Furmanaŭ. Fota z sacyjalnych sietak
Chłopiec pryznajecca, što dla jaho hety pieryjad staŭ samym składanym z usioj adsidki:
«Mianie paśpieli raźmierkavać u atrad, ale ŭ vyniku ja tam tak i nie ličyŭsia, bo znachodziŭsia ŭ ŠIZA. Horšaje za karcar miesca składana prydumać. Ty adzin, niama nijakaj infarmacyi ad ludziej, navin, listoŭ… Akramia taho, ja trapiŭ tudy, kali aciaplalny siezon jašče nie startavaŭ — było vielmi choładna. Spać niemahčyma. Ciapier treba budzie krychu padlačycca, bo zdaroŭje pakidaje žadać lepšaha».
Źmicier z maci adrazu paśla vyzvaleńnia. Fota: svaboda.org.
Za čas za kratami Źmicier atrymaŭ kala tysiačy listoŭ. Ale jon upeŭnieny, što jamu pieradali nie ŭsio: asabliva drenna listavańnie išło ŭ žodzinskim śledčym izalatary.
«U mianie zdaralisia karotkija sutyknieńni ź inšymi palityčnymi źniavolenymi. Heta zvyčajnyja ludzi, ja navat nie viedaju, ci pryznanyja jany aficyjna palitviaźniami. Byli zatrymanyja za kamientary ŭ internecie, naprykład. To-bok, ničoha takoha surjoznaha nie rabili».
Svajo źniavoleńnie Źmicier usprymaje jak słužbu ŭ vojsku.
«U vojsku ŭ mianie nie było mahčymaści pabyvać — badaj, pabyŭ ciapier. Za 1,5 hoda adbyłasia kapitalnaja zahartoŭka mocy i ducha. Heta vialikaja škoła žyćcia. Možna było b azłobicca, ale takoha ŭ mianie niama. Ja ŭpeŭnieny, što ŭ nas usio atrymajecca. Čym bolš vysiłkaŭ ad ludziej, tym budzie bolš źmien», — kaža Źmicier
Pieršaje, što Źmicier zachacieŭ kupić na voli — heta maroziva i kava.
«Ja vielmi zasumavaŭ pa marozivie, pa sałodkim. A kava patrebnaja, kab badzioraść viarnuć. Ahułam ja ciapier maru dobra vyspacca: u karcary davodziłasia pastajanna padymacca niekalki razoŭ za noč, kab sahrecca, rabić fizičnyja praktykavańni. A płany na budučyniu budu budavać paśla adpačynku i reabilitacyi — treba adnavicca».
***
Źmicier byŭ členam inicyjatyŭnaj hrupy Śviatłany Cichanoŭskaj i byŭ zatrymany naŭprost na pikiecie pa zbory podpisaŭ 29 traŭnia 2020 hoda. Heta toj dzień, kali adbyŭsia incydent ź dziŭnym padzieńniem milicyjaniera na asfalt, paśla jakoha i pačaŭsia «chapun» paplečnikaŭ Cichanoŭskaha i jaho samoha. Sam Źmicier Furmanaŭ pry hetym praciahvaŭ siadzieć za stałom i źbirać podpisy, ale jaho zatrymali i vynieśli ź pikieta razam z kresłam, u vyniku asudzili da dvuch hadoŭ kałonii pa artykule 342 (Arhanizacyja i padrychtoŭka dziejańniaŭ, što hruba parušajuć hramadski paradak, albo aktyŭny ŭdzieł u ich).
Źmicier niekalki razoŭ haładaŭ u znak pratestu suprać vystaŭlenaha jamu abvinavačvańnia. Haładoŭku taksama raspačynali jaho maci i dziaŭčyna.
Termin źniavoleńnia ŭ dva hady dla Źmitra byŭ pieraličany: 1 dzień SIZA zaličvajecca za 1,5 dnia kałonii ahulnaha režymu.
